ដោយ មួង ណារ៉េត
2017-12-08
RFA
សមាជិកសភាគណបក្សប្រជាជនកម្ពុជា លើកដៃគាំអនុម័តសេចក្ដីស្នើវិសោធនកម្មច្បាប់ស្ដីពីគណបក្សនយោបាយ នៅក្នុងកិច្ចប្រជុំសភាវិសាមញ្ញ នៅព្រឹកថ្ងៃទី២០ ខែកុម្ភៈ ឆ្នាំ២០១៧។ Photo: RFA
គណបក្សប្រជាជនកម្ពុជា បានអាសនៈក្នុងរដ្ឋសភា ១១បន្ថែមទៀត ដោយសារតែលោក ហ៊ុន សែន ធ្វើច្បាប់បន្ថែមដើម្បីយកអាសនៈបក្សប្រឆាំងក្រោយត្រូវបានរម្លាយ។ អាសនៈបន្ថែមនេះ គឺបានមកពីការដកហូតពីគណបក្សសង្គ្រោះជាតិ ដែលត្រូវបានគណបក្សប្រជាជនកម្ពុជា រម្លាយបានសម្រេចកាលពីថ្ងៃទី១៦ ខែវិច្ឆិកា ឆ្នាំ២០១៧។
រដ្ឋសភានៅថ្ងៃទី៧ ខែធ្នូ នេះ បានប្រគល់អាសនៈទាំង ១១នេះ ទៅគណបក្សកាន់អំណាចក្រោយពីអាសនៈចំនួន ៤៤ទៀតរបស់បក្សប្រឆាំង ត្រូវចែកទៅឲ្យគណបក្សបីផ្សេងទៀតដែលមិនជាប់ឆ្នោតសូម្បីតែមួយកៅអីក្នុងការបោះឆ្នោតជាតិកាលពីឆ្នាំ២០១៣។
អាសនៈរបស់គណបក្សសង្គ្រោះជាតិពីរក្នុងចំណោមអាសនៈទាំង ១១ ដែលចែកឲ្យគណបក្សប្រជាជនកម្ពុជា ត្រូវបានប្រគល់ឲ្យតំណាងរាស្ត្រគណបក្សសង្គ្រោះជាតិ ពីររូប មួយរូបគឺលោក វ៉ាន សំអឿន ដែលបានចុះចូលគណបក្សកាន់អំណាច កាលពីខែកុម្ភៈ ឆ្នាំ២០១៥ និងមួយរូបទៀតគឺលោក ឡុង ប៊ុន្នី ដែលបានទៅចូលជាមួយបក្សកាន់អំណាចជាងពីរសប្តាហ៍មុនការរម្លាយបក្សប្រឆាំង។
រដ្ឋសភាក៏បានប្រកាសសុពលភាពសមាជិកថ្មីបីរូប ជំនួសសមាជិក គ.ប.ជ ពីខាងគណបក្សប្រឆាំងដែលបានប្រកាសលាឈប់ក្រោយរម្លាយបក្សប្រឆាំង។ សមាជិកថ្មីទាំងបីរូបនេះ រួមមានលោក នុត សុខុម មកពីគណបក្សហ្វ៊ុនស៊ិនប៉ិច ទទួលតំណែងអនុប្រធាន គ.ជ.ប និងតំណែងសមាជិកសម្រាប់លោក ហ៊ែល សារ៉ាត់ មកពីគណបក្សសញ្ជាតិកម្ពុជា ជាសមាជិក និងលោក ឌឹម សុវណ្ណារុំ មកពីសាលាក្តីខ្មែរក្រហមដែលគេដឹងថាជាមនុស្សរបស់គណបក្សកាន់អំណាច៕