ដោយ ហេង រស្មី
2019-07-18
RFA
ស្ដាប់ ឬទាញយកសំឡេង
មន្ត្រីចុះត្រួតពិនិត្យកាកសំណល់ពីបរទេសចំនួន ៨៣កុងតឺន័រ ទម្ងន់ប្រមាណ ១.៦០០តោន ចូលមកកំពង់ផែខេត្តព្រះសីហនុ នៅថ្ងៃទី១៦ កក្កដា ២០១៩។ រូបពីហ្វេសប៊ុកក្រសួងបរិស្ថាន
ស្ថានទូតអាមេរិកប្រចាំកម្ពុជាប្រាប់អាស៊ីសេរីនៅថ្ងៃទី១៨ កក្កដា នេះថា សហរដ្ឋអាមេរិកទាមទារឱ្យរបបក្រុងភ្នំពេញផ្ដល់ព័តមានបន្ថែមទៀត ក្រោយពីមានការចោទប្រកាន់ថា កាកសំណល់ចំនួន៨៣ កុងតឺន័របាននាំចូលពីសហរដ្ឋអាមេរិក និងប្រទេសកាណាដា។
អ្នកស្រី អេមីលី ហ្សឺប៊ើក (Emily Zeeberg) អ្នកនាំពាក្យស្ថានទូតប្រាប់ថា ស្ថានទូតសហរដ្ឋអាមេរិកប្រចាំក្រុងភ្នំពេញ កំពុងតាមដានព័ត៌មានទាក់ទងនឹងរឿងសំរាមប្លាស្ទិកនៅក្នុងកំពង់ផែស្វយ័តនៃក្រុងព្រះសីហនុ។
អ្នកស្រីបញ្ជាក់ថា សហរដ្ឋអាមេរិក ស្នើសុំព័ត៌មានបន្ថែមទៀតអំពីរឿងនេះ ហើយរដ្ឋាភិបាលសហរដ្ឋអាមេរិកក៏បានស្នើសុំជួយដល់រដ្ឋាភិបាលកម្ពុជាក្នុងការកំណត់ប្រភពដើមនៃប្រទេសដែលបាននាំចូលសំរាមប្លាស្ទិកនេះ ក៏ដូចជាស្ថាប័ន ឬក្រុមហ៊ុនពាក់ព័ន្ធក្នុងប្រទេសកម្ពុជាដែលបាននាំចូលសំរាមនេះផងដែរ។
អាជ្ញាធររបបក្រុងភ្នំពេញកាលពីថ្ងៃទី១៦ ខែកក្កដា កន្លងទៅនេះបានរកឃើញកាកសំណល់សំរាមប្លាស្ទិកដែលបានវេចខ្ចប់យ៉ាងមានរបៀបរៀបរយដាក់នៅក្នុងកុងតឺន័រចំនួន៨៣ បានដឹកមកកាន់កំពង់ផែក្រុងព្រះសីហនុ តាំងពីខែតុលា ឆ្នាំ២០១៨មកម្ល៉េះ។
អគ្គនាយកគយនឹងរដ្ឋាករ លោក គុណ ញឹម ប្រាប់អាស៊ីសេរីថា កាកសំណង់ទាំង៨៣កុងតឺន័រនេះបានចូលមកជាច្រើនលើកពីប្រទេស អាមេរិក និង ពីប្រទេសកាណាដា ហើយអាជ្ញាធរត្រូវការពេល១០ថ្ងៃទៀត ដើម្បីស្រាវជ្រាវព័ត៌មានបន្ថែមទៀត ពីភាគីពាក់ព័ន្ធមុននឹងសម្រេចបញ្ជូនចេញពីកម្ពុជា។
លោកបញ្ជាក់ថា កម្ពុជានឹងបញ្ជូនកាកសំណល់នេះទៅកាន់ប្រទេសដើមវិញដោយសារតែកម្ពុជាបានចុះហត្ថលេខាក្នុងចំណោមប្រទេសចំនួន១៨០ លើអនុសញ្ញាបាសែល ស្ដីពីការគ្រប់គ្រងកាកសំណល់មានគ្រោះថ្នាក់។ លោកបញ្ជាក់ថា យោងអនុសញ្ញានេះកម្ពុជាមានសិទ្ធិនាំចេញកាកសំណល់ប្លាស្ទិកនេះទៅកាន់ប្រទេសសាមីដែលបាននាំចូលកាកសំណល់មកកម្ពុជា៕