គណបក្សនយោបាយ, នយោបាយ, ព័ត៌មានជាតិ
លោក សូត សុខប្រាថ្នា | ០៦ មីនា ២០២២ | ម៉ោង ២១:៥២
VOD

ទិដ្ឋភាពនៅពីមុខក្រសួងមហាផ្ទៃ ថ្ងៃទី១៥ ខែធ្នូ ឆ្នាំ២០២១។ (ជន ចាន់រ៉ែន)

ក្រសួងមហាផ្ទៃ និងគណៈកម្មាធិការជាតិរៀបចំការបោះឆ្នោត (គ.ជ.ប) បានណែនាំទៅសមាជិក ឃុំ-សង្កាត់ ដែលបានឈរឈ្មោះជាបេក្ខជន សម្រាប់ការបោះឆ្នោតជ្រើសរើសក្រុមប្រឹក្សា ឃុំ-សង្កាត់ ខាងមុខ ​មិនត្រូវប្រើប្រាស់មធ្យោបាយ សម្ភារ និងថវិការបស់រដ្ឋបាលឃុំ-សង្កាត់ ទៅបម្រើសកម្មភាព គណបក្សនយោបាយ ឬឃោសនាបោះឆ្នោតណាមួយនោះឡើយ។

សេចក្តីណែនាំនេះ ធ្វើឡើងស្របពេលដំណើរការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៥នឹងចូលមកដល់ក្នុងពេលប្រមាណ ៣ខែទៀតប៉ុណ្ណោះ។

សេចក្ដីណែនាំរួមរបស់ក្រសួងមហាផ្ទៃ និង គ.ជ.ប ចេញផ្សាយកាលពីថ្ងៃពុធ សប្តាហ៍នេះដែលវីអូឌីទើបទទួលបានឱ្យដឹងថា ​ ​ ថ្នាក់ដឹកនាំឃុំ-​សង្កាត់ទាំងអស់  ​ចាប់ពីពេលបើកយុទ្ធនាការ ឃោសនាបោះឆ្នោត រហូតដល់ថ្ងៃប្រកាសលទ្ធផលនៃការបោះឆ្នោត ត្រូវខិតខំពង្រឹងសាមគ្គីភាព និងសហប្រតិបត្តិការល្អជាមួយគ្នា ដើម្បីបំពេញការងារឱ្យបានត្រឹមត្រូវ តាមគោលការណ៍ច្បាប់ ​ និងត្រូវប្រកាន់ជំហរអព្យាក្រឹត មិនលម្អៀង។

ការណែនាំនេះ ដើម្បីអនុវត្តការងារឱ្យបានត្រឹមត្រូវ តាមវិធានបានចែងក្នុងច្បាប់ ​សម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ និងធានានិរន្តរភាព ការងាររបស់រដ្ឋបាលឃុំ-សង្កាត់ ប្រកបដោយប្រក្រតីភាព ក្នុងរយៈពេលដំណើរការបោះឆ្នោតផងដែរ។

ក្រសួងមហាផ្ទៃ និង គ.ជ.ប បន្ថែមថា មេឃុំ ចៅសង្កាត់ ជំទប់ ចៅសង្កាត់រង និងសមាជិកក្រុមប្រឹក្សាឃុំ សង្កាត់ ដែលបានឈរឈ្មោះជាបេក្ខជន សម្រាប់ការបោះឆ្នោត ជ្រើសរើសក្រុមប្រឹក្សាឃុំ-សង្កាត់ មានសិទ្ធិធ្វើសកម្មភាពយុទ្ធនាការឃោសនាបោះឆ្នោត ដោយស្មើភាពគ្នាដូចបេក្ខជនដទៃទៀត។ យ៉ាងស្ថាប័នទាំងពីរ ហាមឃាត់ដាច់ខាតមិនត្រូវប្រើប្រាស់ឥទ្ធិពលរបស់ខ្លួនដែលមាននៅមេឃុំ ឬសង្កាត់នោះឡើយ។

