ដោយ សេក បណ្ឌិត
2022.10.06
RFA
ថ្នាក់ដឹកនាំគណបក្សភ្លើងទៀន និងគណបក្សឆន្ទៈខ្មែរ ជួបកាលពីថ្ងៃទី៣ ខែតុលា ឆ្នាំ២០២២។ Photo: RFA
អ្នកនាំពាក្យគណបក្សកាន់អំណាចថា សម្ព័ន្ធភាពរវាងគណបក្សភ្លើងទៀន និងគណបក្សឆន្ទៈខ្មែរ គ្រាន់តែជាការរួបរួមរបស់ក្រុមអ្នកចាញ់និងអ្នកចាញ់ឡើងវិញតែប៉ុណ្ណោះ ហើយគណបក្សកាន់អំណាចមិនព្រួយបារម្ភចំពោះសម្ព័ន្ធភាពនេះទេ ថានឹងអាចទទួលបានជោគជ័យក្នុងការបោះឆ្នោតឡើយ។ បើទោះបីជាយ៉ាងណា មន្ត្រីអង្គការសង្គមស៊ីវិលយល់ថា ការរួបរួមរវាងគណបក្សទាំងពីរ គឺជាសញ្ញាវិជ្ជមានដើម្បីទទួលបានការគាំទ្របន្ថែមពីសាធារណជននៅក្នុងការបោះឆ្នោតនៅក្នុងឆ្នាំ២០២៣ខាងមុខ។
អ្នកនាំពាក្យគណបក្សកាន់អំណាច មិនព្រួយបារម្ភពីការរួបរួមគ្នារវាងគណបក្សភ្លើងទៀន និងគណបក្សឆន្ទៈខ្មែរក្នុងពេលថ្មីៗថា នឹងមានឥទ្ធិពលក្នុងការបោះឆ្នោតឡើយ។ អ្នកនាំពាក្យគណបក្សប្រជាជនកម្ពុជា សុខ ឥសាន ប្រាប់វិទ្យុអាស៊ីសេរីនៅថ្ងៃទី៥ តុលាថា លោកមិនបារម្ភដោយសារតែគណបក្សទាំងពីរមានប្រភពចេញមកពីការរំលាយគណបក្សសង្គ្រោះជាតិ ដែលជាគណបក្សមិនដែលឈ្នះការបោះឆ្នោតម្ដងណាឡើយ៖ «គណបក្សប្រជាជនមិនដែលខ្លាចទេ គណបក្សសង្គ្រោះជាតិពីមុននៅរួមគ្នាជាបាច់ នៅតែចាញ់គណបក្សប្រជាជន ទោះបីឡើងដល់កំពូលហើយហ្នឹងក៏នៅចាញ់គណបក្សប្រជាជនបីដណ្ដប់កៅអី (១៣កៅអី) ។ ឥឡូវគណបក្សសង្គ្រោះជាតិបែកហើយ រហូតដល់៧គណបក្សផ្សេងៗទៀតដែលបង្កើតឡើង ហើយឥឡូវពីរចូលគ្នាវានៅ៥ទៀត មិនចូលគ្នាផង បើមានតែពីរចូលគ្នានោះ រឿងអីដែលខ្លាំង ឬធ្វើឱ្យគណបក្សប្រជាជនព្រួយបារម្ភ ឬភ័យខ្លាច។
ជុំវិញរឿងនេះ ប្រធានគណបក្សឆន្ទៈខ្មែរ លោក គង់ មុនីកា ដែលត្រូវបានព្រះមហាក្សត្របញ្ចប់ មុខតំណែងជាសមាជិកឧត្ដមក្រុមប្រឹក្សាពិគ្រោះ និងផ្ដល់យោបល់មានឋានៈស្មើ ទេសរដ្ឋមន្ត្រី កាលពីថ្ងៃទី៤ ខែតុលា បានថ្លែងថា ការចូលរួមជាមួយគណបក្សភ្លើងទៀន គឺជាគោលបំណងរបស់ប្រជាពលរដ្ឋខ្មែរ។ លោក គង់ មុនីកា បន្ថែមថា ការសម្រេចចិត្តរបស់គណបក្សឆន្ទៈខ្មែរនេះគឺជាគំរូទៅដល់អ្នកប្រជាធិបតេយ្យផ្សេងទៀត ឱ្យគិតពីផលប្រយោជន៍ជាតិជាអាទិភាព និងមិនគិតពីតួនាទីផ្ទាល់ខ្លួនជាធំ ដើម្បីការផ្លាស់ប្ដូរជាវិជ្ជមានសម្រាប់កម្ពុជា៖ «បំណងរបស់ឆន្ទៈខ្មែរ ក៏ដូចជាគណបក្សភ្លើងទៀន គឺចង់ឱ្យអ្នកប្រជាធិបតេយ្យហ្នឹងចង់រួមគ្នា ហើយចង់ឱ្យគណបក្សភ្លើងទៀនហ្នឹង កាន់តែមានកម្លាំងរឹងមាំឡើង ដើម្បីជានិមិត្តរូបនៃការផ្លាស់ប្ដូរជាវិជ្ជមាន នៅក្នុងការបោះឆ្នោត ដូច្នេះគណបក្សឆន្ទៈខ្មែរមិនបានដាក់លក្ខខណ្ឌ មិនបានជជែកអំពីកូតាអ្វី ជាមួយគណបក្សភ្លើងទៀនទេ។ រហូតមកដល់ពេលនេះ គឺយើងធ្វើយ៉ាងណារួមកម្លាំងគ្នា ដើម្បីចាប់ផ្ដើមបំពេញការងារនៅតាមឃុំ តាមស្រុក តាមខេត្ត រាជធានី ទាក់ទាញនូវការគាំទ្រពីប្រជាពលរដ្ឋ ដើម្បីយើងឈានទៅរកជ័យជំនះមួយនៅឆ្នាំ២០២៣ ឱ្យកាន់តែទូលំទូលាយ។
