2024.08.16
RFA
ស្ដាប់ ឬទាញយកសំឡេង
ក្រុមកូដករ ណាហ្គាវើលដ៍ (NagaWorld) ប្រមាណ ១០នាក់នាំគ្នាលើកបដាតវ៉ា នៅមុខក្រុមហ៊ុនជាថ្មី នៅថ្ងៃទី១៦ ខែសីហា ឆ្នាំ២០២៤ និងទាមទារថៅកែក្រុមហ៊ុនបនល្បែងមួយនេះ ឱ្យគោរពសិទ្ធិការងារ និងទទួលយកពួកគាត់ចូលធ្វើការវិញ រួមទាំងដោះលែងកញ្ញា ឈឹម ស៊ីថរ ប្រធានសហជីព។ រូបពីពលរដ្ឋ
ក្រុមកូដករ ណាហ្គាវើលដ៍ (NagaWorld) ប្រមាណ ១០នាក់នាំគ្នាលើកបដាតវ៉ា ឱ្យថៅកែក្រុមហ៊ុនបនល្បែងមួយនេះ គោរពសិទ្ធិការងារ និងទទួលយកពួកគាត់ ចូលធ្វើការវិញ រួមទាំងដោះលែងប្រធានសហជីព គឺ កញ្ញា ឈឹម ស៊ីថរ ឱ្យមានសេរីភាព។
មិនខុសពីសព្វមួយដងនោះទេ ក្រុមកូដករណាហ្គាវើលដ៍ នៅថ្ងៃទី១៦ ខែសីហា នាំគ្នាតវ៉ានៅមុខក្រុមហ៊ុនជាថ្មី ដោយបានលើកបដា ដែលសរសេរថា «ពួកយើងត្រូវការដំណោះស្រាយពី ក្រុមហ៊ុនណាហ្គាវើលដ៏» និងទួលឆ្នាំងបាយ ដែលសរសេរអក្សរថា វិវាទឆ្នាំងបាយ ក្នុងន័យថា ការតវ៉ារបស់ពួកគាត់មិនមែនជារឿងនយោបាយនោះទេ គឺជារឿងឆ្នាំងឆ្នាំងបាយ ឬវិវាទការងារសុទ្ធសាធ។
តំណាងកូដករក្រុមហ៊ុន ណាហ្គាវើលដ៍អ្នកនាង ម៉ម សុវឌ្ឍិន ប្រាប់វិទ្យុអាស៊ីសេរី នៅថ្ងៃទី១៦ ខែសីហា ការតវ៉ា នេះ គឺទាមទាររកយុត្តិធម៌ ឱ្យពួកអាចចូលធ្វើការឡើងវិញបាន ដើម្បីមានចំណូលចិញ្ចឹម «ក្រពះ» ហើយនិងទទូចដល់ថៅកែក្រុមហ៊ុន ឱ្យគោរពច្បាប់ការងារឱ្យបានត្រឹមត្រូវ។ អ្នកនាង ក៏បានផ្ញើសារដល់ពលរដ្ឋឱ្យហ៊ានតវ៉ា ប្រឆាំងនឹងទង្វើរំលោភបំពានផ្សេងៗ ពីសំណាក់ថៅកែទុច្ចរិតមួយចំនួន ព្រោះថា នេះ ជាសិទ្ធិសេរីភាព ពុំមែនជាបទល្មើសឡើយ។
អ្នកនាង ម៉ម សុវឌ្ឍិន៖ «ដំណោះស្រាយឱ្យខ្ញុំអត់មានទេ កញ្ញា ឈឹម ស៊ីថរ លះបង់ភាពយុវវ័យរបស់ខ្លួនឯង ជាប់គុកទាំងអយុត្តិធម៌ ដើម្បីការពារផលប្រយោជន៍ខ្មែរ ដើម្បីទាមទារ។ គេបោះឆ្នោតឱ្យគាត់ ដើម្បីឱ្យគាត់ គេគាំទ្រឱ្យគាត់ភាពជាតំណាង ដើម្បីពាំនាំទុក្ខកង្វល់នឹងទៅចរចាជាមួយនឹងថៅកែ។ ឥឡូវនេះ សូម្បីតែប្រាក់ខែទី១៣ ក៏អត់បាន លុយអឹមស៊ី (MC) ក៏អត់បាន លុយអត្ថប្រយោជន៍ផ្សេងៗ ក៏បានដែរ»។
ការតវ៉ារបស់ក្រុមកូដករ នៅមុខក្រុមណាហ្គាវើលដ៍នេះ គេឃើញមានកងកម្លាំងសន្តិសុខរបស់ក្រុមហ៊ុន ៥ ទៅ ៦នាក់ចាំយាមកាម និងដាក់រនាំងបាំង នៅពីមុខក្រុមហ៊ុន។ ចំណែកជនស៊ីវិល ៣ ទៅ ៤នាក់ បានឃ្លាំមើល ពីចម្ងាយ ហើយថតរូប ក្រុមកូដករទាំងនោះផងដែរ។ តែទោះជាយ៉ាងណាក្រុមកូដករ ទាំងនោះបានស្រែកខ្លាំងៗ ថា ការតវ៉ានេះ គឺដើម្បី «ក្រពះ» ពុំមែនជាការស៊ីឈ្នួលតវ៉ា ឬ ជាក្រុមញុះញង់នោះឡើយ។ ពួកគាត់ស្នើដល់ លោក នាយករដ្ឋមន្ត្រី ហ៊ុន ម៉ាណែត ឱ្យជួយរកដំណោះស្រាយបញ្ហាឱ្យបានឆាប់។
