គល់ឈើដែលទើបតែកាប់ថ្មីៗនៅក្នុងតំបន់ព្រៃអភិរក្សព្រះរកា។ សហការី
Tue, 24 October 2017
សុទ្ធ គឹមសឿន
ភ្នំពេញប៉ុស្តិ៍
ព្រះវិហារៈ ពលរដ្ឋរស់នៅឃុំប្រមេរុ ស្រុកត្បែងមានជ័យ បានចោទអាជ្ញាធរមូលដ្ឋាន និងមន្ត្រីពាក់ព័ន្ធថា បានបើកដៃឲ្យឈ្មួញចូលកាប់បំផ្លាញព្រៃឈើ នៅក្នុងតំបន់អភិរក្សព្រៃព្រះរកា ដោយមិនត្រឹមតែមិនមានចំណាត់ការទប់ស្កាត់ ថែមទាំងបានឃុបឃិតគ្នាប្រមូលលុយពីឈ្មួញដែលចូលទៅកាប់ឈើទៅវិញ។
អ្នកស្រី នួន ម៉ុន ទីប្រឹក្សាសហគមន៍ការពារព្រៃព្រះរកា រស់នៅឃុំប្រមេរុ ស្រុកត្បែងមានជ័យ បានឲ្យដឹងកាលពីម្សិលមិញថា ចាប់តាំងពីតំបន់ព្រៃព្រះរកា ត្រូវបានរដ្ឋាភិបាល បានចេញរាជក្រឹត្យ ឲ្យរក្សាព្រៃនេះ ជាតំបន់ព្រៃអភិរក្ស និងកន្លែងជម្រកសត្វព្រៃមក មានជនខិលខូចបានចូលមកកាប់បំផ្លាញព្រៃឈើទាំងតូច ទាំងធំ ស្ទើរជារៀងរាល់ថ្ងៃ ព្រមទាំងដឹកជញ្ជូនតាមរថយន្ត និងគោយន្ដផងដែរ។
អ្នកស្រីបន្តថា នៅពេលដែលក្រុមឈ្មួញចូលកាត់ឈើបង្ហាញមុខមាត់ខ្លាំងពេក អាជ្ញាធរបានចុះទៅទីតាំងនោះ ប៉ុន្ដែមិនបានឃាត់ខ្លួន ឬចាត់វិធានការទៅលើជនល្មើសនោះទេដោយគ្រាន់តែចូល ទៅប្រមូលលុយដាក់ហោប៉ៅរួចក៏ចេញមកវិញ ហើយខ្លះគ្រាន់តែយកគោយន្តទៅរក្សាទុកនៅប៉ុស្ដិ៍មួយយប់ រួចក៏ប្រគល់ឲ្យជនល្មើសវិញ។
អ្នកស្រីបញ្ជាក់ថា៖«អាជ្ញាធររាល់ថ្ងៃហ្នឹង មិនដឹងជាធ្វើការរបៀបណាទេ បើឃើញតែគេចូលកាប់ឈើនៅក្នុងព្រៃព្រះរកាហ្នឹង អាជ្ញាធរពេលឃើញឈ្មួញកាត់ឈើ គគ្រឹកគគ្រេងពេក ក៏បានចុះទៅចាប់ឡានមួយយកទៅទុកនៅប៉ុស្ដិ៍មួយយប់រួចប្រគល់ឲ្យគេវិញ»។
អ្នកស្រីសាំ ស៊ីងពលរដ្ឋរស់នៅឃុំប្រមេរុ ក៏បានឲ្យដឹងដែរថា៖«ខ្ញុំសុំនិយាយជារួមថា ឈ្មួញដែលចូលកាប់ព្រៃឈើនៅតំបន់ព្រៃព្រះរកានោះគឺនៅពេលដែលគេឃើញប៉ូលិសឬអាជ្ញាធរចូលទៅគេសប្បាយចិត្តទៅវិញទេ ដោយគ្រាន់តែដាក់លុយតិចតួចទៅ ជាការស្រេច។ ប៉ុន្ដែបើគេឃើញប្រជាសហគមន៍ចូលទៅគឺក្រុមឈ្មួញហ្នឹងគេខ្លាចដូចខ្លាអ៊ីចឹង គឺគេរត់អស់ហើយ។ អ៊ីចឹងមានន័យថា អាជ្ញាធរគេអត់ខ្លាចទេ គឺគេខ្លាចតែពលរដ្ឋសហគមន៍យើងទេ»។
