2021-04-26
RFA
ប្រជាពលរដ្ឋនៅក្នុងតំបន់បិទខ្ទប់ ឬ តំបន់ក្រហម ត្រូវបានអាជ្ញាធរអំពាវនាវឱ្យមកធ្វើតេស្តរកជំងឺកូវីដ១៩។ រូប៖ គេផ្ដល់ឱ្យ
ប្រជាពលរដ្ឋរស់នៅតំបន់បិទខ្ទប់ ឬតំបន់ក្រហម ត្អូញត្អែរថា ពួកគាត់ប្រឈមការឆ្លងជំងឺកូវីដ-១៩ ខណៈពេលអាជ្ញាធរអនុវត្តវិធានសុខាភិបាលមិនបានត្រឹមត្រូវ។ ពួកគាត់ទទូចឱ្យអាជ្ញាធរពាក់ព័ន្ធយកចិត្តទុកដាក់ពីទុក្ខកង្វល់របស់ប្រជាពលរដ្ឋបន្ថែមទៀត។
ប្រជាពលរដ្ឋរស់នៅក្នុងតំបន់ក្រហម លោកស្រី អី អន លើកឡើងថា ការណែនាំរបស់រដ្ឋបាលរាជធានីភ្នំពេញ ដែលឱ្យប្រជាពលរដ្ឋនៅតំបន់ក្រហម ប្រជ្រៀតគ្នាធ្វើតេស្តរកមេរោគកូវីដបែបនេះ គឺ ធ្វើឱ្យពួកគាត់ប្រឈមឆ្លងជំងឺកូវីដ-១៩។ លោកស្រីបន្តថា លោកស្រី និងពលរដ្ឋផ្សេងទៀត ខំស្នាក់នៅតែក្នុងផ្ទះច្រើនថ្ងៃមកហើយ ដើម្បីការពារសុវត្ថិភាព តែលោកស្រីព្រួយបារម្ភពីការឆ្លងជំងឺកូវីដ១៩ អំឡុងពេលទៅយកសំណាក ព្រោះអាជ្ញាធរ មិនបានជួយសម្របសម្រួលឱ្យប្រជាពលរដ្ឋរក្សាគម្លាតពីគ្នាតាមការណែនាំរបស់ក្រសួងសុខាភិបាលនោះទេ៖ «បារម្ភខ្លាចឆ្លងខ្លាចអីចឹងទៅ យើងមើលមិនឃើញថា បុគ្គលណាមួយកើតអី ខ្លួនយើងក៏មិនដឹងកើតអី ខ្លួនគេក៏មិនដឹងកើតអី មើលមិនឃើញដូចគ្នា ហើយគេក៏ដូចគ្នាដែរខ្លាចគេ គេខ្លាចយើង ប៉ុន្តែគម្លាតដូចអត់ប្រសិទ្ធភាពសោះ»។
ស្រដៀងគ្នានេះដែរ ប្រជាពលរដ្ឋនៅលើបណ្ដាញសង្គមហ្វេសប៊ុក ក៏បានរិះគន់ព្រោងព្រាតពីវិធានការតក់ក្រហល់របស់អាជ្ញាធររាជធានីភ្នំពេញ ដែលតម្រូវឱ្យប្រជាពលរដ្ឋប្រជ្រៀតគ្នាទៅធ្វើតេស្ដនេះ។ ម្ចាស់គណនីហ្វេសប៊ុកឈ្មោះ សុភានាថ ផេង (Sopheaneath Pheng) លើកឡើងថា៖ «ខ្ញុំនៅផ្ទះជិតពីរខែហើយ ឱ្យទៅឱ្យគេចម្លងមេរោគមែនទេ? រដ្ឋដូចប្លែកៗម៉េចទេ មិនឱ្យជួបជុំប្រមូលផ្តុំ តែហៅទៅជួបជុំប្រមូលផ្តុំ»។
ចំណែកគណនីហ្វេសប៊ុកមួយទៀតឈ្មោះ សុខឡាង ឈួន (Soklang Chhuon)៖ «ខ្ញុំសូមសំណូមពរឱ្យរដ្ឋមេត្តាមុនចេញសេចក្តីណែនាំ គួរពិគ្រោះពិភាក្សាឱ្យបានល្អិតល្អន់ជៀសវាងកុំឱ្យរាស្ត្រមានការភាន់ច្រឡំ និងច្របូកច្របល់ ព្រោះវាអាចបង្កហានិភ័យដល់ជាតិយើងទៅវិញទេ»។
