កម្ពុជា-សង្គម
28/05/2023 – 09:11
ដោយ៖ សឿង ភារៈ
RFI

នៅ​ថ្ងៃ​ទី​២៨​ ខែ​ឧសភា​នេះ​ អង្គការ​ សមាគម​ និង​សហគមន៍​មូលដ្ឋាន​ចំនួន​ ១០​ស្ថាប័ន​បាន​រួមគ្នា​ប្រារព្ធ​ទិវា​បរិស្ថាន ​និង​ជំរុញ​ឲ្យ​មាន​ការ​រួបរួម​ការពារ​បរិស្ថាន ​និង​ធនធាន​ធម្មជាតិ​ដែល​ជា​ទ្រព្យ​សម្បត្តិ​ជាតិ។ ​តំណាង​អ្នក​ចូលរួម​ក៏​បាន​បង្ហាញ​ការ​សោកស្តាយ​ចំពោះ​ការ​រារាំង​ ឬ​ការ​ធ្វើ​ទុក​បុកម្នេញ ​លើ​សកម្ម​ភាព​របស់​យុវជន​ ដែល​ចូល​រួម​ការពារ​បរិស្ថាន​នា​ពេល​កន្លង​មក។

ការប្រារព្ធទិវាបរិស្ថាន © FB កើត សារ៉ាយ

លោក កើត សារ៉ាយ ប្រធានសមាគមសម្ព័ន្ធនិស្សិតបញ្ញវ័ន្តខ្មែរ បានថ្លែងប្រាប់វិទ្យុបារាំងអន្តរជាតិ​ នៅថ្ងៃទី២៨​ ខែឧសភា នេះថា ក្នុងឱកាសប្រារព្ធទិវាបរិស្ថាន នៅព្រឹកនេះ មានសកម្មភាពជិះកង់ផ្សព្វផ្សាយពីការការពារធនធានធម្មជាតិ និងបរិស្ថាន។ ក្រៅពីនេះ ក៏មានការនាំយកញត្តិទៅដាក់នៅក្រសួងបរិស្ថានដែរ ប៉ុន្តែក្រសួងបរិស្ថានមិនបើកធ្វើការទេ នៅថ្ងៃអាទិត្យនេះ ដូច្នេះត្រូវរងចាំរហូត ដល់ថ្ងៃចន្ទ ទី២៩ ខែឧសភា។

តាមរយៈសេចក្តីប្រកាសព័ត៌មាននាថ្ងៃទី២៨ ខែឧសភា អង្គការ សមាគម និងសហគមន៍មូលដ្ឋានចំនួន១០ស្ថាប័នបានផ្តើមរៀបចំការប្រារព្ធទិវាបរិស្ថាន រយៈពេល ៩ថ្ងៃ ចាប់ពីថ្ងៃទី២៨ ខែឧសភា រហូតដល់ថ្ងៃទី៥ ខែមិថុនា ឆ្នាំ២០២៣។

សេចក្តីប្កាសព័ត៌មានបានបញ្ជាក់ថា ការប្រារព្ធទិវាបរិស្ថាន​នាឆ្នាំនេះ មានគោលបំណងសំខាន់ៗចំនួនបួន។ គោលបំណងទាំងនោះរួមមាន៖ ១). ចូលរួមអបអរសាទរទិវាបរិស្ថានពិភពលោកឆ្នាំ២០២៣ ២).ជំរុញលើកទឹកចិត្ដដល់សាធារណជន ភាគីពាក់ព័ន្ធក្នុងការចូលរួមការពារបរិស្ថាន និងគ្រប់គ្រងធនធានធម្មជាតិប្រកបដោយនិរន្ដរភាព ៣).ស្នើដល់ក្រសួងពាក់ព័ន្ធបង្កើនប្រសិទ្ធភាព និងពង្រឹងការដកហូតធនធានធម្មជាតិ ប្រកបដោយតម្លាភាព និង ៤). សំឡេងរបស់សហគមន៍ យុវជន សមាគម អង្គការសង្គមស៊ីវិលដែលធ្វើការលើបញ្ហាធនធានធម្មជាតិ បរិស្ថាន ត្រូវបានរាជរដ្ឋាភិបាលទទួលស្គាល់ និងដោះស្រាយប្រកបដោយការយកចិត្តទុកដាក់។

ការប្រារព្ធទិវាបរិស្ថាននាឆ្នាំនេះ ធ្វើឡើងខណៈមានយុវជនបរិស្ថានមួយចំនួនបានប្រកាសចូលរួមសកម្មភាពការពារបរិស្ថានក្រោមឆ័ត្ររបស់រដ្ឋាភិបាល ប៉ុន្តែក៏មានសកម្មជនបរិស្ថានមួយចំនួនទៀត នៅរក្សាជំហររបស់ខ្លួនដដែល។

លោក កើត សារ៉ាយ ប្រធានសមាគមសម្ព័ន្ធនិស្សិតបញ្ញវ័ន្តខ្មែរបានបង្ហាញការសោកស្តាយនៅពេលក្រសួងចេញលិខិតព្រមាន ក្រោយពីមានយុវជនហ៊ានចូលរួមការពារធនធានធម្មជាតិ ជាក់ស្តែងដូចជាករណីក្រសួងចោទយុវជនបរិស្ថាន ថាធ្វើតាមការរៀបចំរបស់ជនបរទេសជាដើម។

លោកបន្តថា គេគួរតែមានចិត្តរីករាយនៅពេល ដែលមានយុវជនបង្ហាញពីភាពជាម្ចាស់ ដើរតួនាទីចូលរួមការពារទ្រព្យសម្បត្តិជាតិ។ លោកអះអាងថា អាជ្ញាធរដ្ឋក៏ត្រូវទទួលស្គាល់ថា ដើម្បីឲ្យការការពារមានប្រសិទ្ធភាព គឺទាមទារឲ្យមានការចូលរួមពីគ្រប់ភាគីពាក់ព័ន្ធ ទាំងប្រជាពលរដ្ឋ និងអាជ្ញាធរ។​

សូមជម្រាបជូនថា ក្រៅពីការរៀបចំសម្មភាពផ្សព្វផ្សាយ លើកកម្ពស់ការយល់ដឹង និងផ្សព្វផ្សាយពីបញ្ហាបរិស្ថានដល់ប្រជាពលរដ្ឋ ក្រុមអង្គការ សមាគមក៏បានរៀបចំសកម្មភាពមួយចំនួនទៀតដែរ។ សកម្មភាពទាំងនោះរួមមាន វេទិកាសាធារណៈ ការដាំកូនឈើ ការជិះស៊ីក្លូរដើម្បីបរិស្ថាន កិច្ចសន្ទនាជាមួយនឹងគណបក្សនយោបាយស្តីពីគោលនយោបាយបរិស្ថាន និងការរៀបចំទិវាបរិស្ថានពិភពលោក៕