ដោយ លោក ហ៊ុន សិរីវឌ្ឍន៍ | ថ្ងៃអង្គារ ទី២៤ ខែតុលា ឆ្នាំ២០១៧
http://vodhotnews.com
អតីតឧបនាយករដ្ឋមន្រ្តីកូតាគណបក្សហ្វ៊ុនស៊ិនប៉ិច លោក លី ឡាយស្រេង
រដ្ឋាភិបាលកម្ពុជាសម្រេចដាក់ពាក្យប្តឹងលោក លឺ ឡាយស្រេង ទៅតុលាការដោយថាបានបរិហាកេរ្តិ៍បក្សប្រជាជនជាសាធារណៈចំពោះខ្លឹមសារដែលលោកបានសន្ទនាឯកជនតាមទូរសព្ទ ហើយបានបែកធ្លាយតាមរយៈប្រព័ន្ធទំនាក់ទំនងសង្គមនាពេលថ្មីៗនេះ។
សំឡេងសន្ទនាតាមទូរសព្ទរវាងលោក លឺ ឡាយស្រេង អតីតរដ្ឋមន្ត្រីក្រសួងព័ត៌មាន និងក្រសួងអភិវឌ្ឍន៍ជនបទមកពីកូតាគណបក្សហ៊្វុនស៊ិនប៉ិច ជាមួយអតីតតំណាងរាស្ត្រគណបក្សហ្វ៊ុនស៊ិនប៉ិច លោកស្រី គី លំអង ត្រូវបានទម្លាយកាលពីថ្ងៃទី២១ ខែតុលានេះ នៅលើទំព័រហ្វេសប៊ុក «សីហា» ជាបណ្ដាញសង្គមមួយ ដែលធ្លាប់បានទម្លាយសំឡេងសន្ទនាឯកជនក្រុមមេដឹកនាំជាន់ខ្ពស់បក្សប្រឆាំងនាពេលកន្លងមក។
សំឡេងសន្ទនាតាមទូរស័ព្ទរវាងលោក លឺ ឡាយស្រេង និងលោកស្រី គី លំអង ត្រូវបានទម្លាយ បន្ទាប់ពីមានការចោទសួរថា តើព្រះមហាក្សត្រ ព្រះករុណា នរោត្ដម សីហមុនី នឹងឡាយព្រះហស្ថលេខាលើសំណើកែរប្រែច្បាប់៤ ពាក់ព័ន្ធនឹងការបោះឆ្នោត ឬយ៉ាងណា។
ថ្លែងជាមួយអ្នកសារព័ត៌មានបន្ទាប់ពីដាក់ពាក្យប្តឹងលោក លឺ ឡាយស្រេង ទៅសាលាដំបូងរាជធានីភ្នំពេញ នៅរសៀលថ្ងៃទី២៤ តុលានេះ មេធាវីតំណាងរដ្ឋាភិបាលលោក គី តិច បានឲ្យដឹងថាលោកទាមទារឲ្យតុលាការផ្តន្ទាទោសលោក លឺ ឡាយស្រេងតាមផ្លូវច្បាប់ និងទារសំណងជាង១២ម៉ឺនដុល្លារ។ លោកបន្ថែមថា ការនិយាយបរិហាររិះគន់តាមទូរសព្ទជាលក្ខខណៈឯកជនក៏ដោយ ប្រសិនជាសំឡេងនោះត្រូវបានគេផ្សព្វផ្សាយជាសាធារណៈសំឡេងគឺស្មើនឹងការនិយាយបរិហារជាសារធាណៈ។
លោកថា៖ «សំខាន់យើងផ្តោតលើសំឡេងរបស់គាត់ គាត់និយាយចឹងមែន ទោះបីផ្សាយតាមផេកណាក៏ដោយ ប៉ុន្តែសំឡេងដែលយើងស្តាប់គឺសំឡេងរបស់លោក លឺ ឡាយស្រេងសន្ទនាជាមួយលោកជំទាវ គី លំអង។ … ប្អូនជាអ្នកសារព័ត៌មានក៏ដោយប្រសិនជាប្អូននិយាយតាមណាក៏ដោយតាមទូរស័ព្ទតាមណាក៏ដោយបើសិនជាប្អូននិយាយទៅវាប៉ះពាល់ទៅលើបុគ្គលណាមួយដែលគេមិនបានធ្វើ ប្អូនបានចោទគេធ្វើអាហ្នឹងប្អូនមានកំហុសហើយ»។