រីឯគណនីហ្វេសប៊ុកឈ្មោះ សម្ផស្ស ភូក (Samphors Pok) លើកឡើងថា «តើទៅយកសំណាកឬទៅយកមេរោគឆ្លងមកវិញ បម្រាមឱ្យនៅតែក្នុងផ្ទះ តែប្រកាសឱ្យទៅយកសំណាក បើនាំគ្នាសម្រុកទៅ តើហានិភ័យនៃការឆ្លងមានដល់កម្រិតណា បើការឆ្លងតាមរយៈបែបហ្នឹង មានការទប់ស្កាត់របៀបមិច ព្រោះវានឹងមានហានិភ័យខ្ពស់បើនាំគ្នាសម្រុកទៅយកសំណាក។ អ្នកប្រើប្រាស់ហ្វេសប៊ុករូបនេះ ស្នើសុំឱ្យអាជ្ញាធរមេត្តាគិតពិចារណាឡើងវិញ ព្រោះមនុស្សសម្រុកទៅហានិភ័យខ្ពស់»។
ប្រតិកម្មរបស់ប្រជាពលរដ្ឋនេះ គឺបន្ទប់ពីរដ្ឋបាលរាជធានីភ្នំពេញ ចេញសេចក្តីណែនាំ កាលពីថ្ងៃទី២៣ ខែមេសា ស្ដីពីការប្រមូលសំណាករកវីរុសកូវីដ-១៩ចំពោះ ប្រជាពលរដ្ឋទាំងអស់ដែលកំពុងស្នាក់នៅក្នុងភូមិសាស្ត្រតំបន់ក្រហម រាជធានីភ្នំពេញ។ ក្នុងសេចក្តីណែនាំរបស់រដ្ឋបាលរាជធានីភ្នំពេញ ក៏អមដោយការគំរាមខាងផ្លូវច្បាប់ដែរ ដោយថា ប្រសិនបើប្រជាពលរដ្ឋណាម្នាក់មិនព្រមសហការ ឬគេចវេសមិនទៅយកសំណាកធ្វើតេស្តតាមការណែនាំ នឹងត្រូវទទួលទោស ដូចមានកំណត់ក្នុងច្បាប់ស្ដីពីការទប់ស្កាត់ជំងឺកូវីដ -១៩។ ក្រោយការប្រកាសនេះ ប្រជាពលរដ្ឋ បាននាំគ្នាសម្រុកទៅធ្វើតេស្តក្នុងស្ថានភាពប្រមូលផ្តុំ ដែលមានហានិភ័យខ្ពស់ក្នុងការឆ្លងជំងឺកូវីដ-១៩។
ក្រៅពីបញ្ហានេះ ប្រជាពលរដ្ឋកំពុងនៅក្នុងតំបន់ក្រហម ក៏បន្តត្អូញត្អែរថា ពួកគាត់មួយចំនួន នៅតែមិនទាន់ទទួលបានជំនួយឧបត្ថម្ភពីរដ្ឋាភិបាល តាមការប្រកាសសន្យានោះទេ។
កម្មមកររោងចក្រម្នាក់ដែលកំពុងរស់នៅក្នុងតំបន់ក្រហម លោកស្រី ចាន់ សុភ័ណ្ឌ លើកឡើងថា លោកស្រីនៅក្នុងបន្ទប់ជាច្រើនថ្ងៃមកហើយ និងមិនមានស្បៀងអាហារហូបចុកគ្រប់គ្រាន់នោះទេ។ ស្ត្រីមានស្រុកកំណើតនៅខេត្តកំពង់ស្ពឺរូបនេះ ត្អូញត្អែរអំពីជីវភាពថា លោកស្រី កំពុងតស៊ូរស់ទាំងត្រដាបត្រដួស ក្នុងបន្ទប់ជួលតូច ពុំមានប្រាក់សម្រាលកូនដែលជិតគ្រប់ខែទេ ហើយលោកស្រី ក៏បានទៅរកសេវាមន្ទីរពេទ្យដៃគូបេឡារបបសន្តិសុខសង្គម (ប.ស.