បរិស្ថាន | ព័ត៌មានជាតិ
លោកស្រី ពេជ្រ សុធារី | ១៥ តុលា ២០២០ |ម៉ោង ១៥:១០
VOD
ស្ត្រីម្នាក់អង្គុយលើដំបូលផ្ទះក្រោយមានជំនន់ទឹកភ្លៀងខ្លាំង នៅភូមិរោងម៉ាស៊ីន សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ថ្ងៃទី១៥ ខែតុលា ឆ្នាំ២០២០។ (ហ្វេសប៊ុក៖ រដ្ឋបាលខេត្តបន្ទាយមានជ័យ)
គណៈកម្មាធិការជាតិគ្រប់គ្រងគ្រោះមហន្តរាយ ឱ្យដឹងថា ជំនន់ទឹកភ្លៀងបានបង្កឱ្យប្រជាពលរដ្ឋជិត២០ម៉ឺននាក់បានរងផលប៉ះពាល់ ខណៈមនុស្សស្លាប់បានកើនដល់១៣នាក់ និងប៉ះពាល់ផ្ទះជិត៥ម៉ឺនខ្នង រួមនឹងហេដ្ឋារចនាសម័្ពន្ធជាច្រើនទៀត។
របាយការណ៍របស់គណៈកម្មាធិការជាតិ នៅព្រឹកថ្ងៃព្រហស្បតិ៍នេះ បានឱ្យដឹងថា គិតចាប់ពីថ្ងៃទី១ ខែកញ្ញា ដល់ថ្ងៃទី១៥ ខែតុលា ជំនន់ទឹកភ្លៀងបានប៉ះពាល់ដល់រាជធានី-ខេត្តចំនួន១៩ ក្នុងនោះ មានផ្ទះចំនួន៤៧ ៩២៣ខ្នង រងផលប៉ះពាល់និងខូចខាតអស់៥០ខ្នង។
របាយការណ៍ដដែល បន្តថា ចំណែកចំនួនមនុស្សស្លាប់វិញ បានកើនដល់១៣នាក់ ក្នុងនោះមានកេ្មង៥នាក់ ខណៈប្រជាពលរដ្ឋប្រមាណ៤៨ ៣១៧គ្រួសារ ស្មើប្រមាណ១៩៣ ២៦៨នាក់ រងផលប៉ះពាល់ និងប្រជាជនប្រមាណ៣ ០៩៤គ្រួសារ ស្មើប្រមាណ១២ ៣៧៦នាក់ ត្រូវបានជម្លៀសទៅកាន់ទីទួលសុវត្ថិភាព។
ចំពោះផលប៉ះពាល់ទៅលើហេដ្ឋារចនាសម្ព័ន្ធនានាវិញ របាយការណ៍បានបញ្ជាក់ថា មានសាលារៀនលិចទឹកចំនួន៤២៥កន្លែង, ផ្លូវជាតិនិងផ្លូវនានាប្រវែង១ ៦៦១គីឡូម៉ែត្រ និង៣១ខ្សែ, ស្ពានលិចទឹកប្រមាណ២៤កន្លែង, ទំនប់ប្រមាណ២១គីឡូម៉ែត្រ និងប៉ះពាល់ប្រឡាយប្រវែងជាង៣៥០គីឡូម៉ែត្រ។
របាយការណ៍បានបន្ថែមថា ដំណាំស្រូវចំនួន១៣១ ៣២៩ហិកតា ត្រូវលិចទឹក ក្នុងនោះខូចខាតប្រមាណ៦ ៦៥៧ហិកតា និងដំណាំរួមផ្សំ៥៥ ៣៦០កិកតា ក្នុងនោះខូចខាតប្រមាណ៦ ៣១០ហិកតា៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។