ប្រាសាទតាកែវ
@Chungvandat
ពិព័រណ៍សិល្បៈចិន បានធ្វើសំណើសុំខ្ចីរូបបដិមាខ្មែរ ដើម្បីយកទៅចូលរួមការតាំងពិព័រណ៍អរិយធម៌អាស៊ី នៅប្រទេសចិន។ សំណើនេះ ធ្វើឡើងនៅក្នុងជំនួបនៅថ្ងៃចន្ទ ទី១១មីនានេះ រវាងលោក CHOU Ming អនុប្រធាននៃពិព័រណ៍សិល្បៈចិន និងលោក ហង់ ពៅ អគ្គនាយកនៃអាជ្ញាធរជាតិអប្សរា។
បដិមាខ្មែរ ដែលពិព័រណ៍សិល្បៈចិនស្នើខ្ចីនោះ ជាបដិមាមកពីប្រាសាទតាកែវ និងប្រាសាទចៅសាយទេវតា។ លោក CHOU Ming អនុប្រធាននៃពិព័រណ៍សិល្បៈចិន បានថ្លែងប្រាប់អគ្គនាយកនៃអាជ្ញាធរជាតិអប្សរាថា នៅខែឧសភាខាងមុខនេះ ប្រទេសចិន មានបំណងរៀបចំពិព័រណ៍អរិយធម៌អាស៊ីដែលមានលក្ខណៈពិសេស ឆ្លុះបញ្ចាំងពីកិច្ចសហប្រតិបត្តិការបេតិកភណ្ឌវប្បធម៌នៅក្នុងរមនីយដ្ឋានអង្គរ។ ក្នុងន័យនេះហើយ ទើបចិនត្រូវការបដិមាដែលមានប្រភពពីប្រាសាទតាកែវ និងប្រាសាទចៅសាយទេវតា យកទៅតាំងនៅក្នុងពិព័រណ៍នោះ។
អាជ្ញាធរជាតិអប្សរា មិនទាន់ឆ្លើយតបយ៉ាងណាចំពោះសំណើរបស់ពិព័រណ៍សិល្បៈចិននៅឡើយទេ ដោយគូសបញ្ជាក់ថា រាល់រូបបដិមាដែលបានស្នើសុំខ្ចី ចាំបាច់ត្រូវឆ្លងកាត់ការវាយតម្លៃធានារ៉ាប់រង ស្របតាមការគ្រប់គ្រងបុរាណវត្ថុ ដើម្បីធានាបាននូវសុវត្ថិភាព។ និងថា អាជ្ញាធរជាតិអប្សរា ត្រូវការពេលវេលាដើម្បីផ្ដល់ព័ត៌មានទៅស្ថាប័នពាក់ព័ន្ធ មុននឹងអាចអនុញ្ញាតឲ្យយកបដិមាចេញពីទីតាំងជាក់ស្ដែង។
យ៉ាងណាក៏ដោយ សម្រាប់អាជ្ញាធរជាតិអប្សរា វត្តមានបដិមាខ្មែរនៅក្នុងការតាំងពិព័រណ៍អរិយធម៌អាស៊ីដែលប្រទេសចិនរៀបចំ គឺជាឱកាសដែលកម្ពុជាអាចបង្ហាញអរិយធម៌របស់ខ្លួនទៅកាន់បណ្ដាប្រទេសនៅអាស៊ី និងជុំវិញពិភពលោក។ អាជ្ញាធរជាតិអប្សរាសន្យាថា នឹងជួយសម្របសម្រួលនិងសហការល្អ ដើម្បីឲ្យកិច្ចការនេះដំណើរការទៅបានដោយរលូន។
សូមរំឭកជូនថា កម្ពុជាធ្លាប់អនុញ្ញាតឲ្យប្រទេសចិនខ្ចីបដិមាខ្មែរចំនួន៨០រូប កាលពីឆ្នាំ២០១៤ សម្រាប់ពិធីតាំងពិព័រណ៍រយៈពេល៦ខែនៅប្រទេសចិន។ វត្ថុបុរាណចំនួន៨០រូបនោះ ត្រូវបានជ្រើសរើសដោយល្អិតល្អន់បំផុតពីមន្ដ្រីជំនាញកម្ពុជា និងមន្ដ្រីជំនាញរបស់ចិន ដើម្បីបង្ហាញនូវភាពសម្បូរបែបនៃសិល្បៈវប្បធម៌ខ្មែរ ជាអាថិ៍ វត្ថុធ្វើពីសំរិទ្ធ វត្ថុធ្វើពីថ្ម និងវត្ថុកុលាលភាជន៍។ ដើម្បីសម្រួលដល់ការដឹកជញ្ជូននិងដំឡើងដាក់តាំង បដិមាភាគច្រើនដែលយកទៅតាំងពិព័រណ៍នៅប្រទេសចិនក្នុងឆ្នាំ២០១៤នោះ មានកម្ពស់មិនលើសពីមួយម៉ែត្រកន្លះឡើយ៕