ស្រដៀងគ្នានេះដែរ អនុប្រធានគណបក្សភ្លើងទៀន លោក ថាច់ ស៊ីថា លើកឡើងថា លោករីករាយចំពោះការចូលរួមរបស់គណបក្សឆន្ទៈខ្មែរ ដែលបានគិតគូរពីផលប្រយោជន៍ជាតិជាធំ ដោយមិនបានដាក់លក្ខខណ្ឌអ្វីឡើយក្នុងការរួបរួមគ្នានេះ។ បើទោះបីជាបរិយាកាសប្រកួតប្រជែងនយោបាយមានការគំរាមកំហែងយ៉ាងណាក្ដី លោក ថាច់ ស៊ីថា ថា ការចូលរួមរបស់គណបក្សឆន្ទៈខ្មែរនេះនឹងនាំឱ្យគណបក្សភ្លើងទៀនមានការគាំទ្រកាន់តែច្រើនពីសំណាក់ប្រជាពលរដ្ឋ ដែលអាចនាំឱ្យ គណបក្សភ្លើងទៀនទទួលជោគជ័យក្នុងការបោះឆ្នោតឆ្នាំ២០២៣ខាងមុខ៖ «បើសិនបើយើងឃើញរូបភាព អ្វីដែលគេធ្វើគឺពិបាក ក៏ប៉ុន្តែបើយើងឃើញកម្លាំងមហាជន ប្រជាពលរដ្ឋ អ្នកស្នេហាជាតិរួបរួមគ្នា គឺអាចមានការផ្លាស់ប្ដូរបាន អាហ្នឹងទី១។ ទី២ ឱ្យយើងក្រឡេកមើលប្រទេសនានា លើសកលលោកមួយចំនួន ផ្ដាច់ការខ្លាំងជាងយើងទៅទៀត ប៉ុន្តែដល់ទីបំផុតត្រូវតែមានការផ្លាស់ប្ដូរ។
ជុំវិញរឿងនេះដែរ អ្នកសម្របសម្រួលផ្នែកអង្កេតរបស់អង្គការឃ្លាំមើលការបោះឆ្នោត ខុមហ្វ្រេល (Comfrel) លោក កន សាវាង្ស យល់ឃើញថា ការរួបរួមគ្នារវាងគណបក្សនយោបាយទាំងពីរ គឺជាសញ្ញាវិជ្ជមាន ដែលអាចនាំឱ្យគណបក្សភ្លើងទៀនទទួលបានការគាំទ្របន្ថែមនៅក្នុងការបោះឆ្នោតឆ្នាំ២០២៣ខាងមុខ។ លោកបន្តថា ការរួបរួមមិនត្រឹមតែអាចផ្សំផ្គុំសំឡេងឆ្នោតអ្នកគាំទ្រដែលមានស្រាប់នោះទេ ប៉ុន្តែក៏អាចទាក់ទាញអ្នកគាំទ្រថ្មីៗបន្ថែមទៀតផងដែរ។ ទោះជាយ៉ាងណា លោក កន សាវាង្ស ថា ដើម្បីទទួលបានការគាំទ្របន្ថែមពីប្រជាពលរដ្ឋ គណបក្សទាំងពីរ ត្រូវមានយន្តការច្បាស់លាស់ដើម្បីពង្រឹងសាមគ្គីភាពផ្ទៃក្នុងបក្ស និងបកស្រាយទៅដល់អ្នកគាំទ្រឱ្យបានទូលំទូលាយ អំពីការរួបរួមគ្នានេះ៖ «ទោះបីយ៉ាងណាក៏ដោយ ខ្ញុំនៅតែមើលឃើញថា ការរួបរួមនៅក្នុងដំណើរការ វានៅតែជាធាតុមួយដែលប្រសើរ ជាជាងការចូលរួមមួយដោយឡែក»។
ស្របពេលតែមួយក្នុងការប្រកាសរួបរួមគ្នាឱ្យទៅជាគណបក្សតែមួយនេះ គណបក្សភ្លើងទៀន កាលពីថ្ងៃទី៤ ខែតុលា បានតែងតាំង ប្រធានកិត្តិយសគណបក្សឆន្ទៈខ្មែរ គឺលោក គង់ គាំ ឱ្យជាឧត្ដមទីប្រឹក្សាគណបក្សភ្លើងទៀន។ ជាមួយគ្នានោះ គណបក្សភ្លើងទៀនបានអំពាវនាវឱ្យអ្នកស្រឡាញ់ប្រជាធិបតេយ្យទាំងអស់ ចូលរួមជាមួយគណបក្សភ្លើងទៀន ដើម្បីទទួលបានជ័យជម្នះក្នុងការប្រកួតប្រជែងបោះឆ្នោតជ្រើសរើសតំណាងរាស្ត្រនៅថ្ងៃទី២៣ ខែកក្កដា ឆ្នាំ២០២៣ខាងមុខ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។