ដោយ មួង ណារ៉េត
2022-03-07
RFA
ស្ដាប់ ឬទាញយកសំឡេង
អាជ្ញាធរបានរុញច្រានបុគ្គលិកណាហ្គាវើលដ៍ជាស្ត្រីម្នាក់បញ្ចូលរថយន្តក្រុងនៅក្នុងការរារាំងពួកគេមិនឲ្យធ្វើកូដកម្មនៅមុខអគារណាហ្គាវើលដ៍នៅថ្ងៃទី៧ ខែមីនា ឆ្នាំ២០២២។ រូប៖ ពលរដ្ឋផ្ដល់ឱ្យ
អាជ្ញាធររាជធានីភ្នំពេញបានចាប់ខ្លួនក្រុមបុគ្គលិកណាហ្គាវើលដ៍ (Naga World) ជិត២រយនាក់ (១៨០) ដាក់ចូលក្នុងរថយន្តក្រុង ដឹកយកទៅដាក់នៅកន្លែងធ្វើចត្តាឡីស័កក្នុងខណ្ឌព្រែកព្នៅឡើងវិញ ខណៈពួកគេចេញធ្វើកូដកម្មជាថ្មី ដើម្បីទាមទារដំណោះស្រាយការងារពីក្រុមហ៊ុនកាស៊ីណូណាហ្គាវើលដ៍។ អ្នកឃ្លាំមើលផ្នែកសិទ្ធិមនុស្ស ស្នើប្រមុខរដ្ឋាភិបាលជួយអន្តរាគមន៍ដោះស្រាយវិវាទការងារដ៏រ៉ាំរ៉ៃមួយនេះ ឲ្យបានឆាប់ ដូចទៅការអំពាវនាវឲ្យមានការចរចាបញ្ចប់សង្គ្រាមនៅអ៊ុយក្រែន។
កងកម្លាំងសមត្ថកិច្ចរាប់សិបនាក់ ដែលនៅប្រចាំការក្បែរអគារក្រុមហ៊ុនបនល្បែងណាហ្គាវើលដ៍ ប្រើហិង្សាទៅលើក្រុមកម្មករណាហ្គាវើលដ៍ ដែលប្រមូលផ្ដុំគ្នាឈរធ្វើកូដកម្មរកដំណោះស្រាយការងារនៅខាងមុខក្រុមហ៊ុនណាហ្គាវើលដ៍ទី២។ សមត្ថកិច្ចចាប់គ្រៀក រុញច្រានពួកគេបញ្ជូលក្នុងរថយន្តក្រុងទាំងកម្រោល ដោយដឹកយកទៅដាក់នៅកន្លែងធ្វើចត្តាឡីស័ក ក្នុងខណ្ឌព្រែកព្នៅដូចសព្វដង។
បុគ្គលិកផ្នែកកាស៊ីណូ ដែលត្រូវអាជ្ញាធរចាប់ខ្លួន២ដង កញ្ញា មៀច ស្រីអូន ប្រាប់វិទ្យុអាស៊ីសេរី នៅថ្ងៃទី៧ ខែមីនា ថាអាជ្ញាធរយកពួកគាត់ទៅទុកចោលក្នុងមណ្ឌលចត្តាឡីស័កក្នុងខណ្ឌព្រែកព្នៅ ដោយឲ្យឈរហាលក្ដៅ គ្មានផ្ដល់បាយទឹកគ្រប់គ្រាន់ និងបិទទ្វារមិនឲ្យពួកគាត់ត្រឡប់ទៅផ្ទះនោះទេ។ កញ្ញា ចាត់ទុកទង្វើអាជ្ញាធរនេះ ថាជាការកាន់ជើងខាងក្រុមហ៊ុនណាហ្គាវើលដ៍ ដោយប្រើប្រាស់គ្រប់មធ្យោបាយ ដើម្បីដាក់គំនាប បំបែកក្រុមកម្មករឲ្យឈប់ចេញទាមទាររកដំណោះស្រាយការងារ។
កញ្ញាយល់ថា អាជ្ញាធរគួររកមធ្យោបាយដោះស្រាយបញ្ចប់ការងារជាមួយថៅកែក្រុមហ៊ុនណាហ្គាវើដល៍ ប្រសើរជាងយកវិធានសុខាភិបាល មកបំបែកក្រុមកម្មករឲ្យឈប់ចេញតវ៉ា៖ «ចោទប្រកាន់ពួកខ្ញុំឥតល្ហែតែម្ដង។ សួរថា ឆន្ទៈក្នុងការស្វែងរកដំណោះស្រាយឲ្យប្រជាពលរដ្ឋដែលត្រូវបានខាងក្រុមហ៊ុនបរទេសកេងប្រវ័ញ្ចនេះ នៅឯណាទៅ បាត់អស់ហើយឬយុត្តិធម៌សម្រាប់ប្រជាជនខ្មែរ។ ឬក៏ឲ្យក្រុមហ៊ុនបរទេសហ្នឹង ស្ពាយច្បាប់ពីស្រុកគាត់មកគ្រប់គ្រងនៅប្រទេសកម្ពុជាមែនបានជាពួកខ្ញុំទាមទាររកអាហារបីពេល និងទាមទារសហជីពនៅក្នុងក្រុមហ៊ុនសោះ។ ហេតុអ្វីបានក្រុមហ៊ុនអត់គោរពសិទ្ធិអ៊ីចឹង។ ក្រុមហ៊ុនព្យាយាមបង្វែរវិវាទពួកខ្ញុំ ឲ្យទៅមានខាងអាជ្ញាធរ ទាំងពួកខ្ញុំជាកម្មករមានវិវាទជាមួយលោកថៅកែតែប៉ុណ្ណោះ»។
បុគ្គលិកផ្នែកកាស៊ីណូម្នាក់ទៀតលោកស្រី ឈិន ឧសភា ឲ្យដឹងថា ពួកគាត់បានធ្វើចត្តាឡីស័ក គ្រប់ចំនួន៧ថ្ងៃ តាមការកំណត់របស់សាលារាជធានីភ្នំពេញហើយ មិនគួរអាជ្ញាធររឹតត្បិតនិងប្រើហិង្សាដាក់ក្រុមកម្មករដែលគ្រាន់តែធ្វើកូដកម្មដោយសន្តិវិធីបែបនេះទេ។ លោកស្រីបន្តថា ការធ្វើកូដកម្មនេះ គឺជាជម្រើសចុងក្រោយបន្ទាប់ពីពួកគាត់បានស្វែងរកដំណោះស្រាយការងារនេះ ពីគ្រប់ស្ថាប័នរដ្ឋពាក់ព័ន្ធអស់៨ខែមកហើយ ប៉ុន្តែមិនមានខាងណាមួយហ៊ានផ្ដល់ដំណោះស្រាយត្រឹមត្រូវតាមច្បាប់ ជូនកម្មករនោះទេ។
បុគ្គលិកធ្វើការផ្នែកកាស៊ីណូ១៤ឆ្នាំរូបនេះ ស្នើសុំលោកនាយករដ្ឋមន្ត្រី ហ៊ុន សែន ជួយអន្តរាគមន៍ដោះស្រាយជម្លោះការងារជាមួយថៅកែក្រុមហ៊ុនណាហ្គាវើលដ៍៖ «សម្រាប់ខ្ញុំជាពលរដ្ឋ ខ្ញុំសូមស្នើសុំទៅសម្ដេចពុកឲ្យគាត់ក្រឡេកមើលកូនចៅដែលនៅក្នុងក្រុមហ៊ុនណាហ្គាវើលដ៍ ព្រោះពួកខ្ញុំត្រូវការឲ្យមានស្ថេរភាពនៅកន្លែងធ្វើការ ឲ្យមានសហជីពនៅកន្លែងធ្វើការ។ សូមឲ្យសម្ដេចជួយសម្រួលខាងក្រសួងពាក់ព័ន្ធឲ្យគាត់ឈរនៅចំណុចកណ្ដាល ដើម្បីជំរុញឲ្យថៅកែណាហ្គាចេញមកដោះស្រាយជាមួយបុគ្គលិកខ្លួន ដើម្បីបញ្ចប់វិវាទនេះ»។
វិទ្យុអាស៊ីសេរីមិនអាចសុំការបំភ្លឺរឿងនេះ ពីអ្នកនាំពាក្យសាលារាជធានីភ្នំពេញលោក ម៉េត មាសភក្ដី និងអ្នកនាំពាក្យក្រសួងការងារលោក ហេង សួរ នៅថ្ងៃទី៧ ខែមីនា នេះបានទេ ដោយហៅទូរស័ព្ទចូល តែពុំមានអ្នកទទួល។
