ព័ត៌មានជាតិ | សេដ្ឋកិច្ច | អភិបាលកិច្ច
លោក វណ្ណ វិចារ | ១៨ មករា ២០២១ |ម៉ោង ១៦:៤៧
VOD
កាស៊ីណូណាហ្គាវើល ក្នុងក្រុងភ្នំពេញ។ (ជន ចាន់រ៉ែន/ ៣០ មីនា ២០២០)
មហាសេដ្ឋីម៉ាឡេស៊ី និងជាម្ចាស់កាស៊ីណូណាហ្គា បានទទួលសញ្ជាតិខ្មែរ កាលពីអំឡុងខែតុលា ឆ្នាំមុន នេះបើតាមឯកសារព្រះរាជកិច្ចដែលចេញផ្សាយកាលពីថ្ងៃទី១២ ខែមករាថ្មីៗនេះ។
ព្រះរាជក្រឹត្យចុះហត្ថលេខាកាលពីថ្ងៃទី១៩ ខែតុលា ឆ្នាំ២០២០ ដោយប្រមុខរដ្ឋស្តីទី លោក សាយ ឈុំ បានផ្ដល់សញ្ជាតិខ្មែរ តាមរយៈសញ្ជាតូបនីយកម្មដល់លោក Chen Lip Keong ជនជាតិម៉ាឡេស៊ី សញ្ជាតិម៉ាឡេស៊ី កើតនៅថ្ងៃទី២២ ខែកក្កដា ឆ្នាំ១៩៤៧ នៅរដ្ឋ Perak ប្រទេសម៉ាឡេស៊ី។
ការណ៍ដែលសេដ្ឋីរូបនេះទទួលបានសញ្ជាតិខ្មែរ នឹងអាចនាំឱ្យរូបគាត់អាចកាន់កាប់អចលនទ្រព្យស្របច្បាប់នៅក្នុងប្រទេសកម្ពុជា រួមមាន អាគារ ផ្ទះសម្បែង និងដីធ្លីជាដើម ក្នុងនាមជាប្រជាពលរដ្ឋខ្មែរ ខណៈច្បាប់ស្តីពីការផ្តល់សិទ្ធិកម្មសិទ្ធិលើចំណែកឯកជននៃអគារសហកម្មសិទ្ធិដល់ជនបរទេស បានចែងថា ជនបរទេសអាចមានសិទ្ធិកម្មសិទ្ធិលើចំណែកឯកជននៃអគារសហកម្មសិទ្ធិ ចាប់ពីជាន់ទី១ (មួយ) ឡើងទៅប៉ុណ្ណោះ។
លោក Chen Lip Keong ជាថៅកែក្រុមហ៊ុនណាហ្គាវើលដ៍ និងជាម្ចាស់អាជ្ញាបណ្ណកាស៊ីណូផ្ដាច់មុខតែមួយគត់នៅរាជធានីភ្នំពេញ ដែលអាជ្ញាបណ្ណនោះមានសុពលភាពរហូតដល់ឆ្នាំ២០៦៥។ ទស្សនាវដ្ដី Forbes បានផ្សាយថា លោកមានទ្រព្យសម្បត្តិប្រមាណ ៤,៤ពាន់លានដុល្លារ គិតត្រឹមខែមករា ឆ្នាំ២០២១។
ផ្នែកទំនាក់ទំនងសាធារណៈរបស់ណាហ្គាវើលដ៍ មិនឆ្លើយតបអ៊ីម៉ែលចំពោះសំណួរដែលទាក់ទងនឹងការទទួលបានសញ្ជាតិរបស់លោក លីបគង់ ឡើយ គិតត្រឹមថ្ងៃចន្ទនេះ។
អ្នកនាំពាក្យតុលាការកំពូល លោក អ៊ុក គឹមជាតិ មានប្រសាសន៍ថា លោកបានដឹងថា លោក ជេន លីបគង់ បានស្បថបំពេញនីតិវិធីចូលសញ្ជាតិខ្មែរកាលពីឆ្នាំមុន ប៉ុន្តែមិនចាំពីកាលបរិច្ឆេទនៃថ្ងៃស្បថឡើយ។
អគ្គនាយកនៃអគ្គនាយកដ្ឋានអត្តសញ្ញាណកម្មក្រសួងមហាផ្ទៃ លោក កង សុខន មានប្រសាសន៍ថា មានជនបរទេសជាច្រើនដែលបានដាក់ពាក្យសុំសញ្ជាតិខ្មែរកាលពីឆ្នាំមុន ប៉ុន្តែលោកមិនបានកត់សម្គាល់ពីមុខរបរឬអាជីវកម្មអ្នកសុំសញ្ជាតិទាំងនោះទេ។
កាលបរិច្ឆេទទួលបានសញ្ជាតិខ្មែររបស់លោក Chen Lip Keong មានរយៈមិនដល់មួយខែផង មុនថ្ងៃដែលក្រុមហ៊ុនរបស់លោកប្រកាសពីគម្រោងបោះទុនវិនិយោគចំនួន៣៥០លានដុល្លារ លើការសាងសង់រមណីយដ្ឋាន «Angkor Lake of Wonder» (ALOW) ដែលនៅចម្ងាយប្រមាណ៥០០ម៉ែត្រពីតំបន់ហាមឃាត់ឧទ្យានអង្គរ ខេត្តសៀមរាប។
ក្រុមហ៊ុនណាហ្គាវើលដ៏ បានប្រកាសក្នុងសេចក្ដីប្រកាសព័ត៌មាន កាលពីខែវិច្ឆិកា ឆ្នាំ២០២០ ដោយបញ្ជាក់ថា រដ្ឋាភិបាលកម្ពុជាបានជួលដីទំហំ៧៥ហិកតា ដែលមានទីតាំងស្ថិតនៅភាគខាងត្បូងនៃខេត្តសៀមរាប ដែលមានចម្ងាយប្រមាណ៥០០ម៉ែត្រពីឧទ្យានអង្គរ ទៅឱ្យក្រុមហ៊ុនណាហ្គាខប ចំនួន៥០ឆ្នាំ គឺចាប់ពីខែមករា ឆ្នាំ២០២០ ដល់ឆ្នាំ២០៧០។
ក្រុមអ្នកឃ្លាំមើលបញ្ហាសង្គមនៅកម្ពុជា ដាក់ការសង្ស័យថា សញ្ជាតិខ្មែរអាចជាកាដូដែលរដ្ឋាភិបាលកម្ពុជាផ្ដល់ឱ្យលោក Chen Lip Keong ដើម្បីលើកទឹកចិត្តក្នុងនាមជាអ្នករកស៊ីយូរឆ្នាំនៅកម្ពុជា។
នាយកប្រតិបតិ្តនៃអង្គការតម្លាភាពអន្តរជាតិកម្ពុជា លោក ប៉ិច ពិសី មានប្រសាសន៍ថា គ្មានអ្នកណាអាចឆ្លើយបានឡើយថា ហេតុអ្វីសេដ្ឋីល្បែង លោក ជេន លីបគង់ ទើបតែទទួលបានសញ្ជាតិខ្មែរនៅពេលនេះ ខណៈដែលគាត់មករកស៊ីនៅស្រុកខ្មែរជាង២០ឆ្នាំមកហើយ។
លោក ប៉ិច ពិសី ថ្លែងថា៖ «លោកនាយកណាហ្គាហ្នឹង គាត់មកយូរហើយ តាំងពីរកស៊ីលើទូក[កប៉ាល់កាស៊ីណូ]។ បើមើលប្រវត្តិគាត់ គាត់មានសម្បទាគ្រប់គ្រាន់ហើយ ក្នុងការដាក់ពាក្យចូលសញ្ជាតិ បើគាត់ចេះភាសាខ្មែរទៅទៀត គាត់មានបំណងសុំចូលសញ្ជាតិដោយសទ្ធាចិត្តទៅទៀត មិនមែនជារឿងលំបាកទេ»។
លោកបន្ថែមថា កន្លងទៅ ជនបរទេសមួយចំនួនបានប្រើប្រាស់សញ្ជាតិខ្មែរ ដើម្បីមានសិទ្ធិលើដីធី្លនិងអចលនទ្រព្យប៉ុណ្ណោះ។ លោកអំពាវនាវឱ្យអាជ្ញាធរពាក់ព័ន្ធទប់ស្កាត់ភាពមិនប្រក្រតីនានា ជុំវិញដំណើរការផ្ដល់សញ្ជាតិខ្មែរដល់ជនបរទេស។
