ដោយ កញ្ញា ខាន់ លក្ខិណា | ថ្ងៃចន្ទ ទី២៣ ខែតុលា ឆ្នាំ២០១៧ | ម៉ោង 4:17 PM
http://vodhotnews.com
ទីស្នាក់ការគណបក្សសង្គ្រោះជាតិ
មេឃុំនិងចៅសង្កាត់របស់គណបក្សសង្គ្រោះជាតិមួយចំនួន នៅថ្ងៃចន្ទនេះ បានប្រកាសជំហរថា ពួកគេនឹងមិនចុះចូលជាមួយគណបក្សប្រជាជនកម្ពុជា ដូចការថ្លែងរបស់លោកនាយករដ្ឋមន្ត្រីឡើយ បើទោះបីជាគណបក្សនេះត្រូវរំលាយ។
កាលពីថ្ងៃទី២២ខែតុលា ឆ្នាំ២០១៧ លោកនាយករដ្ឋមន្ត្រី ហ៊ុន សែន បានផ្ដាំទៅមេដឹកនាំតាមមូលដ្ឋានរបស់គណបក្សប្រឆាំង ឲ្យចុះចូលជាមួយគណបក្សកាន់អំណាច ប្រសិនបើពួកគេចង់រក្សាតំណែងរបស់ពួកគេ បន្ទាប់ពីគណបក្សប្រឆាំងត្រូវរំលាយ។
ពាក់ព័ន្ធរឿងនេះ ចៅសង្កាត់អូរចារ ក្នុងខេត្តបាត់ដំបង កញ្ញា ស៊ិន ចាន់ពៅរ៉ូហ្ស៊េត មានប្រសាសន៍ថា ទោះបីជាគណបក្សសង្គ្រោះជាតិត្រូវរំលាយ ក៏កញ្ញាមិនចុះចូលជាមួយគណបក្សប្រជាជន ដោយក្បត់ឆន្ទៈប្រជាពលរដ្ឋនោះទេ។
កញ្ញាមានប្រសាសន៍ថា «មិនថា ខ្ញុំនឹងក្រុមប្រឹក្សាដទៃទៀត គឺដាច់ខាត មិនចុះញ៉ម ឬមួយក៏មិនចុះចូលជាមួយសម្ដេចនាយកជាដាច់ខាត ពីព្រោះការបោះឆ្នោតខែមិថុនាឆ្នាំ២០១៧ កន្លងមក គឺជាការបោះឆ្នោតសមាមាត្រ មានន័យថា ប្រជាពលរដ្ឋបោះឆ្នោតឲ្យគណបក្ស។ ប្រសិនជាយើង ដែលបានជាប់ឆ្នោតហើយ បែបជាទៅចុះចូលទៅគណបក្សមួយ ដែលប្រជាពលរដ្ឋមិនពេញចិត្ត សំខាន់តំណាងពលរដ្ឋ គឺវាអស់តម្លៃ វាអត់មានតម្លៃអីសោះសម្រាប់ប្រជាពលរដ្ឋ»។
ចំណែកចៅសង្កាត់សាលាកំរើក ក្រុងសៀមរាប លោក ជិន សុខង៉េង លើកឡើងប្រហាក់ប្រហែលគ្នាថា តំណែងរបស់លោកបានបច្ចុប្បន្ន គឺកើតចេញពីការបោះឆ្នោតរបស់ប្រជាពលរដ្ឋ ដូចនេះ ទោះបីគណបក្សលោកត្រូវរំលាយ ក៏លោកមិនចុះចូលជាមួយបក្សកាន់អំណាចដែរ។
លោកមានប្រសាសន៍ថា «ខ្ញុំសូមបញ្ជាក់ថា ពួកយើងខ្ញុំគឺកើតចេញពីប្រជាពលរដ្ឋមិនមែនកើតចេញអំពីគណបក្សនយោបាយដែលលើកបណ្តុកទេ។ ដូច្នេះ ពួកខ្ញុំគឺតស៊ូដើម្បីប្រជាពលរដ្ឋ អ្វីដែលយើងត្រូវគិតនោះ គឺត្រូវគិតអំពីជីវិតភាពរស់នៅរបស់ប្រជាពលរដ្ឋ»។
