ដោយ ជុន ច័ន្ទបុត្រ
2019-04-13
RFA
ស្ដាប់ ឬទាញយកបទសម្ភាសន៍របស់លោក ជុន ច័ន្ទបុត្រ ជាមួយលោក យឹម ស៊ីណន
លោក យឹម ស៊ីណន ប្រធានចលនាយុវជននៅប្រទេសកូរ៉េខាងត្បូង។ រូប៖ ហ្វេសប៊ុក លោក យឹម ស៊ីណន
ទាក់ទងទៅនឹងសមាជពិភពលោក នៃអ្នកប្រជាធិបតេយ្យ និងបាតុកម្មភ្លើងទៀន ដែលគ្រោងនឹងធ្វើនៅក្រុងក្វាងជូ នៃប្រទេសកូរ៉េខាងត្បូងឯណោះវិញ ខណៈដែលអ្នកចូលរួមពីទីជិតឆ្ងាយកំពុងតែទៅដល់ប្រទេសកូរ៉េជាបន្តបន្ទាប់ មន្ត្រីរបបក្រុងភ្នំពេញក៏ចាប់ផ្ដើមបញ្ចេញសារគំរាមកំហែងជាហូរហែដែរ។
លោក ផៃ ស៊ីផាន អ្នកនាំពាក្យផ្លូវការរបស់របបក្រុងភ្នំពេញ ដំបូងឡើយ ប្រកាសថា ដ្ឋាភិបាលក្រុងភ្នំពេញអាចចាប់មេខ្លោងរៀបចំពិធីទទួល លោក សម រង្ស៊ី ដែលលោក ផៃ ស៊ីផាន ហៅថាជាទណ្ឌិត។ មួយស្របក់ក្រោយមក សារនេះត្រូវបានប្រព័ន្ធឃោសនារបបក្រុងភ្នំពេញ លុបចោល ហើយជំនួសមកវិញនូវសារថ្មីមួយទៀត។
សារចុងក្រោយរបស់លោក ផៃ ស៊ីផាន នៅតែមានន័យគំរាមកំហែងដដែល តែមានការបញ្ជោរបញ្ចើចបញ្ចើចៅហ្វាយនាយរបស់ខ្លួនផង។ លោក ផៃ ស៊ីផាន សរសេរថា «រដ្ឋាភិបាលអាចមានលទ្ធភាពតាមផ្លូវច្បាប់ ក្នុងកិច្ចចាត់វិធានការដោយប្រការណាមួយជាចាំបាច់ ទៅលើក្រុមបាតុករនៅក្រៅប្រទេស»។
ទន្ទឹមនឹងនោះលោកឆ្លៀតបញ្ជោរមេ ហ៊ុន សែន របស់លោកថា ក្រោមការដឹកនាំរបស់លោក សែន ដែលលោក ផៃ ស៊ីផាន ហៅថា “ទន់ភ្លន់ និងម៉ឺងម៉ាត់ហើយថា សម្តេចអគ្គមហាសេនាបតីតេជោ ហ៊ុន សែន ដែលលោកមានគុណធម៌ និងសីលធម៌ខ្ពស់នោះ” លោក ផៃ ស៊ីផាន ខ្លួនឯងទៅជាយល់ឃើញថា “មិនមានតម្លៃនៃការចាំបាច់ណាមួយ ក្នុងកិច្ចចាត់វិធានការបង្ក្រាបក្រុមបាតុករនៅក្រៅប្រទេសនោះឡើយ។
តំណាងចលនាយុវជនខ្មែរនៅប្រទេសកូរ៉េខាងត្បូង លោក យឹម ស៊ីណន នៅតែបង្ហាញឆន្ទៈមោះមុតរបស់លោក ក្នុងការរៀបចំសមាជ និងបាតុកម្មភ្លើងទៀននោះដោយមិនចុះញ៉មនឹងពាក្យគំរាមទាំងនោះឡើយ។
សូមស្ដាប់បទសម្ភាសន៍របស់លោក ជុន ច័ន្ទបុត្រ ជាមួយលោក យឹម ស៊ីណន បន្ថែមទៀតដូចតទៅ