សេចក្តីណែនាំរបស់ក្រសួងមហាផ្ទៃ និង គ.ជ.ប ថា៖  តែមិនត្រូវប្រើប្រាស់ឥទ្ធិពលរបស់ខ្លួនដែលមាននៅមេឃុំ ចៅសង្កាត់ ជំទប់ ចៅសង្កាត់រង សមាជិកក្រុមប្រឹក្សាឃុំ សង្កាត់ ឥទ្ធិពលនៃរដ្ឋបាលឃុំ សង្កាត់ និងមិនត្រូវប្រើប្រាស់មធ្យោបាយ សម្ភារ និងថវិការបស់រដ្ឋបាល ឃុំ សង្កាត់ ទៅបម្រើសកម្មភាព របស់គណបក្សនយោបាយ ឬបម្រើសកម្មភាពនៃយុទ្ធនាការ ឃោសនាបោះឆ្នោតរបស់គណបក្សនយោបាយណាមួយឡើយ»។

តាមប្រតិទិនរបស់ គ.ជ.ប បានកំណត់ការបរិច្ឆេទនៃការបោះឆ្នោតជ្រើសរើសក្រុមប្រឹក្សាឃុំសង្កាត់ អាណត្តិទី៥ នឹងប្រព្រឹត្តទៅនៅថ្ងៃទីអាទិត្យ ទី៥ ខែមិថុនា ឆ្នាំ២០២២។ ដោយឡែក ពេលវេលាឃោសនាបោះឆ្នោតគឺមានរយៈពេល ១៤ថ្ងៃ គិតចាប់ពីថ្ងៃទី២១ ខែឧសភា រហូតដល់ថ្ងៃទី ៣ ខែមិថុនា ឆ្នាំ២០២២។

បើតាមលិខិតណែនាំរួមរបស់ក្រសួងមហាផ្ទៃ និង គ.ជ.ប បានបន្ដថា ដើម្បីធានានិរន្តរភាពការងាររបស់រដ្ឋបាលឃុំ សង្កាត់ ក្នុងអំឡុងពេលនៃយុទ្ធនាការឃោសនាបោះឆ្នោតថ្នាក់ដឹកនាំមូលដ្ឋាន រួមមាន មេឃុំ ចៅសង្កាត់ ជំទប់ និងចៅសង្កាត់រង ត្រូវពិភាក្សាគ្នារៀបចំ កម្មវិធីបែងចែកវេន ប្រចាំការតាមថ្ងៃនីមួយៗនៅសាលាឃុំ សង្កាត់ ដោយស្មើភាព​គ្នា។ ​

សម្រាប់សមាជិកក្រុមប្រឹក្សាឃុំ សង្កាត់ ដែលទទួលខុសត្រូវ សម្រាប់វេនប្រចាំការ តាមថ្ងៃនីមួយៗ ត្រូវទទួលសម្របសម្រួល កិច្ចការរដ្ឋបាលឃុំ សង្កាត់ប្រចាំថ្ងៃ ការអភិវឌ្ឍ សំណើ និងសំណូមពរផ្សេងៗ របស់ប្រជាពលរដ្ឋរបស់ខ្លួន ស្របតាមគោលការណ៍ច្បាប់ និងលិខិតបទដ្ឋាននានាសម្រាប់គ្រប់គ្រងរដ្ឋបាលឃុំ សង្កាត់ ទាំងនោះ៕

សូមបញ្ជាក់ថា គ្មានផ្នែកណាមួយនៃអត្ថបទ រូបភាព សំឡេង និងវីដេអូទាំងនេះ អាចត្រូវបានផលិតឡើងវិញក្នុងការបោះពុម្ពផ្សាយ ផ្សព្វផ្សាយ ការសរសេរឡើងវិញ ឬ ការចែកចាយឡើងវិញ ដោយគ្មានការអនុញ្ញាតជាលាយលក្ខណ៍អក្សរឡើយ។ ស៊ីស៊ីអាយអឹម មិនទទួលខុសត្រូវចំពោះការលួចចម្លងនិងចុះផ្សាយបន្តណាមួយ ដែលខុស នាំឲ្យយល់ខុស បន្លំ ក្លែងបន្លំ តាមគ្រប់ទម្រង់និងគ្រប់មធ្យោបាយ។ ជនប្រព្រឹត្តិ និងអ្នកផ្សំគំនិត ត្រូវទទួលខុសត្រូវចំពោះមុខច្បាប់កម្ពុជា និងច្បាប់នានាដែលពាក់ព័ន្ធ។