លោក ជិន សុខង៉េង ចាត់ទុកការអំពាវនាវរបស់លោក ហ៊ុន សែន ថាគ្រាន់តែចង់បំបាក់ស្មារតីមន្ត្រីបក្សប្រឆាំងតែប៉ុណ្ណោះ ប៉ុន្តែលោក មិនខ្វល់ចំពោះរឿងនេះឡើយ។
នៅទីក្រុងភ្នំពេញឯនេះវិញ ចៅសង្កាត់បឹងទំពុនទី២ ខណ្ឌមានជ័យ លោក ជា សាម៉ន លើកឡើងដែរថា ប្រសិនបើគណបក្សសង្គ្រោះជាតិ ត្រូវរំលាយនោះ លោកសុខចិត្តទៅលក់បន្លែ ឬទៅធ្វើការងារផ្សេង ដោយមិនចុះចូលជាមួយគណបក្សកាន់អំណាចឡើយ។
លោកថា «សូមជម្រាបផងដែលថា បើទោះបីសល់១ម៉ោង សល់១វិនាទី នៃពេលវេលា បើគេមិនទាន់រំលាយ ខ្ញុំនឹងបម្រើប្រជាពលរដ្ឋក្នុងពេលដែលខ្ញុំមានតម្លៃ។ ដូច្នេះហើយ ជំហររបស់ខ្ញុំក្នុងនាមជាចៅសង្កាត់បឹងទំពុនទី២ ដាច់ខាន មិនលក់ក្បាល មិនលក់ឧត្ដមគិតក្បត់ឆន្ទៈប្រជាពលរដ្ឋនោះទេ»។
លោក សាម៉ន អំពាវនាវឲ្យមេឃុំ និងចៅសង្កាត់ទាំងអស់ ត្រូវប្រកាន់ជំហររឹងមាំ ដើម្បីបម្រើប្រជាពលរដ្ឋ បើទោះបីគណបក្សសង្គ្រោះជាតិ កំពុងទទួលរងគំនាបពីគណបក្សកាន់អំណាចក៏ដោយ។
ចំពោះ មន្ដ្រីជាន់ខ្ពស់នៃកម្មវិធីផ្នែកអង្កេតរបស់អង្គការខុមហ្វ្រែល លោក កន សាវាង្ស ចាត់ទុកការចូល ឬមិនចូលនេះ ថាជាការសម្រេចចិត្តរបស់មេឃុំនិងចៅសង្កាត់ទាំងនោះ ប៉ុន្តែលោកថា ប្រសិនបើជាពួកគេ ចុះចូលគណបក្សមួយ ដែលពលរដ្ឋមិនបានបោះឆ្នោតគាំទ្រ ថ្ងៃក្រោយ ពួកគេនឹងបាត់បង់ប្រជាប្រិយភាព។
លោកថា «សំខាន់យើងត្រូវយល់ ឃើញខ្លួនឯងថា តើតម្លៃ ឬក៏តំណែងរបស់អស់នឹងវាជាតម្លៃដែលយើងទទួលបានទេ ឬមួយតម្លៃគេប្រគល់ឲ្យ ឬមួយក៏ជាតម្លៃប្រជាពលរដ្ឋបោះឆ្នោត។ ចឹងក្រុមប្រឹក្សាគ្រប់រូប អាចពិចារណានឹងថា តើនៅពេលទៅខាងមុខតម្លែ ដែលខ្លួនទទួលបានវាទៅជាយ៉ាងណា»។
ទោះជាយ៉ាងណា អ្នកវិភាគ ធ្លាប់អះអាងថា គណបក្សហ៊្វុនស៊ិនប៉ិចរបស់សម្ដេច ក្រុមព្រះ ដែលឈ្នះគណបក្សប្រជាជនកម្ពុជា នៅអាណត្តិទី១ កន្លងមក ត្រូវបានអស់អាសនៈសភាវិញនៅឆ្នាំ២០០១៣ បន្ទាប់ពីគណបក្សនោះបែកបាក់ផ្ទៃក្នុង៕