លោក ពេជ្រ ចំរុង | May 25, 2018 | 3:46 pm
https://vodhotnews.com
ប្រជាពលរដ្ឋមកពីស្រុក ឆ្លូង ខេត្ត ក្រចេះ មកតវ៉ាបញ្ហាដីធ្លីនៅមុខរដ្ឋសភា កាលពីថ្ងៃទី ២៤ សឧភា ម្សិលមិញនេះ។
អាជ្ញាធរខេត្តក្រចេះសន្យាថា នឹងជួយពន្លឿនដោះស្រាយវិវាទដីធ្លីរវាងប្រជាពលរដ្ឋ និងក្រុមហ៊ុនចម្ការកៅស៊ូ បន្ទាប់ពីពលរដ្ឋជាច្រើននាក់ បានឡើងមកតវ៉ានៅរាជធានីភ្នំពេញ ប៉ុន្ដែ ត្រូវអាជ្ញាធរក្រុងសុំឲ្យពួកគេត្រឡប់ទៅស្រុកវិញ។
នៅល្ងាចម៉ោង៦ថ្ងៃព្រហស្បតិ៍ម្សិលមិញ ប្រជាពលរដ្ឋប្រមាណជិត ១០០នាក់ ដែលមានជម្លោះដីធ្លីជាមួយក្រុមហ៊ុនចំការកៅស៊ូមេមត់ នៅស្រុកឆ្លូង ខេត្តក្រចេះ បានប្រមូលផ្ដុំគ្នាតវ៉ានៅមុខរដ្ឋសភាជាតិ ដើម្បីសុំឲ្យអាជ្ញាធរមានសមត្ថកិច្ច ជួយដោះស្រាយជម្លោះដីធ្លីជាមួយក្រុមហ៊ុន។
កាលពីល្ងាចម្សិលមិញ ក្រុមប្រជាពលរដ្ឋ បានស៊ូទ្រាំតវ៉ាទាំងកណ្ដាលភ្លៀង ខណៈ អាជ្ញាធរក្រុងបានទទូចសុំឲ្យពួកគាត់ត្រឡប់ទៅស្រុកកំណើតវិញ និងបានត្រៀមរថយន្ដ ២គ្រឿងសម្រាប់ដឹកពួកគាត់។ ហើយនៅម៉ោងប្រមាណជាជាង៨យប់ទើបក្រុមប្រជាពលរដ្ឋមានជម្លោះដីធ្លី បានយល់ព្រមតាមការស្នើសុំនោះ និងបានវិលត្រឡប់ទៅខេត្តក្រចេះវិញ ដើម្បីរកអន្ដរាគមន៍ពីអាជ្ញាធរក្នុងខេត្តនេះ។
អភិបាលរងខេត្តក្រចេះ លោក ខាន់ ចំណាន ប្រាប់ VOD ថា នៅរសៀលថ្ងៃសុក្រនេះ អាជ្ញាធរបានជួបប្រជុំពិភាក្សារកដំណោះស្រាយជាមួយប្រជាពលរដ្ឋ ដែលមានជម្លោះដីធ្លីទាំងនោះ។ លោកអះអាងថា អាជ្ញាធរនឹងខិតខំរកដំណោះស្រាយជូនពួកគាត់ ប៉ុន្ដែ លោកថា ជម្លោះនេះត្រូវការពេលយូរ ដើម្បីដោះស្រាយចប់។
ពលរដ្ឋដែលមកតវ៉ារង់ចាំនៅមុខរដ្ឋសភាកាលថ្ងៃទី ២៤ ឧសភា ម្សិលមិញនេះ
លោក ខាន់ ចំណាន មានប្រសាសន៍ថា ជម្លោះដីធ្លីនេះបានបង្កឡើងដោយប្រជាពលរដ្ឋ ដែលលោកថា បានចូលទៅរស់នៅខុសច្បាប់លើដីរបស់ក្រុមហ៊ុន។ លោកបន្ដថា កន្លងទៅ អាជ្ញាធរបានកាត់ឃ្វៀលដីក្រុមហ៊ុន ឲ្យពួកគាត់បង្កបង្កើនផលចំនួន ២ដងរួចហើយ ប៉ុន្ដែ នៅតែមានការចូលទៅទន្រ្ទាន រស់នៅលើដីនោះថែមទៀត ដែលជាហេតុធ្វើឲ្យកើតមានជម្លោះជាថ្មី។
ហើយបន្ដទៀត ចុងឆ្នាំ២០១៧ ឆ្នាំ២០១៨ ចូលទៅថែមទៀត ហាក់បីជាចលនាទៅទារដីម៉ង ហើយបានពួកគាត់ចាប់ផ្ដើមធ្វើការទាមទារនៅភ្នំពេញថែមទៀត។ យើងខិតពន្លឿនការដោះស្រាយ បានន័យថា ធ្វើឲ្យញាប់ដៃញាប់ជើង ប្រឹងប្រែងរៀបជាយុទ្ធនាការនៃការធ្វើ ហ្នឹងប្រាកដជាលឿនហើយ
លោក ខាន់ ចំណាន អភិបាលរងខេត្តក្រចេះ
កាលពីថ្ងៃទី៨មីនាកន្លងទៅ ប្រជាពលរដ្ឋរស់នៅភូមិជើងឃ្លេ ឃុំ២ធ្នូ ស្រុកស្នួល ដែលមានជម្លោះជាមួយក្រុមហ៊ុនចំការកៅស៊ូមេមត់ បានប៉ះទង្គិចគ្នាជាមួយកម្លាំងសមត្ថកិច្ចក្នុងខេត្តនេះ និងបណ្ដាលពលរដ្ឋមួយចំនួនទទួលរងរបួសផងដែរ បន្ទាប់ពីក្រុមហ៊ុនបានយកគ្រឿងចក្រចុះកាយដីព្រំ និងឈូសឆាយលើដំណាំពួកគាត់។ ករណីនេះ ក្រុមហ៊ុនមេមត់ បានចោទថា ពលរដ្ឋជាអ្នករំលោភយកដីរបស់ក្រុមហ៊ុន៕
CCIM/VOD
រក្សាសិទ្វិគ្រប់យ៉ាង។ គ្មានផ្នែកណាមួយនៃអត្ថបទនេះ អាចត្រូវបានផលិតឡើងវិញក្នុងការបោះពុម្ពផ្សាយ ការសរសេរឡើងវិញ ឬ ការចែកចាយឡើងវិញដោយគ្មានការអនុញ្ញាតជាលាយលក្ខណ៍អក្សរឡើយ។