ស) ដែរ ប៉ុន្តែមន្ទីរពេទ្យទាំងនោះ មិនព្រមទទួលលោកស្រីសម្រាលកូននោះទេ៖ «ខ្ញុំសូមអំពាវនាវថា ចង់បានថវិកាខ្លះ សម្រួលពេលខ្ញុំត្រៀមនឹងឆ្លងទន្លេ ហើយណាមួយទៀតសូមកុំឱ្យពេទ្យរើសអើងអ៊ីចឹងព្រោះអីបើអ្នកឈឺពោះយើងមិនមែនមើលឃើញ ទៅពេទ្យមួយគេអត់ទទួល ពីរគេអត់ទទួលបីគេអត់ទទួល ហើយគេនិយាយថាឱ្យតែអ្នករោងចក្រគេអត់ទទួល បើគេអត់ទទួលអ្នកដែលឈឺអីយប់ព្រលប់ទៅណាវិញទៅ ពិបាកត្រង់ថា ស្លាប់ឈឺខ្លាំងធ្ងន់ធ្ងរ បើរើសអើងរោងចក្រអ៊ីចឹងៗហ្នឹង»។
ទាក់ទងករណីនេះ អាស៊ីសេរី មិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី២៥ មេសា ដោយទូរស័ព្ទចូល ពុំមានអ្នកទទួល។ ចំណែកអភិបាលរាជធានីភ្នំពេញ លោក ឃួង ស្រេង បដិសេធអធិប្បាយ ដោយប្រាប់ថា រវល់ប្រជុំ។
ជុំវិញរឿងនេះ នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (CENTRAL) លោក មឿន តុលា មានប្រសាសន៍ថា ការលើកឡើងរបស់ ប្រជាពលរដ្ឋជារឿងត្រឹមត្រូវ ព្រោះសេចក្តីណែនាំរបស់អាជ្ញាធររាជធានីភ្នំពេញ មិនបានពន្យល់ និងណែនាំប្រជាពលរដ្ឋនៅក្នុងតំបន់ក្រហមឱ្យបានច្បាស់លាស់នៅឡើយ។ លោកមើលឃើញថា ប្រជាពលរដ្ឋជាច្រើន បានផ្អើលឆោឡោទៅយកសំណាក ដោយមិនបានរក្សាគម្លាតសុវត្ថិភាព និងមិនគោរពតាមវិធានការក្រសួងសុខាភិបាលនោះទេ ដែលធ្វើឱ្យពួកគាត់ អាចប្រឈមឆ្លងជំងឺកូវីដ-១៩។ លោកទទូចឱ្យអាជ្ញាធរមុនចេញវិធានការណាមួយ គួរគិតពិចារណាឱ្យបានគ្រប់ជ្រុងជ្រោយ មុនប្រកាសឱ្យប្រជាពលរដ្ឋអនុវត្ត។ មន្ត្រីសង្គមស៊ីវិលរូបនេះ ជំរុញឱ្យអាជ្ញាធរគួរពន្យល់ណែនាំប្រជាពលរដ្ឋឱ្យបានយល់ និងបង្កើនទំនុកចិត្ត ដោយជៀសវាងការប្រើប្រាស់វិធានការ បង្ខិតបង្ខំ និងគំរាមកំហែងដល់ពួកគាត់៖ «បំពាក់សម្ភារៈបរិក្ខារឱ្យពេទ្យបានគ្រប់គ្រាន់ដែរ ដើម្បីកុំឱ្យមានហានិភ័យទៅដល់អ្នកដែលគ្នាអត់មាន ឃើញថាពេទ្យអត់ប្តូរស្រោមដៃអ៊ីចឹងវាពិបាកណាស់ពេលហ្នឹង ទាល់តែធ្វើឱ្យមានការរៀបចំនឹងមានទំនុកចិត្តមួយ ប្រជាពលរដ្ឋថាមើលទៅទោះបីជាមិចអត់ឆ្លង ដល់ពេលទៅយកសំណាក បើខ្លួនឯងអត់វិជ្ជមានអត់មានឆ្លងទាំងអស់យកមកផ្ទះទេ»។
