ដោយ ម៉ៅ សុធានី
2018-05-23
RFA
(ពីឆ្វេង) លោក កឹម សុខា និងលោក សម រង្ស៊ី កាលពីថ្ងៃទី១៩ ខែកក្កដា ឆ្នាំ២០១៣ លោក ហ៊ុន សែន និងភរិយា លោកស្រី ប៊ុន រ៉ានី កាលពីថ្ងៃទី២៧ ខែមុថិនា ឆ្នាំ២០១៣។ Photo: RFA
លោក ហ៊ុន សែន ថា គណបក្សដែលចូលរួមការបោះឆ្នោត មិនមែនជាគណបក្សរណប
លោក ហ៊ុន សែន បន្ដព្រួយបារម្ភប្រជាប្រិយភាពបក្សប្រឆាំង
លោកនាយករដ្ឋមន្ត្រី ហ៊ុន សែន ថ្លែង កាលពីថ្ងៃទី២២ ឧសភា ថា ការហៅគណបក្សផ្សេងដែលចូលរួមការបោះឆ្នោត ជាគណបក្សអំពិលអំពែកនោះ គឺជាការមើលស្រាល ហើយថាគណបក្សទាំងនោះមានសិទ្ធិដូចជាគណបក្សធំៗដែរ ទោះបីជាគណបក្សតូចក្ដី។
ប្រតិកម្មរបស់លោក ហ៊ុន សែន នេះ ក្រោយដែលលោក សម រង្ស៊ី អតីតប្រធានគណបក្សសង្គ្រោះជាតិ បានប្រកាសកាលពីពេលថ្មីនេះ កុំឲ្យប្រជាពលរដ្ឋទៅបោះឆ្នោត និងបញ្ជាក់ថា គណបក្សតូចៗដែលចូលរួមការបោះឆ្នោតជាតិ នៅថ្ងៃទី២៩ ខែកក្កដា ខាងមុខ គឺជាគណបក្សរណបបក្សកាន់អំណាច ដែលបង្កើតឡើងដោយរបបក្រុងភ្នំពេញ ដើម្បីបំភាន់ប្រជាពលរដ្ឋ និងសហគមន៍អន្តរជាតិថា ការបោះឆ្នោតនេះ គឺរៀបចំធ្វើឡើងដោយសេរី ត្រឹមត្រូវនិងយុត្តិធម៌។
លោក ហ៊ុន សែន អះអាងថា កម្ពុជា នឹងខិតខំបន្តការពារសន្តិភាព និងបន្តអនុវត្តប្រជាធិបតេយ្យនៅកម្ពុជា៖ «គណបក្សចំនួន២០ ចូលរួមក្នុងការបោះឆ្នោត មិនមែនជាការលេងសើចទេ ហើយមានអ្នកខ្លះបែរជាចាត់ទុកគណបក្សនេះថា ជាគណបក្ស ហ៊ុន សែន អ្នកបង្កើតហាក់ដូចជាមើលស្រាល ដល់បណ្ដាគណបក្សនយោបាយដទៃទៀត រហូតដល់ឈានទៅហៅគេថា ជាគណបក្សអាប មានតែក្បាល គណបក្សអំពិលអំពែក»។
អតីតប្រធានគណបក្សសង្គ្រោះជាតិ លោក សម រង្ស៊ី កាលពីពេលថ្មីៗនេះ បានថ្លែងប្រាប់អ្នកគាំទ្រគណបក្សសង្គ្រោះជាតិនៅកម្ពុជា ឲ្យធ្វើពហិការ មិនចូលរួមការបោះឆ្នោត ដោយបញ្ជាក់ថា គ្មានគណបក្សណា អាចប្រកួតប្រជែងជាមួយគណបក្សកាន់អំណាចបានទេ ហើយគណបក្សតូចៗទាំងនោះ ជាគណបក្សអំពិលអំពែកតែប៉ុណ្ណោះ៖ «គណបក្សណាដែលអាចជំនួសគណបក្សសង្គ្រោះជាតិបានទេ ពីព្រោះយើងមានជំហររឹងមាំ ទិញមិនលក់ សម្លុតមិនខ្លាច។ គណបក្សផ្សេងទៀតដែលមកចូលរួមបោះឆ្នោត គឺឆ្លៀតឱកាសចង់កេងចំណេញអវត្តមានគណបក្សសង្គ្រោះជាតិ គឺគ្រាន់តែមកលំអឆាកល្ខោន ក្លែងក្លាយដើម្បីបន្តអំណាចតែប៉ុណ្ណោះ។ យើងអាចប្រៀបធៀបគណបក្សទាំងនោះដូចជាសត្វអំពិលអំពែក»។
ក្នុងវេទិកាសាធារណៈ ស្ដីពីដំណើរការបោះឆ្នោត នៅប្រទេសកម្ពុជា នៅទីក្រុងវ៉ែនឃូវើ (Vancouver) ប្រទេសកាណាដា កាលពីថ្ងៃទី២០ ខែឧសភា លោក សម រង្ស៊ី ក៏បានអះអាងថា ការបោះឆ្នោតក្នុងស្ថានភាពបែបនេះ គ្មានន័យអ្វីទាំងអស់ ព្រោះគេបានដឹងពីលទ្ធផលជាមុនរួចទៅហើយថា គណបក្សប្រជាជនកម្ពុជានៃរបបដឹកនាំរបស់ លោក ហ៊ុន សែន នឹងឈ្នះយ៉ាងតិច ៩៩% ព្រោះគ្មានគូប្រកួត៕