ដោយ កញ្ញា ខាន់ លក្ខិណា | ថ្ងៃព្រហស្បតិ៍ ទី១៩ ខែតុលា ឆ្នាំ២០១៧ | ម៉ោង 4:47 PM
http://vodhotnews.com
ប្រធានគណបក្សសង្គ្រោះជាតិ លោក កឹម សុខា (FB: លោក កឹម សុខា)
ប្រធានគណបក្សសង្គ្រោះជាតិលោក កឹម សុខា បានប្រាប់ឲ្យមន្ត្រីរបស់លោក មិនចាំបាច់ដាក់ឯកសារទៅតុលាការកំពូលនោះទេ ដោយថាបណ្ដឹងរបស់ក្រសួងមហាផ្ទៃប្ដឹងសុំរំលាយគណបក្ស នេះជារឿងនយោបាយ។
កាលពីថ្ងៃទី៩ ខែតុលាកន្លងទៅ តុលាការកំពូលបានបង្គាប់ឲ្យគណបក្សសង្គ្រោះជាតិដាក់ឯកសារត្រៀមឆ្លើយតបនឹងពាក្យសុំរំលាយគណបក្សសង្គ្រោះជាតិ ក្នុងអំឡុងពេល២០ថ្ងៃ គិតចាប់ពីថ្ងៃទី៩ ខែតុលា។
លោក សំ សុគង់ មេធាវីម្នាក់ ក្នុងចំណោមមេធាវី៧នាក់ដែលការពារក្តី លោក កឹម សុខា អះអាងថា កូនក្ដីបានប្រាប់ក្រុមមេធាវីថា គណបក្សសង្គ្រោះជាតិនឹងមិនដាក់ឯកសារត្រៀមទៅតុលាការកំពូល ដើម្បីតតាំងក្ដីជាមួយក្រុមមេធាវីក្រសួងមហាផ្ទៃនោះទេ ដោយសារការប្ដឹងរំលាយគណបក្សសង្គ្រោះជាតិនេះជារឿងនយោបាយ។
លោកថា៖ «រឿងនេះឯកឧត្ដមយល់ឃើញថា វាជារឿងនយោបាយ មិនមែនជារឿងទាក់ទងនឹងផ្លូវច្បាប់ អញ្ចឹងហើយឯកឧត្ដមថា មិនចង់ពឹងពាក់មេធាវី ឬក៏មិនផ្ទេរសិទ្ធិឲ្យមេធាវី ដើម្បីតតាំងនៅក្នុងសំណុំរឿងរបស់ក្រសួងមហាផ្ទៃនេះទេ ទុកឲ្យអ្នកនយោបាយជាអ្នកដោះស្រាយវិញ»។
ពាក់ព័ន្ធរឿងនេះ វីអូឌីមិនអាចទាក់ទងអ្នកនាំពាក្យតុលាការកំពូល លោក មុនី ជោគ បានទេ។ ប៉ុន្តែអ្នកពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា បើទោះបីជាគណបក្សប្រឆាំងមិនដាក់ឯកសារត្រៀម ក៏មិនបានប៉ះពាល់ដល់ដំណើររបស់តុលាការនោះដែរ។
លោកថា៖ «ត្រូវបាត់សិទ្ធិក្នុងការតតាំងនៅតុលាការ តាមពូយល់ម្នាក់ឯង ប៉ុន្តែយល់ល្អគួរតែតតាំងទៅរកមេធាវីតតាំងជជែកគ្នាទៅបើមិនចឹងទេតុលាការគេដំណើរតាមនីតិវិធីទៅ»។
កាលពីថ្ងៃទី៦ ខែតុលា ក្រុមមេធាវីការពារក្ដីឲ្យក្រសួងមហាផ្ទៃបានដាក់ពាក្យប្ដឹងសុំរំលាយគណបក្សសង្គ្រោះជាតិទៅតុលាការកំពូល ។ ការប្ដឹងសុំរំលាយគណបក្សសង្គ្រោះជាតិរបស់ ក្រសួងមហាផ្ទៃនេះ ធ្វើឡើងទៅតាមពាក្យបណ្ដឹងរបស់គណបក្សចំនួន២ ដែលគ្មានអាសនៈនៅក្នុងរដ្ឋសភាគឺ គណបក្សហ៊្វុនស៊ិនប៉ិចរបស់សម្ដេច ក្រុមព្រះ និងគណបក្សយុវជនកម្ពុជា របស់លោក ពេជ្រ ស្រស់៕