កម្ពុជា-សង្គម
04/06/2023 – 08:46
ដោយ៖ អ៊ឹង ប៊ុនថន
RFI
ពលរដ្ឋខ្មែរកម្ពុជានៅប្រទេសកម្ពុជា និងនៅទូទាំងពិភពលោកបាននាំគ្នាប្រារព្ធទិវាផ្ទេរទឹកដីខ្មែរកម្ពុជាក្រោមទៅឲ្យរដ្ឋអំណាចវៀតណាមគ្រប់គ្រងរយៈពេល៧៤ឆ្នាំមកនេះ។ ការដែលពលរដ្ឋខ្មែរកម្ពុជានាំគ្នារំឮកទិវាប្រវត្តិសាស្ត្រនេះដោយពួកគេលើកឡើងថា រស់នៅក្រោមការគ្រប់គ្រងរបស់រដ្ឋអំណាចវៀតណាម ខ្មែរម្ចាស់ស្រុកមិនមានសិទ្ធិសេរីភាពនោះឡើយ។
ការប្រារព្ធខួបទី ៧៤ ឆ្នាំ ទិវាបារាំងផ្ទេរទឹកដីកម្ពុជាក្រោម ឲ្យវៀតណាមត្រួតត្រា © Internet
នៅប្រទេសកម្ពុជា ពលរដ្ឋខ្មែរកម្ពុជាក្រោមបានប្រារព្ធខួបទី ៧៤ ឆ្នាំ ទិវាបារាំងផ្ទេរទឹកដីកម្ពុជាក្រោម ឲ្យវៀតណាមត្រួតត្រានេះគឺនៅនៅវត្តសាមគ្គីរង្សី រាជធានីភ្នំពេញ។ ពិធីនេះមានការប្រគេនចង្ហាន់ព្រះសង្ឃ បង្សុកូល ឧទ្ទិសកុសលដល់ព្រះវិញ្ញាណក្ខន្ធថ្វាយព្រះវិញ្ញាណក្ខន្ធព្រះមហាវីរក្សត្រ ដួងវិញ្ញាណក្ខន្ធវីរបុរស វីរនារីស្នេហាជាតិ ព្រមទាំងការស្រស់ស្រូបអាហារមហាសាមគ្គីផងដែរ។
គណៈកម្មការរៀបចំ ក៏បានតាំងបង្ហាញរូបភាពឧកញ៉ា សឺន គុយ (ខ្នាតធំ) ដែលជាវីរបុរជាតិខ្មែរក្រោម និង តាំងបង្ហាញសារបណ្ដាំរបស់លោកឧកញ៉ា សឺន គុយ ដែលគេចាត់ទុកថាជាមរត៌កសំខាន់សម្រាប់ប្រជាជាតិខ្មែរ។
ក្រៅពីពិធីបែបសាសនា ក៏មានដែរ ការៀបចំវេទិកាសួរដេញដោលពីសំណាក់ពលរដ្ឋខ្មែរកម្ពុជាក្រោម និងស្ថានភាពដែលពួកគេកំពុងជួបប្រទះ។ រស់នៅក្រោមការគ្រប់គ្រងរបស់រដ្ឋអំណាចវៀតណាមអស់រយៈពេល៧៤ឆ្នាំ ខ្មែរម្ចាស់ស្រុក និយាយថា ពួកគេមិនមានសិទ្ធិសេរីភាពនោះឡើយ ទាំងការប្រតិបត្តិជំនឿសាសនា ការសិក្សារៀនសូត្រប្រវត្តិសាស្ត្រ និងអក្សសាស្ត្រខ្មែរជាដើម។
ជាការកត់សំគាល់ ការប្រារព្ធទិវា៤មិថុនា នៅឆ្នាំនេះគឺធ្វើឡើងព្រមៗគ្នារាប់ទាំងខ្មែរនៅឯនាយសមុទ្រ ដូចជា នៅអូស្ត្រាលី និងនៅសហរដ្ឋអាមេរិក។
នៅទីក្រុងស៊ីដនី ប្រទេសអូស្ត្រាលី ពលរដ្ឋខ្មែរក្រោមរាប់រយនាក់ ដែលបានសិទ្ធិជ្រកកោណ បាននាំគ្នាហែក្បួនអមដោយរបាំឆៃយ៉ាំដើម្បីរម្លឹកខួប៧៤ឆ្នាំ ដើម្បីឲ្យពលរដ្ឋខ្មែរចងចាំនូវប្រវត្តិសាស្ត្រ និងបង្ហាញការដឹងគុណចំពោះបុព្វបុរសខ្មែរក្រោម ព្រមទាំងដាស់តឿនឲ្យពលរដ្ឋបន្តស្មារតីសាមគ្គីទាមទារឲ្យរដ្ឋាភិបាលវៀតណាម ផ្ដល់សិទ្ធិជាជនជាតិដើមភាគតិច ដល់ពលរដ្ឋខ្មែរកម្ពុជាក្រោម នៅឯដែនដីកម្ពុជាក្រោម។
នៅឯសហរដ្ឋអាមេរិកវិញក៏មិនខុសគ្នាដែរ។
ដែនដីកម្ពុជាក្រោមមានខេត្តសរុបចំនួន២១ត្រូវបានអាណានិគមបារាំងកាត់ឲ្យវៀតណាមគ្រប់គ្រងកាលពីថ្ងៃទី៤ ខែមិថុនាឆ្នាំ១៩៤៩។ ជនជាតិដើមខ្មែរក្រោម បានតស៊ូ និងធ្វើពលីកម្មគ្រប់បែបយ៉ាងដើម្បីបុព្វហេតុការពារទឹកដី វប្បធម៌ និងជំនឿសាសនារបស់ខ្លួន នៅដែនដីកម្ពុជាក្រោម បើទោះបីជាមានការគាបសង្កត់ពីសំណាក់អាជ្ញាធរវៀតណាមបែបណាក្តី ខណៈអង្គការសហប្រជាជាតិតែងតែប្រាប់ឲ្យវៀតណាមគោរសិទ្ធិពលរដ្ឋខ្មែរជាជនជាតិដើម៕