ដោយ លោក សូរ្យ ជ័យឧត្ដម | ថ្ងៃអាទិត្យ ទី២៣ ខែមេសា ឆ្នាំ២០១៧
http://vodhotnews.com
រដ្ឋាភិបាលកម្ពុជា បានខ្ចីប្រាក់សរុបជាង ៨៣០០លានដុល្លារ នៅក្នុងរយៈពេល ២៣ឆ្នាំចុងក្រោយនេះ ដោយថា កម្ចីទាំងនោះភាគច្រើនត្រូវបានប្រើប្រាស់នៅក្នុងវិស័យហេដ្ឋារចនាសម្ព័ន្ធ។ នេះដោយយោងតាមរបាយការណ៍បំណុលសាធារណៈរបស់កម្ពុជា ចេញផ្សាយដោយក្រសួងសេដ្ឋកិច្ច និងហិរញ្ញវត្ថុនាពេលថ្មីៗនេះ។
នៅក្នុងរបាយការណ៍នោះ ក្រសួងសេដ្ឋកិច្ច និងហិរញ្ញវត្ថុ បានឲ្យដឹងថា គិតចាប់ពីឆ្នាំ១៩៩៣ មកដល់ឆ្នាំ២០១៦ ប្រទេសកម្ពុជាបានខ្ចីប្រាក់ ៣.៦ពាន់លានដុល្លារពីប្រទេស ៨៩៩លានដុល្លារពីប្រទេសជប៉ុន ៥១០លានដុល្លារពីកូរ៉េខាងត្បូង ១២៤លានដុល្លារពីប្រទេសបារាំង ៨៦.៦លានដុល្លារពីប្រទេសថៃ ៧៥លានដុល្លារពីឥណ្ឌា ៤៤.៥លានដុល្លារពីប្រទេសវៀតណាម និង ៧.៨លានដុល្លារពីប្រទេសម៉ាឡេស៊ី។
ក្រៅពីនេះ កម្ពុជាបានខ្ចីពីបណ្ដាដៃគូអភិវឌ្ឍន៍ពហុភាគីផងដែរ ដូចជាកម្ចីពី ២ពាន់លានដុល្លារពីធនាគារអភិវឌ្ឍន៍អាស៊ី ADB កម្ចី ៧៩៤លានដុល្លារពីធនាគារពិភពលោក កម្ចីទំហំ ៨៧លានដុល្លារពីមូលនិធិអន្តរជាតិសម្រាប់អភិវឌ្ឍន៍កសិកម្ម កម្ចី ៧០លានដុល្លារពីមូលនិធិអង្គការ OPEC សម្រាប់អភិវឌ្ឍន៍អន្តរជាតិ និង១០.៦លានដុល្លារពីមូលនិធិអភិវឌ្ឍន៍ Nordic។
ទោះជាយ៉ាងណា ក្រសួងនេះអះអាងថា បំណុលសាធារណៈក្រៅប្រទេសរបស់កម្ពុជា មានទំហំស្មើនឹង ២២.៥ភាគរយនៃទំហំផលិតផលក្នុងស្រុកសរុបរបស់កម្ពុជា ពោលគឺស្ថិតនៅក្រោមកម្រិតអាសន្នយ៉ាងឆ្ងាយ៕