អ្នកនាំពាក្យសាលារដំបូងរាជធានីភ្នំពេញលោក លី សុផាណា បានឲ្យដឹងតាមរយៈសាអេឡិចត្រូនិចតេលេក្រាមថាសំណុំរឿងនេះអយ្យការបានទទួលពាក្យបណ្តឹងរួចហើយនិងកំពុងបន្តចំណាត់ការតាមនីតិវិធី។
ទាក់ទងនឹងករណីនេះផងដែរលោកមេធាវីសុក សំអឿន យល់ថា ការចោទប្រកាន់ដោយសំអាងទៅការបែកធ្លាយសំឡេងនោះគឺមិនត្រឹមត្រូវនោះទេប្រសិនជាផ្សព្វផ្សាយនោះគ្មានការអនុញ្ញាត្តិពីម្ចាស់សាម៉ី។
លោកថា៖ «វាទាល់តែរដ្ឋាភិបាលមានភស្ភុតាងណាដែលបង្ហាញថាគាត់អនុញ្ញាតឲ្យគេផ្សព្វផ្សាយ។ … អញ្ចឹងមនុស្សនិយាយគ្រប់គ្នាគេចង់ដាក់គុកនណារគេថតសំឡេងចោតគេជាប់គុកពេញទឹកពេញដីអស់ហើយស្រេចចិត្តគេ។ ដូច្នេះទាល់តែអ្នកហ្នឹងឲ្យគេផ្សព្វផ្សាយ»។
ដោយយោងតាមកម្មវត្ថុដូចគ្នានៃការប្តឹងលោក លឺ ឡាយស្រេង ពីសំណាក់រដ្ឋាភិបាលនេះគណបក្សហ៊្វុនស៊ិនប៉ិចក៏កំពុងពិចារណាប្តឹងលោកផងដែរដោយថាលោក លឺ ឡាយស្រេងប្រមាថដល់ព្រះមហាក្សត្រ។
បន្ថែមពីលើប្តឹងលោក លឺ ឡាយស្រេង នេះ ក្រសួងយុត្តិធម៌នៅថ្ងៃនេះក៏បានធ្វើសំណើទៅកាន់តុលាការនៃសាលាដំបូងរាជធានីភ្នំពេញផងដែរ ដោយស្នើដល់តុលាការចាត់វិធានការផ្លូវច្បាប់ជាបន្ទាន់ និងតឹងរឹងបំផុតផងដែរ។
អ្នកជំនាញផ្នែកព័ត៌មានវិទ្យាលោក ង៉ែត ម៉ូសេ យល់ថាភស្ភុតាងណាដែលត្រូវបានគេយកដោយរូបភាពមិនស្របច្បាប់នោះគឺមិនអាចត្រូវបានគេយកជាភស្ភុតាងបាននោះទេ។ លោកបន្ថែមថា ការសន្ទនាតាមទូរស័ព្ទគឺជាភាពឯកជនរបស់បុគ្គលម្នាក់ៗ ហើយការចូលទៅយកសំឡេងសន្ទនាឯកជននេះគឺជាការបំពានទៅលើភាពឯកជនរបស់មនុស្ស ហើយរដ្ឋាភិបាលគួរមានវិធានការលើការជ្រៀតចូលក្នុងភាពឯកជននេះ។
សំណើវិសោធនកម្មច្បាប់៤នោះ ត្រូវបានក្រុមតំណាងរាស្ត្របក្សកាន់អំណាចអនុម័តនៅដើមសប្ដាហ៍មុន ហើយកំពុងស្ថិតនៅក្នុងដៃស្ថាប័នក្រុមប្រឹក្សាធម្មនុញ្ញ មុននឹងបញ្ជូនទៅព្រះមហាក្សត្រឡាយព្រះហស្ថលេខា ដើម្បីចូលជាធរមាន។
សំណើវិសោធនកម្មច្បាប់ទាំង៤នេះ ត្រូវបានក្រុមអ្នកវិភាគចាត់ទុកជាការប៉ុនប៉ង ដើម្បីឈានទៅរំលាយគណបក្សប្រឆាំង និងបែងចែកអាសនៈសភារបស់គណបក្សនេះ ទៅឲ្យគណបក្សតូចៗ ក្នុងនោះមានទាំងគណបក្សហ៊្វុនស៊ិនប៉ិចផងដែរ៕