ទាក់ទងនឹងរឿងនេះ ប្រធានសមាគមការពារសិទ្ធមនុស្សអាដហុក (Adhoc) លោក នី សុខា មានប្រសាសន៍ថា ការចាប់ខ្លួនក្រុមកម្មករណាហ្គាវើដល៍ឲ្យផុតពីបរិវេណក្រុមហ៊ុន ដើម្បីកុំឲ្យមានការតវ៉ាពីមួយពេលទៅមួយពេលបែបនេះ គឺមិនមែនជាដំណោះស្រាយអាចបញ្ចប់វិវាទការងារមួយនេះបានទេ។ លោកបន្តថា អាជ្ញាធរគួរដោះលែងតំណាងសហជីពនិងកម្មករទាំង១១នាក់ឲ្យមានសេរីភាពវិញ ហើយឲ្យពួកគេចូលតុចរចាដោះស្រាយជាមួយក្រុមហ៊ុន ដោយភាពស្មោះត្រង់ និងតាមច្បាប់ស្ដីពីការងារ ទើបវិវាទនេះអាចបញ្ចប់ទៅបាន ហើយការចេញតវ៉ានៅខាងមុខក្រុមហ៊ុនក៏មិនមានទៀតដែរ។
លោកយល់ថា រដ្ឋាភិបាលគួរជួយធ្វើអន្តរាគមន៍ដោះស្រាយបញ្ចប់វិវាទការងារនៅក្រុមហ៊ុនណាហា្គវើលដ៍ឲ្យបានឆាប់ ដូចទៅនឹងអ្វីដែលរដ្ឋាភិបាលបានអំពាវនាវឲ្យមានកិច្ចចរចាបញ្ចប់សង្គ្រាមនៅប្រទេសអ៊ុយក្រែន៖ «បើប្រៀបធៀបរឿងហ្នឹងជារឿងតូចទេ ធៀបនឹងជម្លោះរវាងរុស្ស៊ីនិងអ៊ុយក្រែន។ ដូច្នេះខ្ញុំគិតថារដ្ឋាភិបាលមិនមែនអត់សមត្ថភាពរហូតដល់ថា ដោះស្រាយរឿងណាហ្គាវើលដ៍មួយហ្នឹងអត់បានទេ។ អានេះជាឆន្ទៈ ថាតើរដ្ឋាភិបាលចង់ដោះស្រាយបញ្ចប់បញ្ហាហ្នឹងដោយរបៀបណា។ ហ្នឹងជាឆន្ទៈរបស់រដ្ឋាភិបាលដែលត្រូវប្រកាន់ឥរិយាបថធ្វើម៉េច ឲ្យកម្មករគាត់ទទួលបាននូវយុត្តិធម៌»។
ក្រុមកម្មករ ណាហ្គាវើលដ៍ បានចាប់ផ្ដើមកូដកម្មអហិង្សាកាលពីថ្ងៃទី១៨ ខែធ្នូ ឆ្នាំ២០២១ ទាមទារឱ្យក្រុមហ៊ុនទទួលយកកម្មករជាង៣រយនាក់ (៣៧៣) ចូលធ្វើការវិញ។ ប៉ុន្តែមកដល់ពេលនោះ មានថ្នាក់ដឹកនាំ និងសមាជិកសហជីពចំនួន ១១នាក់ហើយ ដែលចូលរួមការតវ៉ានេះ កំពុងជាប់ឃុំនៅពន្ធនាគារព្រៃស ដោយតុលាការចោទប្រកាន់ពីបទញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ពាក់ព័ន្ធនឹងសកម្មភាពធ្វើកូដកម្មក្បែរក្រុមហ៊ុន និងបំពានវិធានការទប់ស្កាត់ការឆ្លងរាលដាលជំងឺកូវីដ-១៩។
កាលពីថ្ងៃសុក្រ ទី៤ ខែមីនា កូដករ២នាក់ផ្សេងទៀត ត្រូវបានតុលាការដាក់ឲ្យស្ថិតក្រោមការឃ្លាំមើល ពាក់ព័ន្ធនឹងការចោទប្រកាន់ថា បានរារាំងកូដករទាំងអស់មិនឲ្យធ្វើសំណាករកជំងឺកូវីដ-១៩។ កម្មករណាហ្គាវើលដ៍ ប្រកាន់ជំហរថា ពួកគេនឹងចេញធ្វើកូដកម្មនៅខាងមុខក្រុមហ៊ុន រហូតដល់មានដំណោះស្រាយការងារ ក្នុងនោះមានការដោះលែងអ្នកជាប់ឃុំ១១នាក់ ឲ្យមានសេរីភាពវិញ ហើយក្រុមហ៊ុនត្រូវទទួលយកកម្មករជាង៣រយនាក់ និងទទួលស្គាល់វត្តមានសហជីពនៅកន្លែងធ្វើការឡើងវិញ ទើបពួកគេបញ្ឈប់សកម្មភាពតវ៉ានេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។