ប្រជាពលរដ្ឋ ៧គ្រួសារ មកពីស្រុកប្រាសាទបាគង ខេត្ដសៀមរាប បានស្នើទៅតុលាការខេត្ដនេះ ឲ្យពន្លឿនដំណោះស្រាយជម្លោះដីធ្លីជូនពួកគាត់ ដោយថា ឈ្មួញដីធ្លីម្នាក់នៅខេត្ដនេះ បានរំលោភយកដីពួកគាត់។
តំណាងពលរដ្ឋនៅឃុំកណ្ដែក ស្រុកប្រាសាទបាគង លោក នឹម ណារិទ្ធ បានប្រាប់វីអូឌីកាលពីថ្ងៃម្សិលមិញថា ពលរដ្ឋទាំង ៧គ្រួសារនៅភូមិជ្រៃ បានកាន់កាប់ដីទំហំ ២ហិកតាជាមួយឯកសារត្រឹមត្រូវតាមច្បាប់តាំងពីឆ្នាំ២០១៣មកម៉្លេះ ប៉ុន្តែ លោកថា ឈ្មួញដីធ្លី លោកស្រី លី អ៊ុំអេង បានធ្វើរបងហ៊ុំព័ទ្ធលើដីរបស់ពួកគាត់កាលពីឆ្នាំ២០១៥។
លោកបន្ដថា នៅព្រឹកថ្ងៃទី២១ ខែឧសភានេះ តុលាការខេត្ដសៀមរាប បានចេញសាលដីកាសម្រេចឲ្យក្រុមមន្រ្ដីសុរិយោដីចុះកំណត់ព្រំប្រទល់និងទំហ៊ំដីពិតប្រាកដ ប៉ុន្ដែ លោកស្រី លី អ៊ុំអេង មិនមានវត្ដមាននៅជាមួយពលរដ្ឋឡើយ។ តំណាងពលរដ្ឋរូបនេះ បានស្នើសុំឲ្យតុលាការ ជួយពន្លឿនដោះស្រាយជម្លោះនេះ ជូនពួកគាត់ឲ្យបានឆាប់។
ប៉ុន្តែ លោកស្រី លី អ៊ុំអេង បានបដិសេធទៅនឹងការចោទប្រកាន់ពីសំណាក់ក្រុមពលរដ្ឋ ដោយអះអាងថា លោកស្រីបានកាន់កាប់ដីទំហំ ៥ហិកតា ជាមួយឯកសារដែលត្រូវបានទទួលស្គាល់ដោយអាជ្ញាធរមូលដ្ឋានចាប់តាំងពីឆ្នាំ១៩៩៤មកម៉្លេះ និងបានធ្វើរបងហ៊ុំព័ទ្ធកាលពីឆ្នាំ២០១៤។
ទោះជាយ៉ាងណា អនុប្រធានភូមិជ្រៃ លោក ហុង គង់ ដែលអះអាងថា ធ្លាប់បានចុះវាស់វែងដីធ្លីជូនពលរដ្ឋទាំង ៧គ្រួសារនោះ បានប្រាប់ថា ពលរដ្ឋទាំង ៧គ្រួសារនោះ ពិតជាម្ចាស់កម្មសិទ្ធិលើដីទំហំ ២ហិកតានោះមែន។
វីអូឌី មិនអាចទាក់ទងលោក អ៊ុំ ចាន់ថុល អនុប្រធានសាលាដំបូងខេត្ដសៀមរាប ដែលកាន់សំណុំរឿងនេះបាននៅឡើយទេ ដោយទូរស័ព្ទមិនអាចទាក់ទងបាន។
ប៉ុន្ដែ ដីការបស់សាលាដំបូងខេត្ដសៀមរាប បានសម្រេចឲ្យមន្ដ្រីសុរិយោដី ចុះវាស់វែង និងកំណត់ព្រំប្រទល់តាមភាពជាក់ស្ដែងដើម្បីបញ្ជូនឯកសារទៅតុលាការ៕