ជុំវិញរឿងនេះ វិទ្យុអាស៊ីសេរី ពុំអាចទាក់ទងអ្នកនាំពាក្យ ក្រសួងការងារ និងបណ្ដុះបណ្ដាលវិជ្ជាជីវៈ លោក កក្តា អ៊ន និងអ្នកនាំពាក្យរដ្ឋាភិបាល លោក ប៉ែន បូណា ដើម្បីឆ្លើយតបជុំវិញរឿងនេះ បានទេ នៅថ្ងៃទី១៦ ខែសីហា។
វិវាទការងារនៅក្រុមហ៊ុនបនល្បែងណាហ្គាវើល៍ បានអូសបន្លាយ ជាង ៣ឆ្នាំមកហើយ ប៉ុន្តែ ការតវ៉ារបស់ពួកគាត់ មិនត្រឹមតែមិនទទួលបានដំណោះស្រាយសមរម្យនោះទេ គឺកន្លងទៅ ពួកគាត់បានទទួលរងអំពើហិង្សា ការធ្វើទុក្ខបុកម្នេញពីអាជ្ញាធរ និងការចាប់ខ្លួនប្រធានសហជីពកញ្ញា ឈឹម ស៊ីថរ ដាក់ពន្ធនាគាររហូតមកដល់បច្ចុប្បន្ន។
ទាក់ទិនបញ្ហានេះ ប្រធានសហព័ន្ធសហជីពចំណីអាហារ និងសេវាកម្មកម្ពុជា អ្នកស្រី អ៊ូ ទេពផល្លីន មានប្រសាសន៍ថា ការធ្វើកូដកម្មរបស់បុគ្គលិកណាហ្គាវើលដ៍ មិនត្រឹមតែជាការស្វែងរកយុត្តិធម៌ផ្ទាល់ខ្លួនប៉ុណ្ណោះទេ តែក៏ជាការលើកកម្ពស់ការគោរពច្បាប់ការងារនៅកន្លែងដទៃទៀតផងដែរ។ អ្នកស្រីបន្តថា ភាគីពាក់ព័ន្ធគួរដោះស្រាយវិវាទការងាររបស់សហជីពណាហ្គាវើលដ៍ឱ្យបានឆាប់ៗ ដើម្បីលើកកម្ពស់មុខមាត់រដ្ឋាភិបាលនៅលើឆាកអន្តរជាតិ ជាជាងបន្តទុកឱ្យអង្គការសិទ្ធិមនុស្សជាតិ អន្តរជាតិ និងបណ្ដាប្រទេសនាំមុខលទ្ធិប្រជាធិបតេយ្យ វាយតម្លៃស្ថានភាពគោរពសិទ្ធិពលកម្មនៅកម្ពុជា កាន់តែអាក្រក់ឡើងពីមួយឆ្នាំទៅមួយឆ្នាំ។
អ្នកស្រី អ៊ូ ទេពផល្លីន៖ «តួយ៉ាងឃើញមានការប្រើប្រាស់ប្រព័ន្ធតុលាការដដែល អត់មានអ្វីថ្មី ហើយមានការចាប់ដាក់ពន្ធនាគារ ជាការគំរាមកំហែង ទៅដល់កម្មករនិយោជិកដទៃទៀត កុំឱ្យប្រើប្រាស់សិទ្ធិ។ រឿងនឹងកើតឡើងដដែល តែក៏មិនអាចបញ្ឈប់ការទាមទាររបស់កម្មករនិយោជិកបានដែរ ទោះបីមានការបញ្ឈប់ មានការរឹតត្បិត»។
ក្រុមកូដករលើកឡើងថា បើទោះបីជាយុត្តិធម៌ហាក់នៅឆ្ងាយ ក៏ប៉ុន្តែ ពួកគាត់ពុំដែលអស់សង្ឃឹមឡើយ ហើយនៅតែបន្តធ្វើកូដកម្ម រហូតទទួលបានដំណោះស្រាយពីថៅកែកាស៊ីណូ ណាហ្គាវើលដ៍ បើទោះបីត្រូវចំណាយពេល ៥ឆ្នាំ ទៅ ១០ឆ្នាំទៀតក្ដី ព្រោះថា ការតវ៉ារបស់ពួកគាត់នេះ ពុំមែនដើម្បីបុគ្គល តែដើម្បីមនុស្សជាតិគ្រប់គ្នា ឆ្ពោះទៅរកការលុបបំបាត់អំពើរំលោភបំពាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។