ដោយ កញ្ញា ខាន់ លក្ខិណា | ថ្ងៃពុធ ទី៣០ ខែសីហា ឆ្នាំ២០១៧ | ម៉ោង 4:23 PM
http://vodhotnews.com
លោកនាយករដ្ឋមន្ត្រី ហ៊ុន សែន ស្នើសុំម្ចាស់ផ្ទះជួលទុកពេលឲ្យមួយឆ្នាំ ដោយកុំតម្លើងថ្លៃឈ្នួលផ្ទះ ពីកម្មករ ខណៈជាឆ្នាំបោះឆ្នោត។
លោក ហ៊ុន សែន មានប្រសាសន៍ក្នុងពិធីចុះជួបកម្មករ នៅរាជធានីភ្នំពេញនាថ្ងៃទី៣០ ខែសីហា ឆ្នាំ២០១៧នេះថា កន្លងទៅឲ្យតែកម្មករប្រាក់ខែឡើង ម្ចាស់ផ្ទះជួលតែងតែតម្លើងថ្លៃឈ្នួលផ្ទះរហូត។ លោកបន្តថា នៅក្នុងឆ្នាំ២០១៨ខាងមុខនេះ បើទោះបីជាប្រាក់ខែកម្មកររោងចក្របានឡើង១៦៨ដុល្លារក៏ពិតមែន ប៉ុន្តែលោកបានស្នើសុំឲ្យម្ចាស់ផ្ទះជួលកុំឡើងថ្លៃ ដោយទុកពេលឲ្យលោក១ឆ្នាំសិន ដោយចាំឆ្នាំ២០១៩ ចាំឡើងថ្លៃក៏បាន។
លោកថា «ខ្ញុំអំពាវនាវសុំឲ្យម្ចាស់ផ្ទះមេត្តាយក ប្រើប្រាស់ប្រាក់ឈ្នួលឆ្នាំ២០១៧នេះ កុំដំឡើង ហើយអនុវត្តនៅឆ្នាំ២០១៨តែម្ដង ដល់ឆ្នាំ២០១៩ ចាំឡើងៗ ចឹងសុំ១ឆ្នាំមើល»។
ពាក់ព័ន្ធរឿងនេះ ប្រធានសម្ព័ន្ធសហជីពកម្ពុជា លោកស្រី យ៉ាង សុភ័ណ្ឌ សម្ដែងការខកចិត្ត ចំពោះការថ្លែងរបស់លោកនាយករដ្ឋមន្ត្រី។ លោកស្រីបន្តថា ការយកចិត្តទុកដាក់របស់រដ្ឋាភិបាល មកលើកម្មករនៅមានកម្រិតតិចតួចនៅឡើយ ដោយចាត់ទុកការអំពាវនាវរបស់លោក ហ៊ុន សែន ថា គ្រាន់តែចង់បានសន្លឹកឆ្នោតពីកម្មករនៅឆ្នាំ២០១៨តែប៉ុណ្ណោះ។
លោកស្រីថា «ខ្ញុំមើលទៅ វាហាក់ដូចមានការយកចិត្តទុកដាក់ទៅលើប្រជាពលរដ្ឋនៅមានកម្រិតទាប មែនទែនតែម្ដង ពីព្រោះធម្មតា គាត់ចង់បានតែសំឡេងឆ្នោតឲ្យមានការគាំទ្រគាត់ ដោយសារឆ្នាំ២០១៨ ជាឆ្នាំមួយ នៅក្នុងការបោះឆ្នោត នៅឆ្នាំ២០១៩ចាំឲ្យតម្លើង។ ខ្ញុំគិតថាឬក៏អីនឹង ខ្ញុំគិតថា នេះវាបង្ហាញហើយ ឲ្យប្រជាពលរដ្ឋឬកម្មករយើងមើលឃើញកាន់តែច្បាស់ ថាការយកចិត្តរបស់រដ្ឋាភិបាលមកលើកម្មករនៅកម្រិតណាមួយ ចឹងសព្វថ្ងៃសម្រាប់ប្រជាពលរដ្ឋ ឬក៏កម្មករគាត់ឆ្លាតណាស់ ខ្ញុំជឿថា គាត់ដឹងពីបញ្ហាទាំងអស់ហ្នឹងហើយ»។
កាលពីថ្ងៃទី២០ ខែសីហា ឆ្នាំ២០១៧ លោកនាយករដ្ឋមន្ត្រី ហ៊ុន សែន បានប្រកាសថា ចាប់ពីខែមករា ឆ្នាំ២០១៨ ថៅកែក្រុមហ៊ុនត្រូវទទួលខុសត្រូវបង់ថ្លៃសេវាគាំពារសុខភាពឲ្យកម្មករ ១០០ ភាគរយ ហើយចាប់ពីឆ្នាំ២០១៩ កម្មករកម្មការិនីនឹងទទួលបានប្រាក់ចូលនិវត្តន៍ដូចមន្ត្រីរាជការដែរ។ ក្រៅពីនេះ កម្មការិនីអាចជិះរថយន្តក្រុងសាធារណៈពីរឆ្នាំដោយឥតគិតថ្លៃ ចាប់ពីខែសីហា ឆ្នាំ២០១៧ ដល់ខែសីហា ឆ្នាំ២០១៩ ដោយគ្រាន់តែបង្ហាញប័ណ្ណការងារ៕