លោក ប៉ិច ពិសី បន្តទៀតថា៖ «កន្លងទៅយើងធ្លាប់ទទួលព័ត៌មានមកថា ការរៀបចំឯកសារផ្សេងៗដើម្បីដាក់ស្នើសុំសញ្ជាតិខ្មែរលើករណីខ្លះ ក៏មានជាប់ពាក់ព័ន្ធនឹងអំពើពុករលួយទៀតផង ដែលចាំបាច់ត្រូវមានការរឹតបន្តឹងនិងស៊ើបអង្កេត»។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព លោក យង់ គីមអេង មានប្រ សាសន៍ថា លោកនៅមានចម្ងល់ថា តើថៅកែកាស៊ីណូរូបនោះពិតជាចង់ចូលសញ្ជាតិខ្មែរដោយស្រឡាញ់ជនជាតិខ្មែរ ស្រឡាញ់ប្រទេសខ្មែរ ឬចូលសញ្ជាតិដើម្បីប្រយោជន៍ផ្ទាល់ខ្លួន? លោកស្នើឱ្យអាជ្ញាធរមានតម្លាភាពចំពោះមុខសាធារណជន ក្នុងករណីផ្ដល់សញ្ជាតិខ្មែរឱ្យជនបរទេស លើកក្រោយៗទៀត។
លោកនិយាយថា៖ «យើងចង់ឃើញថា យ៉ាងហោចណាស់ អាជ្ញាធរគួរសរសេរព័ត៌មានជាសាធារណៈខ្លះៗតាមច្បាប់ ដើម្បីឱ្យពលរដ្ឋអាចមើលឃើញនិងអាចយល់បាន និងមិនត្រូវលាក់លៀមព័ត៌មានទៀតទេ»។
វីអូឌី បានស្រង់ទិន្នន័យពីឯកសាររាជកិច្ចដែលចេញផ្សាយដោយទីស្តីការគណៈរដ្ឋមន្ត្រី បង្ហាញថា ក្នុងឆ្នាំ២០២០ កម្ពុជាបានសម្រេចផ្តល់សញ្ជាតិខ្មែរដល់ជនបរទេសជិត២០សញ្ជាតិ ដែលមានចំនួន២៧៥នាក់ ក្នុងនោះមានជនជាតិចិន២២០នាក់។
លោក Chen Lip Keong រកស៊ីមុខរបរមួយចំនួន រួមមាន កាស៊ីណូ អចលនទ្រព្យ ថាមពល។ល។ លោកជាសេដ្ឋីលំដាប់ទី៤ ក្នុងចំណោមសេដ្ឋីទាំង៥០ របស់ម៉ាឡេស៊ី និងស្ថិតក្នុងចំណោមសេដ្ឋីទី៤៣៧ ក្នុងចំណោមសេដ្ឋីៗលើពិភពលោក។ នេះបើតាមការចុះផ្សាយរបស់ទស្សនាវដ្ដី Forbes។ ក្រុមហ៊ុន ណាហ្គាវើលដ៍ គឺជាកាស៊ីណូធំជាងគេនៅឥណ្ឌូចិន។ ណាហ្គាខប គឺជាក្រុមហ៊ុនកាស៊ីណូដំបូងគេដែលបានចុះបញ្ជីនៅក្នុងផ្សារហ៊ុនហុងកុង។
កាលដើមឡើយ កាស៊ីណូណាហ្គាវើលដ៍ បើកនៅលើកប៉ាល់ម្ដុំកោះពេជ្រ បន្ទាប់មកក្រុមហ៊ុននេះរីកចម្រើនជាបន្តបន្ទាប់រហូតមានសណ្ឋាគារកាស៊ីណូធំៗផ្កាយ៥ ចំនួន២កន្លែង និងចាប់ផ្ដើមសាងសង់កាស៊ីណូណាហ្គាទី៣ បន្ថែមទៀត។
ក្នុងអំឡុងរដ្ឋាភិបាលអាណត្តិទី៤ កាស៊ីណូណាហ្គា ធ្លាប់ត្រូវបានអតីតតំណាងរាស្ត្រគណបក្សប្រឆាំង និងជាអតីតអនុប្រធានគណៈកម្មាធិការសេដ្ឋកិច្ចហិរញ្ញវត្ថុរដ្ឋសភា លោក សុន ឆ័យ ចោទថាបានបន្លំគេចពន្ធ ដោយទាមទារឱ្យរដ្ឋាភិបាលស៊ើបអង្កេតនិងចាត់វិធានការ។ ប៉ុន្តែតំណាងរដ្ឋាភិបាលរបស់លោកនាយករដ្ឋមន្ត្រី ហ៊ុន សែន បានទាត់ចោលការលើកឡើងនេះ៕
រក្សាសិទ្វិគ្រប់យ៉ាងដោយ ស៊ីស៊ីអាយអឹម
សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។