ដោយ អាស៊ីសេរី
2017-10-30
និមិត្តសញ្ញាអាស៊ីសេរី។ Photo: RFA
កម្មករជិត២០នាក់របួសក្នុងហេតុការណ៍ផ្ទុះឡចំហាយនៅរោងចក្រផលិតអំបោះឈ្មោះ គ័ងស៊ីង ក្នុងសង្កាត់ចោមចៅ នៅព្រឹកថ្ងៃទី៣០ ខែ តុលា។
សារព័ត៌មានក្នុងស្រុកជាច្រើនបានរាយការណ៍ថា ហេតុការណ៍ដែលកើតឡើងកាលពីម៉ោង៩ព្រឹក នៅក្នុងរោងចក្រ ដែលមានទីតាំងក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យនោះ បានធ្វើអោយកម្មកររបួសចំនួន១៩នាក់ ក្នុងមាន៤នាក់របួសធ្ងន់។
ប្រភពព័ត៌មានក្នុងស្រុកក៏បានដកស្រង់ ការអះអាងរបស់សមត្ថកិច្ចដែលថា ឡចំហាយនៅក្នុងរោងចក្រគ័ងស៊ីង បានផ្ទុះដោយកម្លាំងខ្លាំង បានខ្ទាតទៅដល់រោងចក្រ និងអាគារក្រុមហ៊ុននៅក្បែរនោះ ហើយបានធ្វើអោយកម្មករនៅទីនោះរបួសដែរ គឺរោងចក្រ ហ្វុងស៊ីន និងក្រុមហ៊ុន តាំង ផេងប៉ោ។ ក្នុងចំណោមអ្នកទាំង១៩នាក់ដែលរបួសនោះ គឺមានទាំងអ្នកធ្វើការនៅរោងចក្រគ័ងស៊ីង រោងចក្រហ្វុងស៊ីន និងក្រុមហ៊ុន តាំង ផេងប៉ោ។
រហូតមកដល់ល្ងាចថ្ងៃដដែលនេះ គឺពុំទាន់មានការអះអាងពីមូលហេតុពិតប្រាកដនៃការផ្ទះឡចំហាយនោះទេ បើទោះបីជាមន្ត្រីតាមបណ្ដាមន្ទីរជំនាញមួយចំនួនបានទៅដល់ទីតាំងរោងចក្រនេះតាំងពីព្រឹកហើយក្ដី។ ក្នុងនោះរួមមានមន្ត្រីនៃមន្ទីរការងារ មន្ទីរឧស្សាហកម្ម និងសិប្បកម្មជាដើម។
ក្នុងឆ្នាំ២០១៧នេះ មានករណីផ្ទុះឡចំហាយនៅតាមរោងចក្រជាច្រើនករណី បានកើតឡើងក្នុងនោះក៏មានករណីខ្លះដែលបណ្ដាលអោយមានមនុស្សស្លាប់ផង។ ក្រុមសហជីពកម្មករនៅតែមានចម្ងល់ចំពោះការកើតឡើងនូវហេតុការណ៍ទាំងនោះ ដ្បិតតែពុំមានការបំភ្លឺជាផ្លូវការពីមន្ត្រីជំនាញពីមូលហេតុណាមួយឡើយ។
រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ កាលពីខែមេសា បានចេញសេចក្ដីណែនាំដល់ម្ចាស់សហគ្រាសកាត់ដេរសំលៀកបំពាក់ និងដេរស្បែកជើងទាំងអស់ ឲ្យអនុវត្តវិធានការ ៩ចំណុច ដើម្បីប្រតិបត្តិការឡចំហាយឲ្យមានសុវត្ថិភាព និងបង្ការហានិភ័យនៃការផ្ទុះជាយថាហេតុ៕