ដោយ ជុន ច័ន្ទបុត្រ
2019-10-04
អាស៊ីសេរី
ស្ដាប់ ឬទាញយកសំឡេង
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូ ណាហ្គា វើលដ៍ កញ្ញា ឈឹម ស៊ីថរ (NAGA World)។ រូប៖ ហ្វេសប៊ុក Sithar Chhim
ក្រសួងការងារ និងបណ្ដុះបណ្ដាលវិជ្ជាជីវៈ មិនបានជួបជុំដោះស្រាយវិវាទការងាររវាងតំណាងសហជីព និងក្រុមហ៊ុន ណាហ្គា វើលដ៍ (Naga World) នៅថ្ងៃទី៤ ខែតុលា តាមការគ្រោងទុកនោះទេ។ ក្រសួងការងារ បានសម្រេចលើកពេលដោះស្រាយវិវាទការងារនេះ ទៅថ្ងៃទី៧ ខែតុលាវិញ តាមសំណើរបស់ក្រុមហ៊ុន ដែលថា មិនទាន់រៀបចំខ្លួនរួចរាល់ក្នុងការចូលផ្សះផ្សារឿងនេះនៅឡើយ។
វិវាទការងារនេះកើតឡើង បន្ទាប់ពីក្រុមហ៊ុនកាស៊ីណូ ណាហ្គា វើលដ៍ ព្យួរការងារប្រធានសហជីព ម្នាក់ គឺកញ្ញា ឈឹម ស៊ីថរ កាលពីថ្ងៃទី២០ កញ្ញា បន្ទាប់ពីក្រុមហ៊ុនដឹងថា ប្រធានសហជីពរូបនេះ គ្រោងធ្វើយុទ្ធនាការទាមទារលក្ខខណ្ឌការងារ និងការដំឡើងប្រាក់ឈ្នួលសមរម្យសម្រាប់បុគ្គលិក កំពុងបម្រើការងារឲ្យក្រុមហ៊ុន ណាហ្គា វើលដ៍។
ប្រធានសហជីពទ្រទ្រង់សិទ្ធិការងារបុគ្គលិកកម្មករខ្មែរ នៃក្រុមហ៊ុនកាស៊ីណូ ណាហ្គា វើលដ៍ កញ្ញា ឈឹម ស៊ីថរ និយាយថា ការពន្យារពេលដោះស្រាយម្ដងហើយម្ដងទៀតនេះ ធ្វើឲ្យមានការព្រួយ បារម្ភរឿងក្រុមហ៊ុនចង់ទាញករណីនេះទៅជាវិវាទបុគ្គល ហើយក្រុមហ៊ុនមានលេសស្នើសុំក្រសួង ការងារឯកភាពបញ្ឈប់កញ្ញាបាន ដូច្នេះត្រូវរុញករណីនេះទៅបន្តត្រូវដោះស្រាយនៅតុលាការវិញ។ ទោះយ៉ាងណាក្តី តំណាងកម្មកររូបនេះ ស្នើសុំឲ្យក្រសួងការងារជួយដោះស្រាយឲ្យបានត្រឹមត្រូវ និង យុត្តិធម៌។
កាលពីថ្ងៃទី២ ខែតុលា បុគ្គលិកក្រុមហ៊ុនកាស៊ីណូ ណាហ្គា វើលដ៍ បានចេញសេចក្ដីថ្លែងការណ៍រួម មួយស្នើសុំឲ្យក្រុមហ៊ុនទទួលយកតំណាងរបស់ពួកគេចូលធ្វើការវិញដោយឥតលក្ខខណ្ឌ និង ឲ្យក្រុមហ៊ុនពិចារណាឡើងវិញ ក្នុងការដំឡើងប្រាក់ឈ្នួលជូនបុគ្គលិកតាមការស្នើសុំ។ ពួកគេលើកឡើងថា ប្រសិនបើក្រុមហ៊ុនមិនយល់ព្រមទេ គឺនឹងរក្សាជំហរបន្តទាមទារដោយប្រើប្រាស់សិទ្ធិជាមូលដ្ឋានរបស់ខ្លួនរហូតទាល់តែមានដំណោះស្រាយសមរម្យ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។