ដោយ លោក ណាត សុភាព | ថ្ងៃពុធ ទី១២ ខែមេសា ឆ្នាំ២០១៧
http://vodhotnews.com
អឿត អាង ហៅ ជួប សម្លាប់ កាលពីពេលកន្លងទៅ
ក្រសួងមហាផ្ទៃបានច្រានចោលព័ត៌មានចចាមអារ៉ាម ដែលថា បុរស អឿត អាង ហៅ ជួប សំលាប់ ដែលតុលាការកាត់ទោសពីបទ បាញ់សម្លាប់លោក កែម ឡី បានហែកគុករត់គេចខ្លួននោះ ថាជារឿងប្រឌិត។
ការច្រានចោលនេះ ធ្វើឡើងបន្ទាប់ពីលេចព័ត៌មានតាមបណ្តាញសង្គមហ្វេសប៊ុកបានចែករំលែកតៗគ្នាថា «ស្មានមិនដល់ថា ជួប សំលាប់ ចេះហែកគុក»។
អគ្គនាយកនៃ អគ្គនាយកដ្ឋានពន្ធនាគារ ក្រសួងមហាផ្ទៃលោក ហេង ហាក់ បានប្រាប់VODនៅថ្ងៃពុធនេះថា ជួប សំលាប់ មិនបានហែកគុករត់គេចខ្លួនដូចអ្នកប្រើប្រាស់បណ្តាញសង្គមបង្ហោះចែករំលែកតៗគ្នានោះទេ ដោយលោកអះអាងថា ក្រសួងបានទាក់ទងទៅអ្នកគ្រប់គ្រងពន្ធនាគារព្រៃស គឺ ជួប សំលាប់ កំពុងនៅក្នុងពន្ធនាគារ។
កាលពីចុងខែមីនា សាលាដំបូងរាជធានីភ្នំពេញសម្រេចផ្តន្ទាទោសឲ្យបុរស អឿត អាង ហៅ ជួប សំលាប់ ជាប់ពន្ធនាគារ អស់មួយជីវិត ដោយចោទថា បានបាញ់សម្លាប់លោក កែម ឡី កាលពីឆ្នាំ២០១៦។
ទោះជាយ៉ាងណាក៏ដោយ ជាញឹកញាប់ ជួប សំលាប់ តែងបានអះអាងថា ខ្លួនជាអ្នកសម្លាប់លោក កែម ឡី ហើយមិនមានអ្នកណាបញ្ជាឬនៅពីក្រោយនោះទេ៕