ដោយ លោក ហ៊ុន សិរីវឌ្ឍន៍ | ថ្ងៃសុក្រ ទី២៦ ខែមករា ឆ្នាំ២០១៨
http://vodhotnews.com
កម្ពុជាគ្រោងធ្វើសមយុទ្ធយោធា«នាគមាស»ជាលើកទីពីរ នៅក្នុងខែមីនាឆ្នាំ២០១៨នេះ ដើម្បីអបអរខួបអនុស្សាវរីយ៍លើកទី៦០ នៃទំនាក់ទំនងការទូតរវាងកម្ពុជា-ចិន និងដើម្បីជំរុញកិច្ចសហប្រតិបត្តិការយុទ្ធសាស្រ្តគ្រប់ជ្រុង ជ្រោយរវាងប្រទេសទាំងពីរ។
យោងតាមហ្វេសបុកនាយកដ្ឋានព័ត៌មាន និងសេវាកម្មយោធារបស់ក្រសួងការពារជាតិបាន បានដកស្រង់ការថ្លែង របស់អគ្គមេបញ្ជាការរង នៃកងយោធពលខេមរភូមិន្ទលោក ឥត សារ៉ាត់ ថា សមយុទ្ធកម្ពុជាចិនជាលើកទី២នេះនឹងធ្វើឡើងក្នុងអំឡុងខែមីនាឆ្នាំ២០១៨នេះ ដោយជ្រើសយកបញ្ជាការដ្ឋាន ការពារកោះឆ្នេរ និងវិទ្យាស្ថានកង ទ័ពជើងគោក នៅក្នុងស្រុកភ្នំស្រួច ខេត្តកំពង់ស្ពឺ។
លោកបន្ថែមថា ប្រធានបទលំហាត់រវាងកងយោធពលខេមរភូមិន្ទ និងកងទ័ពរំដោះប្រជាជនចិន នៅឆ្នាំនេះគឺផ្តោតលើ បេសកកម្មប្រឆាំងភេរវកម្ម និងការងារមនុស្សធម៌ ដោយកម្ពុជាមានកម្លាំងចូលរួមក្នុងលំហាត់នេះ២៨០នាក់ ហើយចិនមានចំនួន ១៩០នាក់។
គួររំលឹកផងដែរថា សមយុទ្ធប្រចាំឆ្នាំ «ឆ្មាំអង្គរ» ដែលធ្លាប់ធ្វើចំនួន៧ឆ្នាំជាប់គ្នាជាមួយសហរដ្ឋអាមេរិក និងសមយុទ្ធ«ដោនគោព្រៃ» ដែលធ្លាប់ធ្វើជាមួយអូស្ត្រាលី ត្រូវបានកម្ពុជាសុំផ្អាកចាប់តាំងពីឆ្នាំ២០១៧មកដល់ពេលនេះដោយលើកហេតុផលថាដើម្បីត្រៀមរៀបចំសណ្តាប់ធ្នាប់ដល់ការបោះឆ្នោតឆ្នាំ២០១៧និង២០១៨។ តែអ្វីដែលគួរឲ្យចាប់អារម្មណ៍គឺកម្ពុជាបន្តសមយុទ្ធជាមួយចិនជាបន្តបន្ទាប់ បន្ទាប់ពីផ្អាកសមយុទ្ធជាមួយប្រទេសទាំងពីរនេះ។
សាស្ត្រាចារ្យវិទ្យាសាស្ត្រនយោបាយលោក ឯម សុវណ្ណារ៉ា ធ្លាប់លើកឡើងប្រាប់វីអូឌីកាលពីឆ្នាំ២០១៧ថាការការផ្អាកសមយុទ្ធយោធានេះ វាបានបង្ហាញថាកម្ពុជាខ្វះលទ្ធភាពក្នុងការសហប្រតិបតិ្តការ និងរៀបចំកម្លាំងរបស់ខ្លួន ហើយការដកសមយុទ្ធយោធានេះវាបានធ្វើឲ្យការបង្កើនសន្តិសុខក្នុងតំបន់អាស៊ីគឺហាក់បីដូចជាឃ្លាតឆ្ងាយពីកម្ពុជា ខណៈដែលកម្ពុជាត្រូវបានគេមើលឃើញថាកំពុងងាកទៅរកប្រទេសចិន។
បើតាមលោក សុវណ្ណារ៉ា កម្ពុជាគួរតែរក្សាជំហរខ្លួនឯងឲ្យមានអព្យាក្រិត ក្នុងការរក្សាទំនាក់ទំនង និងសន្តិសុខក្នុងតំបន់ព្រោះមិនអាចពឹងតែទៅលើចិនបានតែមួយនោះទេ ខណៈដែលប្រទេសដែលកំពុងមានឥទ្ធិពលនៅអាស៊ីនោះក៏មានសហរដ្ឋអាមេរិក និងអូស្ត្រាលីផងដែរ៕