នយោបាយ | ព័ត៌មានជាតិ
វ៉ា សុភានុត |១៨ ធ្នូ ២០២០ |ម៉ោង ២១:០០
VOD
ស្ត្រីជាភរិយានិងសាច់ញាតិរបស់អតីតមន្ត្រីគណបក្សសង្គ្រោះជាតិដែលជាប់ឃុំ តវ៉ានៅក្រៅសាលាដំបូងរាជធានីភ្នំពេញ ទាមទារទៅតុលាការឱ្យទម្លាក់បទចោទលើស្វាមីឬសាច់ញាតិរបស់ពួកគេ នៅថ្ងៃទី០៩ ខែតុលា ឆ្នាំ២០២០។ (ហ៊ី ឆាយ)
ក្រុមស្ត្រីជាង១០នាក់ ដែលជាភរិយា និងសាច់ញាតិរបស់អតីតសកម្មជនគណបក្សសង្រ្គោះជាតិ នៅថ្ងៃសុក្រនេះ បន្តការប្រមូលផ្តុំជាថ្មីនៅមុខសាលាដំបូងរាជធានីភ្នំពេញ និងសហភាពអឺរ៉ុប ដើម្បីស្នើឱ្យមានការដោះលែងស្វាមីនិងសាច់ញាតិរបស់ពួកគេ ក្រោយពីបានខកខានប្រមូលផ្តុំជាច្រើនសប្តាហ៍ ដោយសារបញ្ហាជំងឺកូវីដ១៩។
អ្នកស្រី ជ័យ ស្រីនី អាយុ៣៦ឆ្នាំ ជាភរិយាសកម្មជនអតីតបក្សប្រឆាំងមួយរូបឈ្មោះ តុន និមល បាននិយាយថា ការដែលពួកគាត់នាំគ្នាទៅប្រមូលផ្តុំនៅមុខសាលាដំបូង និងសហគមន៍អឺរ៉ុបនេះ ដើម្បីស្នើឱ្យស្ថាប័នទាំងពីរជួយអន្តរាគមន៍ ឱ្យមានការដោះលែងស្វាមីរបស់គាត់ឱ្យនៅក្រៅឃុំ ដោយសារស្វាមីរបស់គាត់ប្រាប់ថា ការរស់នៅក្នុងពន្ធនាគារមានការលំបាកខ្លាំង ខណៈបន្ទប់ឃុំមានអ្នកជាប់ឃុំច្រើនបង្កឱ្យមានភាពណែនតាន់តាប់។
អ្នកស្រីថា៖ «ពួកខ្ញុំពិបាកខ្លាំងបានពួកខ្ញុំមក បើមិនចឹងពួកខ្ញុំមិនមកទេ»។
អ្នកស្រី ព្រំ ចន្ថា អាយុ៤៤ឆ្នាំ ដែលបានទៅលេងស្វាមីរបស់ខ្លួននៅពន្ធនាគារកាលពីម្សិលមិញ បាននិយាយថា ប្តីរបស់គាត់ប្រាប់ថា នៅក្នុងពន្ធនាគារមានការចង្អៀតខ្លាំងណាស់ ដោយសារតែបន្ទប់តូច ហើយមានអ្នកជាប់ឃុំច្រើន។ អ្នកស្រីថា ប្តីរបស់អ្នកស្រីមានវ័យចំណាស់ និងមានជំងឺប្រចាំកាយ ដែលករណីនេះហើយបានពួកគាត់ ស្នើឱ្យរាជរដ្ឋាភិបាល និងស្ថាប័នពាក់ព័ន្ធ ជួយអន្តរាគមន៍ឱ្យមានការដោះលែងស្វាមីរបស់គាត់ឱ្យនៅក្រៅឃុំ។
អ្នកស្រីថា៖ «សូមរាជរដ្ឋាភិបាលមានដំណោះស្រាយ នឹងដោះលែងប្ដីពួកខ្ញុំនឹងទម្លាក់ការចោទទាំងអស់ ទៅខ្ញុំឈប់មក[ប្រមូលផ្តុំ]ហើយ»។
អ្នកស្រី បន្ថែមថា អ្នកស្រីនឹងមិនបញ្ឈប់ការតវ៉ានេះទេ លុះត្រាតែមានដំណោះស្រាយណាមួយពីរាជរដ្ឋាភិបាល ចំពោះករណីនេះ។
លោកគឹម សន្តិភាព អ្នកនាំពាក្យក្រសួងយុត្តិធម៌ មានប្រសាសន៍ថា ការតវ៉ាទាមទារឱ្យដោះលែងអ្នកទោសដែលត្រូវបានជាប់ឃុំខ្លួន ដោយសាលដីការបស់តុលាការ ជារឿងមួយដែលខុសច្បាប់។
លោកបន្ថែមថា ប្រពន្ធរបស់អតីតសកម្មជនទាំងនោះ គួរតែរកដំណោះស្រាយតាមផ្លូវច្បាប់វិញ។
លោកបញ្ជាក់ថា «ការបាតុកម្មដើម្បីដោះលែងមនុស្សជាប់ឃុំ គឺជារឿងខុសច្បាប់»។
លោកអំ សំអាត នាយករងអង្គការការពារសិទ្ធិមនុស្សលីកាដូ បានប្រសាសន៍ថា ការចង្អៀតណែននៃពន្ធនាគារនេះ មិនមែនមានតែនៅរាជធានីភ្នំពេញនោះទេ គឺគ្រប់ពន្ធនាគារទាំងអស់ ហើយការចង្អៀតនេះនឹងធ្វើឱ្យប៉ះពាល់ សុខភាពរបស់អ្នកជាប់ឃុំ។
លោកបន្ថែមថា រាជរដ្ឋាភិបាលគួរតែពិនិត្យមើលលទ្ធភាពនៃការបែងចែកអ្នកជាប់ឃុំឱ្យនៅដាច់ដោយឡែកពីគ្នា រវាងអ្នកទោសមនសិការ និងអ្នកទោសនយោបាយ និងអ្នកទោសប្រព្រឹត្តបទល្មើសធ្ងន់ធ្ងរ ដើម្បីជៀសវាងប៉ះពាល់ដល់ផ្លូវចិត្ត។
លោកថា៖ «ពីព្រោះ បើទោះជាអ្នកជាប់ឃុំក៏ដោយ គាត់ក៏មានសិទ្ធិដូចមនុស្សដ៏ទៃទៀតដែរ ព្រោះការដកហូតនៃសេរីភាពដើរហើរក៏ដោយ ក៏សិទ្ធិផ្សេងៗគាត់មានសិទ្ធិដូចពលរដ្ឋដ៏ទៃទៀតដែរ»។
បើតាមក្រុមស្ត្រីទាំងនោះ ពួកគេបានធ្វើយុទ្ធនាការតវ៉ាទាមទារឱ្យដោះលែងស្វាមីនិងឪពុករបស់ពួកគាត់ពីក្រសួង ស្ថាប័នពាក់ព័ន្ធ និងអង្គការទូតនានា អស់រយៈពេលជាង ២០សប្តាហ៍មកហើយ គិតមកដល់ថ្ងៃសុក្រ ទី១៨ ខែធ្នូនេះ៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។