ដោយ ម៉ៅ សុធានី
2024.02.16
RFA
សមត្ថកិច្ចខេត្តព្រះសីហនុបង្ហាញមុខជនសង្ស័យជនជាតិតៃវ៉ាន់២នាក់ (សំលៀកបំពាក់ខ្មៅជាប់ខ្នោះដៃ) ក្នុងសន្និសីទសារព័ត៌មាន កាលពីថ្ងៃទី១៥ ខែកុម្ភៈ ឆ្នាំ២០២៤។ រូប៖ ស្នងការនគរបាលខេត្តព្រះសីហនុ
សមត្ថកិច្ចខេត្តព្រះសីហនុចាប់បុរសជនជាតិតៃវ៉ាន់២នាក់ ជាប់សង្ស័យថតវីដេអូភាគក្លែងក្លាយ ពីការចាប់ជំរិត ដើម្បីបង្ហោះតាមអនឡាញ (online) ក្នុងនោះគេហទំព័រមួយមានឈ្មោះ “Goodnight Chicken” ដែលកំពុងពេញនិយមនៅតៃវ៉ាន់។
ក្នុងសន្និសីទសារព័ត៌មាននៅថ្ងៃទី១៥ ខែកុម្ភៈ នេះ អភិបាលខេត្តព្រះសីហនុ លោក គួច ចំរើន អះអាងថា វីដេអូក្លែងក្លាយនេះ បណ្តាលឲ្យប៉ះពាល់ធ្ងន់ធ្ងរដល់កិត្តិនាមរបស់ប្រទេសកម្ពុជាជាពិសេស ខេត្តនៅជាប់សមុទ្រ។ លោកបន្តអះអាងថា ក្នុងវីដេអូនេះ បុរសតៃវ៉ាន់ទាំងពីរនាក់នេះ ធ្វើជារត់គេចចេញពីសណ្ឋាគារដើម្បីរួចផុតពីការព្យាយាមចាប់ជំរិត ហើយពួកគេក៏បានអំពាវនាវសុំជំនួយអន្តរាគមន៍។ លោកថា ក្រោយពីអាជ្ញាធរឃើញវីដេអូនោះផ្សាយភាគទី២ហើយ ក៏បានតាមដានពួកគេ និងបានចាប់ឃុំខ្លួននៅក្នុងបន្ទប់សណ្ឋាគារ។
សមត្ថកិច្ចអះអាងថា បានរកឃើញភស្តុតាងជាច្រើន ដែលបង្ហាញថា ការថតវីដេអូនេះ គឺជាគំរោងការដែលបានរៀបចំកាលពីខែមករា មុនមកដល់ប្រទេសកម្ពុជា កាលពីថ្ងៃទី១១ ខែកុម្ភៈ។
លោក គួច ចំរើន សង្កត់ធ្ងន់ថា សកម្មភាពរបស់ជនជាតិតៃវ៉ាន់ទាំងពីរនាក់នេះ គឺមានបំណងបំផុសបំផុល ធ្វើឲ្យចលាចលដល់សង្គមកម្ពុជា។ លោកបន្តថា ពួកគេបានសារភាពថា ការថតវីដេអូនេះ គឺធ្វើដោយខ្លួនឯង ដើម្បីរកប្រាក់កម្រៃបន្ថែម តាមរយៈការទាក់ទាញអ្នកទស្សនាឲ្យបានច្រើន។ប៉ូលិសខេត្តព្រះសីហនុ កំពុងរៀបចំនីតិវិធីបន្ត ដើម្បីផ្ដន្ទាទោសតាមច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។