ដោយ អេង គីមហុង
17/09/2017
RFI
រូបថតៈ សកម្មភាពពលរដ្ឋជួបជុំគ្នាមុនចេញដំណើរទៅស្រុកកំណើត (@FB)
សាលារាជធានីភ្នំពេញនៅថ្ងៃទី១៦ខែកញ្ញាម្សិលមិញ បានរម្លឹកទៅក្រុមហ៊ុនដឹកជញ្ជូនឲ្យរក្សាតម្លៃដឹកជញ្ជូនឲ្យនៅដដែល ដោយកុំដំឡើងថ្លៃ ក្នុងឱកាសនៃពិធីបុណ្យភ្ជុំបិណ្ឌ។ បើតាមសាលារាជធានីភ្នំពេញ កន្លងមកក្រុមហ៊ុនខ្លះបានធ្វើតាមការអំពាវនាវរបស់ខ្លួនហើយ។ នៅឡើយតែមួយចំនួនទៀតមិនបានអនុវត្តតាមការអំពាវនាវនេះទេ។
រហូតមកទល់នឹងពេលនេះ គឺមានក្រុមហ៊ុនចំនួន៩បានប្រកាសមិនតម្លើងថ្លៃក្នុងការដឹកអ្នកដំណើរក្នុងឱកាសភ្ជុំបិណ្ឌឡើយ ដើម្បីសំដៅធ្វើយ៉ាងណាជួយសម្រួលការចំណាយរបស់ពលរដ្ឋ។ នេះបើតាមក្រសួងសាធារណៈការ និងដឹកជញ្ជូនឆ្លើយតបនឹងការអំពាវនាវរបស់សាលារាជធានីភ្នំពេញ។
ជាការកត់សម្គាល់នៅប្រទេសកម្ពុជារាល់ពេលមានពិធីបុណ្យទានសំខាន់ៗ រថយន្តតាក់ស៊ី ឬរថយន្តក្រុងតែងតែឆ្លៀតឱកាសដំឡើងថ្លៃធ្វើដំណើរ បណ្ដាលឲ្យមានការរិះគន់ពីប្រជាពលរដ្ឋទូទៅ ។ ក្នុងសំណុំរឿងនេះ លោក ស៊ុន ចាន់ថុល រដ្ឋមន្ត្រីក្រសួងសាធារណៈការនិងដឹកជញ្ជូនលើកឡើងកាលពីថ្ងៃទី១៤ខែកញ្ញាថា កម្ពុជាជាប្រទេសទីផ្សារសេរី គេមិនអាចហាមឃាត់ក្រុមហ៊ុន ឬរថយន្តតាក់ស៊ីទាំងនេះមិនអោយឡើងថ្លៃបានឡើយ។
លោកបន្ថែមថា រឿងនេះមិនមែនកើតមានតែនៅប្រទេសកម្ពុជាទេ នៅប្រទេសផ្សេៗទៀតក៏កើតមានដូចកម្ពុជាដែរ។ បើតាមលោក ស៊ុន ចាន់ថុល អ្វីដែលក្រសួងធ្វើបានគឺមានតែការអំពាវនាវតែប៉ុណ្ណោះ។ បើក្រុមហ៊ុនអនុវត្តបាន ក្រសួងនឹងចូលរួម អបអរ ដោយចាត់ទុកថា ជាការចូលរួមជាមួយរាជរដ្ឋាភិបាល ក្នុងការជួយលើកស្ទួយជីវភាពប្រជាពលរដ្ឋកម្ពុជា។ ប៉ុន្តែបើក្រុមហ៊ុនមិនអនុវត្តតាមទេ ក្រសួងក៏គ្មានចំណាត់ការអ្វីដែរ។
បន្ថែពីលើការអំពាវនាវឲ្យរក្សាតម្លៃដឹកជញ្ជូន អាជ្ញាធរពាក់ព័ន្ធក៏បានស្នើទៅក្រុមហ៊ុនដឹកជញ្ជូនកុំផ្ទុកអ្នកដំណើរលើសចំណុះ និងបើកបរត្រូវគោរពច្បាប់។ ហើយប្រជាពលរដ្ឋ កម្មករ កម្មាការិនីខ្លួនឯងនឹងក៏មិនត្រូវជិះប្រជ្រៀតគ្នា ជិះរថយន្តដែលលើសចំណុះ ឬជិះលើដំបូលរថយន្តឈ្នួល ដើម្បីចៀសវៀសគ្រោះថ្នាក់កើតឡើងជាយថាហេតុ។
ផ្អែកតាមរបាយការណ៍របស់នាយកដ្ឋាននគរបាលចរាចរណ៍ និងសណ្ដាប់ធ្នាប់សាធារណៈនៃក្រសួងមហាផ្ទៃ គឺក្នុងរយៈពេលបីថ្ងៃនៃបុណ្យភ្ជុំបិណ្ឌកាលពីឆ្នាំ២០១៦មានមនុស្ស១៩នាក់បានស្លាប់។ ចំនួននេះគឺមានការថយចុះបើធៀបនឹងឆ្នាំ២០១៥។ តែទោះយ៉ាងណាក៏ដោយគ្រប់អ្នកពាក់ព័ន្ធនៅតែមានការព្រួយបារម្ភពីគ្រោះថ្នាក់ចរាចរណ៍ដែលងាយនឹងកើតមាននៅក្នុងពិធីបុណ្យជាតិសំខាន់ៗ៕