កម្ពុជា
29/05/2024 – 14:10
ដោយ៖ ញឹម សុផល
RFI
នៅថ្ងៃទី២៨ ខែឧសភា ឆ្នាំ២០២៤ ប្រទេសកម្ពុជាបានប្រកាសដាក់ឈ្មោះផ្លូវក្រវ៉ាត់ក្រុងទី៣ ដែលមានប្រវែង ៥៣គីឡូម៉ែត្រថាជា «មហាវិថី ស៊ី ជិនពីង»។ ការយកផ្លូវវាងក្រុងដ៏សំខាន់មួយនៅក្នុងប្រទេសកម្ពុជា ទៅដាក់ឈ្មោះមេដឹកនាំចិនបែបនេះ គឺជាការបង្ហាញពីចំណងមិត្តភាពធំធេងសម្រាប់ចិន-កម្ពុជា។ តែអ្នកតាមដាននយោបាយ និងសង្គមមួយចំនួនហាក់បង្ហាញនូវការមិនសប្បាយចិត្ត។
លោក ស៊ី ជីនពីង ជាមេដឹកនាំចិនទី២ ដែលកម្ពុជាយកដាក់ឈ្មោះផ្លូវ បន្ទាប់ពីលោក ម៉ៅ សេទុង
កំណាត់ផ្លូវក្រវ៉ាត់ក្រុងទី៣ ដែលមានប្រវែង ៥៣គីឡូម៉ែត្រ ត្រូវបាននាយករដ្ឋមន្ត្រីកម្ពុជាលោក ហ៊ុន ម៉ាណែត និងឯកអគ្គរដ្ឋទូតចិនប្រចាំកម្ពុជាលោក វ៉ាង វិនធាន ប្រកាសថាឈ្មោះ «មហាវិថី ស៊ី ជីនពីង»។ ជាការកត់សម្គាល់ មហាវិថីស៊ី ជីនពីង នេះ គឺជាឈ្មោះមេដឹកនាំកំពូលចិនទី២ហើយ បន្ទាប់ពីមហាវិថីម៉ៅ សេទុង ដែលឈ្មោះនេះត្រូវបានដាក់នៅលើផ្លូវមួយខ្សែក្នុងរាជធានីភ្នំពេញពីអតីតកាល។
លោកនាយករដ្ឋមន្ត្រី ហ៊ុន ម៉ាណែត បានសរសេរនៅលើហ្វេសប៊ុករបស់លោកថាតាមសំណើរបស់រដ្ឋាភិបាលកម្ពុជា មិត្តចិនបានឯកភាពក្នុងការប្រសិទ្ធនាមផ្លូវក្រវាត់ក្រុងទី៣ ដែលតភ្ជាប់ពីផ្លូវជាតិលេខ១ ទៅផ្លូវជាតិលេខ៤ ជា «មហាវិថី ស៊ី ជីនពីង»។ លោកថាការប្រសិទ្ធនាមផ្លូវក្រវាត់ក្រុងទី៣ មានអត្ថន័យធំធេង សម្រាប់ចំណងមិត្តភាពដែកថែបកម្ពុជា-ចិន។
រដ្ឋមន្ត្រីក្រសួងសាធារណការ និងដឹកជញ្ជូនកម្ពុជាលោក ប៉េង ពោធិ៍នា បានបញ្ជាក់នៅក្នុងសុន្ទរកថារបស់លោកថាគិតមកដល់បច្ចុប្បន្ននេះ គម្រោងស្តារ និងអភិវឌ្ឍន៍ហេដ្ឋារចនាសម្ព័ន្ធផ្លូវថ្នល់-ស្ពាន ដែលប្រើប្រាស់ឥណទានសម្បទាន និងជំនួយឥតសំណងរបស់ចិន ដែលបានសាងសង់រួច និងកំពុងសាងសង់មានទឹកប្រាក់សរុបប្រមាណជាង ៣ ៤០០លានដុល្លារ។
ក៏ប៉ុន្តែលោកបណ្ឌិត មាស នី អ្នកសិក្សាការអភិវឌ្ឈន៍សង្គមបានសរសេរនៅលើហ្វេសប៊ុករបស់លោកថាបើជាលុយជំនួយឥតសំណង នោះការដាក់ឈ្មោះមានភាពសមរម្យ តែទោះបីជាយ៉ាងណាក៏មិនមែនជាលុយរបស់លោក ស៊ី ជិនពីង ដែរ។ លោកថាបើជាលុយកម្ចីវិញ នោះវាកាន់តែវែងឆ្ងាយទៅទៀត។ ក្រៅពីនេះ ក៏មានការធ្វើអត្ថាធិប្បាយខ្លីៗតាមបណ្តាញសង្គមថាការដាក់ឈ្មោះមេដឹកនាំចិនលើផ្លូវស្រុកខ្មែរ គឺជាការយកចិត្តម្ចាស់ជំនួយ និងខ្លះទៀតបង្ហាញនូវការមិនពេញចិត្តចំពោះការដាក់ឈ្មោះផ្លូវស្រុកខ្មែរតាមឈ្មោះមេដឹកនាំកុម្មុយនីស្តជាដើម។
សូមរំលឹកថាក្រៅពីឈ្មោះមេដឹកនាំចិនលោក ស៊ី ជីនពីង និងលោក ម៉ៅ សេទុង ប្រទេសកម្ពុជាក៏បានយកឈ្មោះមេដឹកនាំប្រទេសផ្សេងៗទៀតមកដាក់នៅលើផ្លូវមួយចំនួន ដូចជាវិថីហ្សាលដឺហ្គូល វិថីគីម អ៊ីលស៊ុង វិថីស៊ូកាណូ វិថីអាលីអាឡាតាស់។ល៕