កម្ពុជា
បាតុកម្មប្រឆាំងCLV
18/08/2024 – 16:46
ដោយ៖ ឡាក់ ច័ន្ទតារា
RFI
យុវជនយ៉ាងតិច៥នាក់ទៀត ត្រូវបានសមត្ថកិច្ចចាប់ខ្លួននៅរយៈពេលពីរថ្ងៃចុងក្រោយនេះ ខណៈដែលគម្រោងបាតុកម្មស្នើ ឲ្យរដ្ឋាភិបាលដកខ្លួនពីគម្រោងអភិវឌ្ឍន៍កម្ពុជា ឡាវ វៀតណាម (CLV) ត្រូវបានខកខានទៅវិញ។ យុវជន៤នាក់ ត្រូវបានចាប់ខ្លួននៅថ្ងៃទី១៨ ខែសីហានេះ នៅការិយាល័យសមាគមសម្ព័ន្ធនិស្សិតបញ្ញាវន្តខ្មែរ និងម្នាក់ទៀតជាសិស្សថ្នាក់ទី១២ នៅវិទ្យាល័យមួយក្នុងខេត្តកំពង់ស្ពឺ ក៏ត្រូវបានចាប់ខ្លួន និងបញ្ជូនទៅកាន់តុលាការកាលពីថ្ងៃទី១៧ ខែសីហា។ ជាសរុបគឺមានយុវជនជិត២០នាក់ ត្រូវបានចាប់ខ្លួនពាក់ព័ន្ធនឹងគម្រោងបាតុកម្មនៅថ្ងៃអាទិត្យនេះ។
យុវជន៥នាក់បន្ថែមទៀតត្រូវបានចាប់ខ្លួន ទោះជាគ្មានបាតុកម្មប្រឆាំងគម្រោង CLV-DTA
សមាជិកសមាគមនិស្សិតបញ្ញាវ័ន្តខ្មែរចំនួន៤រូប ដែលត្រូវបានចាប់ខ្លួន រួមមាន កាត់ ស៊ីណាត រៀម ស្រីពេជ្ររតនា ធី ថន និង នឿន ស្រីណែត។ ពួកគេត្រូវបានចាប់ខ្លួន ដោយយោងតាមដីកាពីព្រះរាជអាជ្ញារង អយ្យការអមសាលាដំបូងក្រុងភ្នំពេញ និងដែលបានបញ្ជាឲ្យបិទការិយាល័យរបស់សមាគមនិស្សិតបញ្ញាវ័ន្ត ខ្មែរថែមទៀត។
បើតាម លោក អំ សំអាត នាយកប្រតិបត្តិអង្គការសិទ្ធិមនុស្សលីកាដូ លោកមិនទាន់ដឹងពីមូលហេតុនៃការឃាត់ខ្លួនយុវជនទាំង៤រូបនេះនៅឡើយទេ។ តែលោកក៏មិនភ្លេចបញ្ជាក់ថា សង្គមស៊ីវិលកំពុងតាមដានលើរឿងនេះ ដើម្បីស្វែងរកមូលហេតុ។
យ៉ាងណា នៅខេត្តកំពង់ស្ពឺវិញ មានយុវជនម្នាក់ ជាសិស្សថ្នាក់ទី១២ ក៏ត្រូវបាននគរបាលខេត្តកំពង់ស្ពឺចាប់ខ្លួន និងបញ្ជូនទៅកាន់តុលាការដែរកាលពីថ្ងៃទី១៧ ខែសីហា។ តាមស្នងការនគរបាលខេត្តកំពង់ស្ពឺ មូលហេតុដែលឈានដល់ការចាប់ខ្លួនយុវជនជាសិស្សវិទ្យាល័យរូបនេះ ដោយសាររូបគេបានអំពាវនាវឱ្យយុវជនចូលរួមគាំទ្របាតុកម្មទាមទារឱ្យលុបគម្រោងអភិវឌ្ឍន៍នៅតំបន់ត្រីកោណ CLV-DTA។
សិស្សវិទ្យាល័យរូបនេះ មានឈ្មោះក្នុងបណ្ដាញសង្គម ដា សុវណ្ណមករា និងមានឈ្មោះពិត ធឹម មករា។
ក្នុងរូបភាព៣សន្លឹក ដោយភ្ជាប់ជាមួយភស្ដុតាងដែលសមត្ថកិច្ចប្រមូលបានពីការបញ្ចេញមតិ និងចែករំលែកលើបណ្ដាញសង្គម ស្នងការនគរបាលខេត្តកំពង់ស្ពឺ បញ្ជាក់ថា យុវជន ធឹម មករា បានទទួលស្គាល់ថា ខ្លួនពិតជាបានធ្វើសកម្មភាពកៀងគរ និងញុះញង់ឱ្យមានការតវ៉ាប្រឆាំងនឹងរដ្ឋាភិបាល ដើម្បីឱ្យមានការផ្លាស់ប្ដូរពិតប្រាកដមែន ដោយយកគំរូតាមយុវជននៅក្រៅប្រទេស។
គួរបញ្ជាក់ថា បន្ទាប់ពីទទួលស្គាល់កំហុស សមត្ថកិច្ចបានកសាងសំណុំរឿងបញ្ជូនសិស្សថ្នាក់ទី១២ រូបនេះ ទៅអយ្យការសាលាដំបូងខេត្ត នៅក្នុងបទចោទប្រកាន់ពីបទរួមគំនិតក្បត់ និងបានចេញដីកាឃុំខ្លួនដាក់ពន្ធនាគារភ្លាមៗ៕