ដោយ ហ៊ុំ ចំរើន
2024.09.06
RFA
ស្ដាប់ ឬទាញយកសំឡេង
រូប៖ ហ្វេសប៊ុកលោក ស៊្រុន ស៊្រន
សាច់ញាតិសកម្មជនកិច្ចព្រមព្រៀងសន្តិភាពទីក្រុងប៉ារីសលើកឡើងថា គ្រួសាររបស់ពួកគាត់នៅតែមានឆន្ទៈរឹងមាំ និងផ្ដាំឱ្យយុវជនសិក្សាពីកិច្ចព្រមព្រៀងសន្តិភាពទីក្រុងប៉ារីសទោះបីជារដ្ឋាភិបាលចាប់ពួកគាត់ពន្ធនាគារទាំងអយុត្តិធម៌ក្ដី។ មន្ត្រីឃ្លាំមើលសិទ្ធិមនុស្សយល់ឃើញថា រដ្ឋាភិបាលគួរតែបញ្ឈប់ការធ្វើទុក្ខបុកម្នេញលើសកម្មជនសង្គម ហើយដោះលែងពួកគាត់ឱ្យមានសេរីភាពឡើងវិញ។
បើទោះបីជាសកម្មជនកិច្ចព្រមព្រៀងសន្តិភាពទីក្រុងប៉ារីសកំពុងជាប់ឃុំក្នុងពន្ធនាគារនៅខេត្តផ្សេងគ្នាក្ដី ក៏ពួកគាត់នៅតែមានស្មារតីរឹងមាំក្នុងការចែករំលែកពីបញ្ហាសង្គម និងទាមទាររដ្ឋាភិបាលដោះលែងពួកគាត់ឱ្យមានសេរីភាពឡើងវិញ។
ប្រពន្ធរបស់សកម្មជនកិច្ចព្រមព្រៀងសន្តិភាពទីក្រុងប៉ារសី លោក ស្រ៊ុន ស្រ៊ន គឺលោកស្រី ស៊ឹង សុភីណា ប្រាប់វិទ្យុអាស៊ីសេរីនៅថ្ងៃទី០៦ ខែកញ្ញា ថាលោកស្រីបានទៅជួបសួរសុខទុក្ខប្ដីនៅពន្ធនាគារត្រពាំងផ្លុង ខេត្តត្បូងឃ្មុំ ដោយប្ដីលោកស្រីនៅតែរក្សាគោលជំហររឹងមាំ និងតស៊ូដើម្បីឱ្យសង្គមជាតិមានយុត្តិធម៌ពិតប្រាកដ។ លោកស្រីបន្តថា ប្ដីលោកស្រីមិនបានប្រព្រឹត្តខុសដូចការចោទប្រកាន់របស់តុលាការឡើយដូច្នេះ តុលាការគួរតែដោះលែងប្ដីលោកស្រីឱ្យមានសេរីភាពឡើងវិញ។
លោកស្រី ស៊ឹង សុភីណា៖ «សម្រាប់ខ្ញុំគាត់អត់អ៊ីចឹងទេឃើញថា គាត់ផ្សព្វផ្សាយពីច្បាប់ បង្រៀនពីច្បាប់ដើម្បីឱ្យពលរដ្ឋចេះច្បាប់ ចេះការពារផ្ទះសម្បែង ការពារប្រទេសខ្លួនឯងនិយាយទៅគំនិតអត់មានគំនិតចង់ឱ្យពលរដ្ឋស្អប់មន្ត្រីនិយាយមានស្រឡាញ់មានតែគោរពរួបរួម»។
ដោយឡែក ប្រពន្ធរបស់លោក សាន សិទ្ធិ ដែលកំពុងជាប់ឃុំនៅពន្ធនាគារព្រៃសគឺលោកស្រី ស្វាយ ពៅ ឱ្យដឹងថា ប្ដីលោកស្រីស្រកទម្ងន់អស់១០គីឡូ និងមានជំងឺលើសឈាមដែលត្រូវលេបថ្នាំជាប្រចាំ។ ទោះជាយ៉ាងណាលោកស្រី ស្វាយ ពៅ អះអាងថា ប្ដីលោកស្រីនៅតែមានការប្ដេជ្ញាចិត្តខ្ពស់ក្នុងការទាមទារឱ្យរដ្ឋាភិបាលអនុវត្តច្បាប់ឱ្យមានតម្លាភាព។
លោកស្រី ស្វាយ ពៅ៖ «សុខទុក្ខគាត់ធម្មតាគាត់ហាត់ប្រាណអីអ៊ីចឹងគាត់ស្គមបន្តិចមែនប៉ុន្តែគាត់ស្គមគាត់នៅហ្នឹងមាំគាត់ស្រកអស់១០គីឡូ»។
