ដោយ យ៉ង ចាន់តារា
2023.02.08
RFA
ស្ដាប់ ឬទាញយកសំឡេង
កម្មកររោងចក្រ CAMBO HANDSOME ជាង ៣០០នាក់ នាំគ្នាប្រមូលផ្ដុំតវ៉ា ដើម្បីកុំឱ្យរោងចក្របើកទ្វារទទួលកម្មករថ្មីឱ្យចូលធ្វើការ ពីព្រោះវិវាទការងារមិនទាន់ត្រូវបានដោះស្រាយបញ្ចប់នៅឡើយ។ រូប៖ ហ្វេសប៊ុក
សហជីពស្នើយ៉ាងទទូចដល់ក្រសួងការងារពន្លឿនអន្តរាគមន៍ដោះស្រាយវិវាទការងារនៅរោងចក្រ ខេមបូ ហ៊ែនសាំ (CAMBO HANDSOME LTD.) ស្ថិតនៅសង្កាត់ចោមចៅ ៣ ខណ្ឌពោធិ៍សែនជ័យ រាជធានីភ្នំពេញ។
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ក្រុមកម្មករទាមទារឱ្យភាគីនិយោជកដោះស្រាយសំណងទៅតាមច្បាប់ឱ្យរួចរាល់ជាមុនសិន ប្រសិនបើចង់យកកម្មករថ្មីឱ្យចូលធ្វើការ ឬក៏ចង់យកសម្ភារៈចេញពីរោងចក្រ។ លោកថា និយោជកត្រូវទូទាត់ឱ្យកម្មករទៅតាមច្បាប់ ព្រោះពួកគាត់បានធ្វើការក្នុងរោងចក្រនេះជាយូរមកហើយ ហើយក្រសួងការងារក៏ត្រូវអន្តរាគមន៍រកដំណោះស្រាយឱ្យកម្មករផងដែរ។
ការអំពាវនាវរបស់សហជីពនេះ គឺនៅក្រោយពេលកម្មកររោងចក្រ CAMBO HANDSOME ជាង ៣០០នាក់ បាននាំគ្នាប្រមូលផ្ដុំតវ៉ា កាលពីព្រឹកថ្ងៃទី៧ កុម្ភៈ ដើម្បីកុំឱ្យរោងចក្របើកទ្វារទទួលកម្មករថ្មីឱ្យចូលធ្វើការ ពីព្រោះវិវាទការងារមិនទាន់ត្រូវបានដោះស្រាយបញ្ចប់នៅឡើយ។
វិទ្យុអាស៊ីសេរីមិនអាចទាក់ទងតំណាងរោងចក្រ CAMBO HANDSOME និងអ្នកនាំពាក្យក្រសួងការងារលោក ហេង សួរ ដើម្បីសាកសួររឿងនេះបានទេ កាលពីយប់ថ្ងៃទី ០៧ កុម្ភៈ។
រោងចក្រ CAMBO HANDSOME ជារោងចក្រផលិតសំលៀកបំពាក់ និងមានម្ចាស់ជាជនជាតិកូរ៉េខាងត្បូង។ រោងចក្រនេះមានកម្មករជាង ១ពាន់ ៧រយនាក់ (១.៧០០) ប៉ុន្តែរោងចក្របានប្រកាសបិទអាជីវកម្មរបស់ខ្លួន កាលពីពេលថ្មីៗ នេះ។ បើតាមសហជីព រោងចក្របិទអាជីវកម្មដោយមិនបានជូនដំណឹងត្រឹមត្រូវ ហើយបានបញ្ឈប់កម្មករទាំងអស់ពីការងារដោយមិនបានទូទាត់អត្ថប្រយោជន៍ផ្សេងៗជូនកម្មករឱ្យបានត្រឹមត្រូវតាមច្បាប់ឡើយ។
កាលពីថ្ងៃទី៣១ មករា ភាគីរោងចក្របានប្រកាសអំពីការទូទាត់អត្ថប្រយោជន៍ចំនួន ៤ចំណុចដល់កម្មករ រួមមាន ប្រាក់ខែចុងក្រោយ ប្រាក់ជួសឱ្យការឈប់សម្រាកប្រចាំឆ្នាំ ដែលនៅសល់ ប្រាក់ជួសឱ្យការជូនដំណឹងជាមុន ប្រាក់អតីតភាពការងារឆ្នាំ២០២៣ និងអតីតភាពការងារមុនឆ្នាំ ២០១៩ ដែលនៅសល់។ ក៏ប៉ុន្តែភាគីកម្មករ និងសហជីពទាមទារឱ្យក្រុមហ៊ុនទូទាត់អត្ថប្រយោជន៍ចំនួន ៥ចំណុចអនុលោមតាមច្បាប់ការងារ នោះគឺប្រាក់សំណងជំងឺចិត្តមួយទៀត។
លោក អាត់ ធន់ ឱ្យដឹងថា ក្នុងចំណោមកម្មករជាង ១ពាន់ ៧រយនាក់នោះ មានកម្មករមួយចំនួនបានទទួលយកការទូទាត់របស់និយោជកហើយ ដោយសារមានអ្នកបំផុសព័ត៌មានថា បើមិនព្រមទទួលយកទេ ពួកគាត់នឹងមិនទទួលបានសំណងអ្វីទាំងអស់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។