ដោយ កញ្ញា ខាន់ លក្ខិណា | ថ្ងៃព្រហស្បតិ៍ ទី២៥ ខែមករា ឆ្នាំ២០១៨
http://vodhotnews.com
លោកនាយករដ្ឋមន្ត្រី ហ៊ុន សែន ក្នុងដំណើរបំពេញទស្សនកិច្ចផ្លូវការក្នុងប្រទេសឥណ្ឌា (FB: លោក ហ៊ុន សែន)
លោកនាយករដ្ឋមន្ត្រី ហ៊ុន សែន ណែនាំក្រសួងប្រៃសណីយ៍ និងទូរគមនាគមន៍ ឲ្យរៀបចំប្រព័ន្ធបច្ចេកវិទ្យាដូចប្រទេសឥណ្ឌា ដោយលោកថា ដើម្បីជួយជំរុញការកសាង និងអភិវឌ្ឍន៍ប្រទេសជាតិឲ្យរីកចម្រើនកាន់តែឆាប់រហ័ស។
នៅលើទំព័រហ្វេសប៊ុកផ្លូវការរបស់លោកកាលពីថ្ងៃម្សិលមិញនេះ លោក ហ៊ុន សែន បានជួបពិភាក្សាជាមួយរដ្ឋមន្ត្រីក្រសួងអេឡិចត្រូនិច និងបច្ចេកវិទ្យាឥណ្ឌា លោក រ៉ាវី សាំងការ ប្រាសាដ ដែលប្រាប់មេដឹកនាំកម្ពុជាអំពីការប្រើប្រាស់បច្ចេកវិទ្យាសម្រាប់គ្រប់គ្រងទិន្នន័យក្នុងវិស័យសុខាភិបាល ពាណិជ្ជកម្ម អប់រំ និងវិស័យកសិកម្ម។
បន្ទាប់ពីជំនួបនោះ លោក ហ៊ុន សែន បានណែនាំទៅក្រសួងប្រៃសណីយ៍ និងទូរគមនាគមន៍កម្ពុជា ឲ្យស្វែងរកកិច្ចសហការជាមួយភាគីឥណ្ឌា ដើម្បីរៀបចំប្រព័ន្ធគ្រប់គ្រងទិន្នន័យបែបឌីជីថលនៅកម្ពុជា ដោយថា បច្ចេកវិទ្យាឥណ្ឌា អាចជួយដល់កសិករក្នុងការជ្រើសរើសប្រភេទជី ដី សម្រាប់ធ្វើស្រែចំការទទួលបានទិន្នផលខ្ពស់ និងអាចជួយរកទីផ្សារឲ្យកសិករផងដែរ។
លោក ហ៊ុន សែន បានលើកឡែងបែបនេះ អំឡុងពេលលោកស្ថិតក្នុងដំណើរបំពេញទស្សនកិច្ចផ្លូវការរយៈពេល ៣ថ្ងៃនៅក្នុងប្រទេសឥណ្ឌា៕