Thu, 17 May 2018
ភ្នំំពេញ ប៉ុស្តិ៍
ភ្នំពេញប៉ុស្តិ៍
ភ្នំពេញៈ ព័ត៌មានដែលថា គេហទំព័ររបស់កាសែតភ្នំពេញប៉ុស្តិ៍ ត្រូវបានហេកដោយហេកឃ័រវៀតណាម គឺជាព័ត៌មានមិនពិត។ ក្រុមការងារបច្ចេកទេស របស់កាសែតភ្នំពេញប៉ុស្តិ៍បានធ្វើតេស្តទូទាំងប្រព័ន្ធរបស់ខ្លួន បន្ទាប់ពីបានអានរបាយការណ៍នៅលើគេហទំព័រ ABC កាលពីថ្ងៃម្សិលមិញ ដើម្បីពិនិត្យថាតើករណីនេះពិតឬអត់?។
របាយការណ៍របស់ ABC បានស្រង់សម្តីលោកស្រី Naly Pilorge នាយិកាអង្គការសិទ្ធិមនុស្សលីកាដូថា៖ «ចាប់តាំងពីថ្ងៃអង្គារ (ថ្ងៃទី ៨ ខែឧសភា) កុំព្យូទ័រនៅក្នុងការិយាល័យរបស់យើងត្រូវបានតម្រង់ទិសដៅដោយកូដមួយ នៅពេលយើងចូលទៅគេហទំព័រកាសែតភ្នំពេញប៉ុស្តិ៍»។ «យើងបានចាត់វិធានការការពារដើម្បីកម្ចាត់ការតម្រង់ទិសដៅវាយប្រហារនេះ»។
របាយការណ៍នោះនិយាយទៀតថាបុគ្គលិកអង្គការលីកាដូដែលចូលទៅគេហទំព័ររបស់កាសែតភ្នំពេញប៉ុស្តិ៍ត្រូវបានបង្វែរទិសដៅទៅទំព័រ Google ក្លែងក្លាយអំពីភាពឯកជន ហើយបន្ទាប់មកទំព័រមួយដែលមានឈ្មោះថា GTransfer ដែលសុំការអនុញ្ញាតឲ្យ «អាន ផ្ញើ លុប និងរៀបចំអ៊ីមែលរបស់អ្នក» និង «មើលការទំនាក់ទំនងរបស់អ្នក»។
បុគ្គលិករបស់អង្គការលីកាដូបានបដិសេធនិយាយជាមួយអ្នកយកព័ត៌មានរបស់កាសែតភ្នំពេញប៉ុស្តិ៍នៅពេលទាក់ទងដើម្បីផ្ទៀងផ្ទាត់បញ្ហានេះ។
ទោះយ៉ាងណាការធ្វើតេស្តដែលធ្វើឡើងដោយក្រុមបច្ចេកទេសដែលរួមមានទាំងការវាយតម្លៃគេហទំព័ររបស់កាសែតភ្នំពេញប៉ុស្តិ៍ ពីបរទេសមិនបានរកឃើញការវាយប្រហារអ្វីទាំងអស់។
លោក សេង ណាក់ អ្នកគ្រប់គ្រងផ្នែក IT របស់កាសែតភ្នំពេញប៉ុស្តិ៍បានថ្លែងថា៖ «ព័ត៌មាននេះមិនពិត។ យើងបានធ្វើការផ្ទៀងផ្ទាត់ប្រព័ន្ធទាំងមូលរបស់យើងមិនមានអ្វីខុសទេ។ យើងមិនត្រូវបានគេហេកទេ»។
លោកបន្តថា៖ «ដោយសារពួកគេ (លីកាដូ) មិនចង់ផ្តល់ព័ត៌មានណាមួយដល់អ្នកយកព័ត៌មានរបស់យើងខ្ញុំអាចទាយថាវាជាប្រព័ន្ធរបស់អង្គការនោះទេ ដែលត្រូវបានគេហេក មិនមែនប្រព័ន្ធរបស់យើងទេ។ នេះហើយជាមូលហេតុដែលអ្នកប្រើប្រាស់របស់ខ្លួនកំពុងត្រូវបានបង្វែរទិសដៅទៅកន្លែងផ្សេង»។ «អង្គការលីកាដូ ចេះតែចង្អុលមកកាសែតភ្នំពេញ-ប៉ុស្តិ៍ ដោយមិនបានធ្វើការផ្ទៀងផ្ទាត់បញ្ហានេះជាមុន»។
របាយការណ៍របស់ ABC បានស្រង់សម្តីរបស់ក្រុមហ៊ុនសន្តិសុខប្រព័ន្ធអ៊ីនធឺណិតថា ក្រុមហេកនេះពាក់ព័ន្ធជាមួយរដ្ឋវៀតណាមបានប្រើគេហទំព័ររបស់កាសែតភ្នំពេញប៉ុស្តិ៍ ដើម្បីវាយប្រហារអង្គការលីកាដូ៕ PS