លោក យឿន ឌីនិត្យ សមាជិកកម្មវិធីអភិវឌ្ឍន៍ធនធានយុវជន (YRDP)ដែលបានដឹកនាំយុវជនជាង ២០នាក់ចុះទៅ តំបន់អភិរក្សព្រៃព្រះរការយៈពេល២ថ្ងៃ បានប្រាប់ភ្នំពេញប៉ុស្ដិ៍ថា ក្រុមរបស់លោក បានចុះដល់ទីតាំងព្រៃព្រះរកាផ្ទាល់ ដោយបានឃើញទិដ្ឋភាពការកាប់បំផ្លាញព្រៃឈើដ៏គួរឲ្យសោកស្ដាយបំផុត។ «ពេលខ្ញុំទៅដល់តំបន់នោះ ខ្ញុំបានសួរនាំពលរដ្ឋដែលរស់នៅតំបន់នោះ ពួកគាត់បានប្រាប់ថា អាជ្ញាធរនៅតំបន់នោះ អសកម្មចំពោះសកម្មភាពបំផ្លាញព្រៃឈើ ដោយពួកគាត់គ្រាន់តែដើរប្រមូលលុយមួយភ្លែត ក៏ចេញមកវិញ ប្រគល់ឲ្យឈ្មួញកាប់បន្តទៀតហើយសកម្មភាពកាប់ឈើនេះ ភាគច្រើនគេកាប់នៅពេលយប់»។
លោក ឃុល អ៊ី នាយប៉ុស្ដិ៍ប្រមេរុ បានបដិសេធធ្វើអធិប្បាយដោយថ្លែងថាជាប់រវល់។
លោកពីង ទ្រីដា ប្រធានមន្ទីរកសិកម្មរុក្ខាប្រមាញ់ និងនេសាទខេត្តព្រះវិហារ បានថ្លែងកាលពីម្សិលមិញថា លោកមិនបានដឹងព័ត៌មាននេះច្បាស់ទេ ប៉ុន្ដែលោកអះអាងថាមិនមានឈ្មួញមកពីខាងណា ទៅកាប់ឈើនៅទីនោះទេ ដោយគ្រាន់តែមានប្រជាពលរដ្ឋក្រីក្រ ចូលកាប់ឈើបន្ដិចបន្តួចយកមកសាងសង់ផ្ទះប៉ុណ្ណោះ។ «ខ្ញុំដូចមិនច្បាស់ដែរ ប៉ុន្ដែដូចមិនមានអ្នកពីក្រៅណាមកកាប់ទេ មានតែពលរដ្ឋក្នុងភូមិហ្នឹងគាត់កាប់តិចតួចយកទៅធ្វើជាផ្ទះទេ»។
លោកប៉ិក សោភ័ណ ប្រធានសម្របសម្រួលផ្នែកតស៊ូមតិរបស់អង្គការពន្លកខ្មែរ បានឲ្យដឹងថា ព្រៃព្រះរកា ឃើញមានឈ្មួញចូលកាប់ជាហូរហែប៉ុន្ដែមិនមានវិធានការអ្វីពីអាជ្ញាធរទេ។
លោកបញ្ជាក់ថា៖«បើតាមមើលសកម្មភាពអភិរក្សព្រៃតំបន់នោះ បើពឹងទៅលើអាជ្ញាធររក្សាព្រៃនោះ ព្រៃនោះ នឹងរលាយនាពេលឆាប់ខាងមុខនេះ ប៉ុន្ដែសព្វថ្ងៃ បានប្រជាសហគមន៍ការពារ ទើបបានសល់ព្រៃបន្ដិចបន្តួចនេះ»។
បណ្ដាញសហគមន៍ការពារព្រៃឈើ នៅខេត្តព្រះវិហារ បានអំពាវនាវ ឱ្យមន្ត្រីរដ្ឋាភិបាល និងជំនាញពាក់ព័ន្ធជួយចាត់វិធានការជាបន្ទាន់ ដើម្បីទប់ស្កាត់សកម្មភាពកាប់បំផ្លាញព្រៃឈើនៅក្នុងព្រៃព្រះរកាយកទៅជួញដូរខុសច្បាប់ដែលកំពុងកើនឡើងជារៀងរាល់ថ្ងៃ។
ប្រធានមន្ទីរបរិស្ថានខេត្តព្រះវិហារ លោក អ៊ា សុខា មិនអាចទាក់ទងសុំអធិប្បាយបានទេ។
ព្រៃព្រះរកាមានទំហំដីជិត ១០ ម៉ឺនហិកតា ត្រូវបានរដ្ឋាភិបាល ចេញព្រះរាជក្រឹត្យ ដាក់ជាតំបន់អភិរក្សកាលពីឆ្នាំ ២០១៦ ក្នុងភូមិសាស្ត្រប្រជុំស្រុកចំនួន ៣ នៃខេត្តព្រះវិហារ គឺជាតំបន់ព្រៃស្រោង និង ជាដែនជម្រកសត្វព្រៃដែល នៅសេសសល់ចុងក្រោយក្នុងប្រទេសកម្ពុជា៕
Contact author: សុទ្ធ គឹមសឿន