កាលពីថ្ងៃទី២៤ ខែកក្កដា តុលាការក្រោមការបញ្ជាពីប្រធានព្រឹទ្ធសភា លោក ហ៊ុន សែន បានសម្រុកចាប់ខ្លួនពលរដ្ឋ និងអ្នកធ្វើការងារសង្គមដែលរិះគន់ពីគម្រោងកិច្ចសហប្រតិបត្តិការតំបន់អភិវឌ្ឍន៍ត្រីកោណCLV ចំនួន៥នាក់ដាក់ពន្ធនាគារជាបន្តបន្ទាប់ក្រោមបទចោទ«ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ មនុស្សចំនួន៥នាក់នោះ មាន៣នាក់ជាសកម្មជនកិច្ចព្រមព្រៀងសន្តិភាពទីក្រុងប៉ារីស រួមមាន លោក ស្រ៊ុន ស្រ៊ន កញ្ញា ភឹង សោភា និងលោក សាន សិទ្ធិ ។ ដោយឡែកមនុស្ស២នាក់ទៀតគឺជាសកម្មជនសង្គមលោក ធែល ធីលែន និងអតីតសមាជិកក្រុមទ្រទ្រង់គណបក្សសង្គ្រោះជាតិនៅខេត្តសៀមរាប លោក ចក់ ប៊ានមុន្នី។
ការចាប់ខ្លួនពលរដ្ឋ និងយុវជនចំនួន៥នាក់នេះគឺក្រោយពេលដែលពួកគាត់បានបង្ហោះសារនៅលើបណ្ដេញសង្គមអំពីក្ដីបារម្ភខ្លាចបាត់បង់ផលប្រយោជន៍ជាតិដោយសារកិច្ចសហប្រតិបត្តិការតំបន់ត្រីកោណអភិវឌ្ឍន៍ (CLV) ពោលគឺពួកគាត់មិនបានញុះញង់ឱ្យពលរដ្ឋផ្ដួលរលំរដ្ឋាភិបាលឡើយ។
វិទ្យុអាស៊ីសេរីមិនអាចទាក់ទងអ្នកនាំពាក្យសាលាដំបូងរាជធានីភ្នំពេញលោក អ៊ី រិន្ទ ដើម្បីសុំការបកស្រាយជុំវិញបញ្ហានេះបានទេនៅថ្ងៃទី០៦ ខែកញ្ញា លោកថា កំពុងជាប់រវល់ធ្វើដំណើរ។
ជុំវិញរឿងនេះ នាយកទទួលបន្ទុកកិច្ចការទូទៅនៃអង្គការការពារសិទ្ធិមនុស្សលីកាដូ (LICADHO) លោក អំ សំអាត យល់ឃើញថា សកម្មជនកិច្ចព្រមព្រៀងសន្តិភាពទីក្រុងប៉ារីសមិនបានធ្វើអ្វីខុសច្បាប់នោះទេ គឺពួកគាត់គ្រាន់តែបញ្ចេញមតិ ពីក្ដីកង្វល់របស់ពួកគាត់ជុំវិញគម្រោងកិច្ចសហប្រតិបត្តិការCLV។ លោកទទូចឱ្យរដ្ឋាភិបាលដោះលែងពួកគាត់ឱ្យមានសេរីភាពឡើងវិញដើម្បីបញ្ចៀសការរិះគន់ពីអន្តរជាតិ ដែលនាំឱ្យកម្ពុជាជាប់ឈ្មោះមិនល្អលើឆាកអន្តរជាតិ។
លោក អំ សំអាត៖ «រឿងCLV នេះវាហាក់បីដូចជាគាត់សម្ដែងនូវការព្រួយបារម្ភអ៊ីចឹងយើងឃើញថា នេះគឺជារឿងមួយដែលជាការយល់ឃើញរបស់ពលរដ្ឋម្នាក់ៗផងដែរ។ អ៊ីចឹងចំណុចនេះយើងសង្ឃឹមថា តុលាការនឹងផ្ដល់យុត្តិធម៌សម្រាប់ពួកគាត់តាមផ្លូវច្បាប់ និងតាមនីតិវិធីហើយបើរកទៅឃើញថា ពួកគាត់មិនបានប្រព្រឹត្តអ្វីខុសទេអាហ្នឹងគឺពួកគាត់ត្រូវមានសេរីភាពឡើងវិញ»។
អង្គការជាតិ និងអង្គការអន្តរជាតិ ទាមទារឱ្យរដ្ឋាភិបាលដោះលែងសកម្មជនសង្គម និងពលរដ្ឋទាំងអស់ដែលរដ្ឋាភិបាលបានចាប់ឃុំខ្លួនតាមទំនើងចិត្តឱ្យមានសេរីភាពឡើងវិញ។ ក្រុមអ្នកឃ្លាំមើលសិទ្ធិមនុស្សទាំងនោះ ថា ការចាប់ឃុំខ្លួនមនុស្សតាមអំពើចិត្តគឺជាការរំលោភបំពានទៅលើសេរីភាពបញ្ចេញមតិ និងជាការដឹកនាំប្រទេសបែបផ្ដាច់ការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។