មកទល់ពេលនេះ ទោះបីជាអាជ្ញាធររបបក្រុងភ្នំពេញ បិទខ្ទប់ក្រុងភ្នំពេញ និងក្រុងតាខ្មៅនៃខេត្តកណ្តាល អស់រយៈពេលពីរសប្តាហ៍ ព្រមទាំងដាក់តំបន់មួយចំនួនជាតំបន់ក្រហមមិនឱ្យពលរដ្ឋចេញពីផ្ទះក្តី ក៏ស្ថានភាពឆ្លងរាតត្បាតជំងឺកូវីដ-១៩ មិនមានការថមថយដែរ។ ចំនួនអ្នកឆ្លងជំងឺកូវីដ នៅបន្តកើនឡើងខ្លាំងចន្លោះពីជាង ៤រយនាក់ទៅជាង៦នាក់ក្នុងមួយថ្ងៃហើយ។ ប្រជាពលរដ្ឋ និងមន្ត្រីសង្គមស៊ីវិល យល់ថា ការទប់ស្កាត់ជំងឺកូវីដ-១៩ ពុំសូវមានប្រសិទ្ធភាពនេះ ព្រោះអាជ្ញាធររដ្ឋាភិបាល គ្មានវិធានការច្បាស់លាស់ និងធ្វើតែតាមអារម្មណ៍នឹកឃើញ ជាពិសេសវិធានការផ្ដោតតែលើការរឹតបន្តឹងសិទ្ធិសេរីភាព និងការដាក់ទោសទណ្ឌលើប្រជាពលរដ្ឋជាដើម៕
អត្ថបទដែលទាក់ទង
- ពលរដ្ឋនៅតំបន់ក្រហមក្រុងភ្នំពេញខ្លះដាច់ស្បៀងជាច្រើនថ្ងៃហើយពុំមានអាជ្ញាធរជួយពួកគាត់
- ចំនួនអ្នកស្លាប់ដោយសារជំងឺកូវីដ-១៩ បានកើនឡើងដល់៥៦នាក់ បន្ទាប់ពីអ្នកជំងឺប្រាំពីរនាក់ទៀតបានស្លាប់
- ពលរដ្ឋក្រីក្រក្នុងក្រុងសៀមរាបស្នើសុំស្បៀង ក្នុងគ្រាបិទខ្ទប់សង្កាត់ចំនួន៣ក្នុងក្រុង
- អ្នកជំងឺកូវីដម្នាក់ទៀតស្លាប់និងមានករណីឆ្លងថ្មីជិត ៣០០នាក់
- លោក សម រង្ស៊ី ថាកត្តាប្រសិទ្ធភាពនិងសុវត្ថិភាពទើបលោកគាំទ្រឲ្យពលរដ្ឋខ្មែរនាំគ្នាចាក់វ៉ាក់សាំងចិន
- មន្រ្តីសង្គមស៊ីវិលថាអាជ្ញាធរគួរប្រើវិធានការអប់រំជាជាងវិធានការផ្លូវច្បាប់លើការបង្ហោះសារតាមបណ្ដាញសង្គមទាក់ទងរឿងចាក់វ៉ាក់សាំងកូវីដ១៩
- លោក ហ៊ុន សែន ព្រមានបណ្ដេញអ្នកណាដែលមិនព្រមស្ម័គ្រចិត្តចាក់វ៉ាក់សាំងការពារជំងឺកូវីដ-១៩ ចេញពីក្របខ័ណ្ឌមន្រ្តីរាជការ
- ក្រុមសង្គមស៊ីវិលជាង១០០ស្ថាប័នស្នើរដ្ឋាភិបាលជួយអន្តរាគមន៍ពលរដ្ឋរឿងផ្អាកបង់ប្រាក់ធនាគាររយៈពេល៣ខែអំឡុងវិបត្តិកូវីដ
- សង្គមស៊ីវិលស្នើអាជ្ញាធរស៊ើបអង្កេតស៊ីជម្រៅរឿងពលករម្នាក់ស្លាប់ពេលធ្វើចត្តាឡីស័កនៅខេត្តបាត់ដំបង
- អ្នកឃ្លាំមើលសិទ្ធិការងារថា ការព្រមានបញ្ឈប់កម្មករដោយសារមិនព្រមចាក់វ៉ាក់សាំង គឺខុសនឹងគោលការណ៍ស្ម័គ្រចិត្ត