កម្ពុជា-កូរ៉ូណាវីរុស
11/08/2020 – 08:52
ដោយ៖ វណ្ណ សុគន្ធា
RFI
រដ្ឋាភិបាលកម្ពុជាបានសម្រេចផ្អាកជាបណ្តោះអាសន្ននូវជើងហោះហើរពីហ្វីលីពីនមកកាន់ប្រទេសកម្ពុជាចាប់ពីថ្ងៃទី១៣ ខែសីហាតទៅ ដើម្បីការពារការនាំចូលនូវជំងឺកូវីដ១៩មកក្នុងប្រទេសកម្ពុជា។ នេះបើតាមសេចក្តីប្រកាសព័ត៌មានបន្ទាន់មួយរបស់គណៈកម្មការអន្តរក្រសួង ដើម្បីប្រយុទ្ធប្រឆាំងនឹងជំងឺកូវីដ១៩នៅព្រឹកថ្ងៃអង្គារនេះ។ ការសម្រេចផ្អាកនេះ ធ្វើឱ្យហ្វីលីពីនជាប្រទេសទី៣ហើយ បន្ទាប់ពីម៉ាឡេស៊ី និង ឥណ្ឌូនេស៊ីដែលត្រូវបានរដ្ឋាភិបាលកម្ពុជាសម្រេចផ្អាកជើងហោះហើរដោយមិនកំណត់ពេលមកប្រទេសកម្ពុជា។
ការសម្រេចផ្អាកបណ្តោះអាសន្ននូវជើងហោះហើរពីប្រទេសហ្វីលីពីននេះ ធ្វើឡើងភ្លាមៗតែម្តង បន្ទាប់ពីក្រសួងសុខាភិបាលកម្ពុជាបានរកឃើញជនជាតិចិនចំនួន១៣នាក់ក្នុង១១៩នាក់ដែលបានធ្វើដំណើរមកពីប្រទេសហ្វីលីពីនមានផ្ទុកជំងឺកូវីដ១៩។ ពួកគេទាំងនេះ បានមកដល់ប្រទេសកម្ពុជានៅថ្ងៃទី០៩ ខែសីហា។ ជនជាតិចិនទាំង១៣នាក់ ត្រូវបានអាជ្ញាធរសុខាភិបាលកម្ពុជាបាននាំយកទៅដាក់ឱ្យសម្រាកព្យាបាលនៅមណ្ឌលសុខភាពចាក់អង្រែ រាជធានីភ្នំពេញ។ ចំណែក ជនជាតិចិនដែលរួមដំណើរជាមួយពួកគេចំនូន១០៦នាក់ផ្សេងទៀតដែលធ្វើតេស្តលើកដំបូងឃើញអវិជ្ជមានកូវីដ១៩ គឺ ត្រូវបានដាក់ឱ្យធ្វើចត្តាឡីស័កចំនួន ១៤ថ្ងៃ នៅសណ្ឋាគារមួយក្នុងរាជធានីភ្នំពេញ។
តាមរយៈជនជាតិចិនដែលឆ្លងជំងឺកូវីដ១៩ទាំងនេះ គណៈកម្មការអន្តរក្រសួង ដើម្បីប្រយុទ្ធប្រឆាំងនឹងជំងឺកូវីដ១៩បានចាត់ទុកអ្នកដំណើរមកពីប្រទេសហ្វីលីពីនថា ជាក្តីព្រួយបារម្ភមួយសម្រាប់កម្ពុជាដែលនេះ គឺជារឿងម្យ៉ាង ហើយម្យ៉ាវិញទៀត ហ្វីលីពីន គឺជាប្រទេសដែលមានអត្រាឆ្លងជំងឺកូវីដ១៩ខ្ពស់ជាងគេបំផុតនៅក្នុងចំណោមប្រទេសសមាជិកអាស៊ានទាំងអស់។ ហេតុដូច្នេះហើយ ទើបរដ្ឋាភិបាលកម្ពុជាសម្រេចផ្អាកជាបណ្តោះអាសន្ននូវជើងហោះហើរពីប្រទេសនេះ ដោយមិនកំណត់ពេលវេលា តែចាប់ផ្តើមអនុវត្តពីថ្ងៃទី១៣ សីហាតទៅ។
ការសម្រេចផ្អាកជើងហោះហើរនេះ ធ្វើឱ្យប្រទេសហ្វីលីពីនក្លាយជាប្រទេសទី៣ហើយនៅក្នុងតំបន់អាស៊ានដែលត្រូវរដ្ឋាភិបាលកម្ពុជាហាមមិនឱ្យចូលមកប្រទេសកម្ពុជា។ កាលពីថ្ងៃទី០១ ដើមខែសីហានេះ រដ្ឋាភិបាលកម្ពុជាបានសម្រេចរូចរាល់ហើយក្នុងការផ្អាកជើងហោះហើរមកពីប្រទេសម៉ាឡេស៊ី និង ប្រទេសឥណ្ឌូនេស៊ី ក្នុងហេតុផលការពារកុំឱ្យមានការនាំចូលជំងឺកូវីដ១៩មកក្នុងប្រទេសកម្ពុជាបន្តទៀត។
សម្រាប់ក្របខណ្ឌនៅក្នុងប្រទេសកម្ពុជាវិញ គិតត្រឹមថ្ងៃទី១១ ខែសីហានេះ កម្ពុជាមានចំនួនអ្នកឆ្លងជំងឺកូវីដ១៩សរុបចំនួន២៦៦នាក់ បន្ទាប់ពីរកឃើញករណីឆ្លងថ្មី១៥នាក់នៅថ្ងៃអង្គារនេះដែល១៣នាក់ គឺជាជនជាតិចិន និង ២នាក់ផ្សេងទៀត ជាជនជាតិខ្មែរមកពីអាមេរិក។ ប៉ុន្តែ កម្ពុជាបានព្យាបាលជាសះស្បើយចំនួន២២០នាក់ និងអ្នកកំពុងសម្រាកព្យាបាលមានចំនួន៤៦នាក់។ កម្ពុជាបានរកឃើញករណីឆ្លងជំងឺកូវីដ១៩ ដំបូងបំផុតកាលពីថ្ងៃទី ២៧ ខែមករា ឆ្នាំ២០២០ ហើយគិតមកដល់ពេលនេះ កម្ពុជាបានធ្វើតេស្តរកជំងឺកូវីដ១៩លើមនុស្សចំនួនជាង៧ម៉ឺននាក់ស្មើនឹងជាង៤ពាន់៤រយនាក់ក្នុង១លាននាក់។
ក្រសួងសុខាភិបាលកម្ពុជាបានគូសបញ្ជាក់ថា ការឆ្លងជំងឺកូវីដ១៩ នៅក្នុងប្រទេសកម្ពុជា គឺជាករណីនាំចូល ហើយមិនទាន់មានការឆ្លងចូលក្នុងសហគមន៍នៅឡើយទេ តែលទ្ធភាពនៅតែអាចកើតមាន។ ដូចនេះហើយ ក្រសួងសុខាភិបាលកម្ពុជាបានបន្តអំពាវនាវដល់ប្រជាពលរដ្ឋកម្ពុជាទាំងអស់ត្រូវប្រុងប្រយ័ត្នឱ្យបានខ្ពស់បំផុត ដោយកុំសន្តិភាពនិយមជាមួយនឹងជំងឺកូវីដ១៩នេះឱ្យសោះ៕