ដោយ VOD Admin | ថ្ងៃសៅរ៍ ទី១៩ ខែសីហា ឆ្នាំ២០១៧ | ម៉ោង 2:58 PM
http://vodhotnews.com
រូបភាពពីហ្វេសប៊ុក អាជ្ញាធរជាតិ អប្សរា
អាជ្ញាធរជាតិអប្សរាបានចុះរុះរើផ្ទះនិងសំណង់នៅតំបន់ហាមឃាត់ បានចំនួន១៧១ករណីនៅក្នុងឧទ្យានអង្គរដោយបញ្ជាក់មូលហេតុថា សំណង់ទាំងនោះខុសច្បាប់ ហើយខ្លះត្រូវបានរុះរើដោយគណៈកម្មការចំរុះ និងខ្លះទៀតម្ចាស់សំណង់ស្ម័គ្រចិត្តរុះរើដោយខ្លួនឯង។
យោងតាមទំព័រហ្វេសប៊ុករបស់អាជ្ញាធរអប្សរាបានចុះថ្ងៃ សុក្រម្សិលមិញថា ចាប់តាំងពីថ្ងៃទី ០៩ ខែសីហា រហូតមកដល់ពេលនេះ អាជ្ញាធរបញ្ជាក់ថា សំណង់ខុសច្បាប់ចំនួន១៤០ ករណីត្រូវបានរុះរើនិង ៣១ករណីទៀត ម្ចាស់សំណង់ចុះកិច្ចសន្យាស្ម័គ្រចិត្តរុះរើដោយខ្លួនឯង។
ប្រភពដដែលបានឲ្យដឹងថា សំណង់ទាំងនោះស្ថិតនៅ ក្រុងសៀមរាប ស្រុកបន្ទាយស្រី ស្រុកបាគង និងស្រុកអង្គរធំ ខេត្តសៀមរាប។
កាលពីថ្ងៃទី ១០ ខែសីហាកន្លងទៅគណៈកម្មការចម្រុះចាប់ផ្តើមអនុវត្តការរុះរើសំណង់នៅក្នុងឧទ្យានអង្គរដែលបានសាងសង់ឡើង អំឡុងការឃោសនាបោះឆ្នោតជ្រើសរើសក្រុមប្រឹក្សាឃុំ សង្កាត់នៅឆ្នាំ២០១៧កន្លងទៅនេះ៕
ហូរ តុងហាន់