រថយន្តកែច្នៃទាក់ទាញចំណាប់អារម្មណ៍មនុស្សម្នាតាមផ្លូវឲ្យជាវម៉ាំល្ហុងម្នាក់ៗពីរបីថង់។ ហ្វេសប៊ុក
Tue, 24 October 2017
ប៉ាន់ រិទ្ធា
ភ្នំពេញប៉ុស្តិ៍
ភ្នំពេញៈ ថ្មីៗនេះ បុរសជាអ្នកលក់ម៉ាំល្ហុងដែលធ្លាប់បានប្រើម៉ូតូជិះឆ្វែលដឹកម៉ាំទៅលក់នៅតាមទីប្រជុំជននានានៅពេញទីក្រុងភ្នំពេញ អមដោយឧបករណ៍បំពងសំឡេង និងតុបតែងកាយពាក់អាវធំកាលីបដូចតារាល្បី បានអភិវឌ្ឍខ្លួនមួយកម្រិតទៀតជារថយន្តប្រើគំនិតកែច្នៃថ្មីកាន់តែទាក់ទាញខ្លាំងជាងមុន នៅក្នុងមុខរបរចាស់ ដែលបានចាប់ផ្តើមតាំងពីឆ្នាំ ២០០៨ មកនោះ។
ជាមួយមធ្យោបាយលក់ម៉ាំល្ហុងគឺប្រើរថយន្តកែច្នៃថ្មីមានឡូហ្គោខាងមុខម៉ាករ៉ុលរ៉យ និងតួរថយន្តលាបពណ៌លឿងស្រស់ ដែលនៅខាងក្រោយមានកញ្ចក់ថ្លាសម្រាប់ដាក់ម៉ាំល្ហុងឲ្យបានកាន់តែច្រើនជាងមុននោះ ឃើញថា បងប្អូនខ្មែរ ដែលធ្លាប់ជាម៉ូយទិញម៉ាំល្ហុងលោក ម៉ៅ បូរ៉ា ក៏មានការភ្ញាក់ផ្អើលចាប់អារម្មណ៍ជាខ្លាំង។
លោក ម៉ៅ បូរ៉ា ដែលកាលពីដំបូង បណ្តើរកង់កញ្ចាស់តុបតែងដោយផ្កាជ័រពណ៌ក្រហម ចងដោយក្រមាដឹកម៉ាំល្ហុង និងស្ពៃជ្រក់ ពពាយនាយលក់នៅតាមទីប្រជុំជន ពេញទីក្រុងភ្នំពេញក្រោយមកក៏ឡើងកាលីបជិះម៉ូតូ និងរ៉ឺម៉កកង់បី និងជាចុងក្រោយនេះ បានប្រើរថយន្តកែច្នៃចំណាយទុនអស់ជាង ៥០០០ ដុល្លារ ប្រាប់ភ្នំពេញប៉ុស្តិ៍ថា៖ «ដោយសារតែចង់បង្កើនប្រាក់ចំណូលពីរបរលក់ម៉ាំល្ហុងនេះ ឲ្យបានច្រើនជាងមុន ទើបគេងរកគំនិតកែច្នៃធ្វើយ៉ាងណាអាចដាក់ម៉ាំល្ហុងបានច្រើន ហើយធ្វើឲ្យបងប្អូនអ្នកទិញម៉ាំល្ហុងខ្ញុំចាប់អារម្មណ៍នោះ ក៏ឃើញគំនិតទិញតួរថយន្តចាស់ ឥតដំបូលដែលគេប្រើសម្រាប់បើកដឹកភ្ញៀវតាមសណ្ឋាគារ តម្លៃជាង ២០០០ ដុល្លារ មកកែច្នៃបន្ថែមដោយទិញដែកមកផ្សារខ្លួនឯង និងយកទៅឲ្យជាងបាញ់សាច់ស្មាច់ជាខោអាវព័ទ្ធជុំវិញតួរថយន្តអស់តម្លៃជិត ២០០០ ដុល្លារ បូកផ្សំនឹងការចំណាយផ្សេងៗទៀតសរុបអស់ជាង ៥០០០ ដុល្លារ»។
លោក បូរ៉ា បានបន្ថែមថា៖ «ខ្ញុំយល់ថា បើខ្ញុំគ្មានគំនិតច្នៃធ្វើអ្វីឲ្យប្លែកដើម្បីទាក់ទាញគេទេ របរលក់ម៉ាំល្ហុងរបស់ខ្ញុំ ក៏នឹងមិនកើនឡើងជាងមុនដែរ ដូច្នេះហើយបានជាខ្ញុំនឹកឃើញសម្រេចយកស្លាកខាងមុខនៃរថយន្តរ៉ុលរ៉យដែលជាម៉ាកល្បី និងថ្លៃមកកែច្នៃជារថយន្តលក់ម៉ាំល្ហុងខ្ញុំតែម្តង»។
លោកបន្តថា៖ «រថយន្តនេះដំណើរលក់ដឹកម៉ាំលក់បានជិតមួយខែ ហើយក៏ឃើញថាទាក់ទាញអារម្មណ៍បងប្អូនអ្នកទិញច្រើនមែន គឺថា យ៉ាងហោចណាស់ពេលបងប្អូនដែលចោមរោមមើលឡានខ្ញុំ ក៏បានឆ្លៀតទិញម៉ាំពីរបីកញ្ចប់ដែរ»។
លោក ម៉ៅ បូរ៉ា បានលក់ម៉ាំនៅក្រុងភ្នំពេញបានជិត ១០ ឆ្នាំ ហើយក៏ជារបរតពីម្តាយមកជាង ២០ ឆ្នាំដែរ។ ក្រៅពីចំណូលលក់ដូរមួយខែបានពី ៤០០ ទៅ ៥០០ ដុល្លារ អ្នកស្រុកកោះអណ្តែត ខេត្តតាកែវ រូបនេះ ក៏មានវត្តមានលើវិថីសិល្បៈដូចជាការថតកុន ស្ប៉ត និងថត MV ខារ៉ាអូខេឲ្យហង្សមាសជាដើម៕
ពេលរាត្រី រថយន្តរ៉ុលរ៉យលក់ម៉ាំលេងភ្លើងភ្លឺចិញ្ចាច។ ហ្វេសប៊ុក