កម្ពុជា
12/11/2024 – 08:59
ដោយ៖ អ៊ឹង ប៊ុនថន
RFI
នៅថ្ងៃទី១២ ខែវិច្ឆិកានេះ អង្គភាពប្រឆាំងអំពើពុករលួយ (ACU) បានសម្រេចបញ្ជូនខ្លួន លោក ឡាយ វិសិដ្ឋ អភិបាលរងខេត្តពោធិ៍សាត់ទៅតុលាការក្នុងសំណុំរឿងឆបោកពាក់ព័ន្ធនឹង លោក លី សាម៉េត។ នេះបើតាមការចុះផ្សាយរបស់សារព័ត៌មានដែលស្និទនឹងរដ្ឋាភិបាលនៅថ្ងៃទី១២ ខែវិច្ឆិកានេះ។ ចំណាត់ការលើមន្ត្រីជាន់ខ្ពស់ខេត្តពោធិ៍សាត់ម្នាក់ថែមទៀតនេះបានធ្វើឲ្យចំនួនជនសង្ស័យក្នុងសំណុំរឿងឆបោកពាក់ព័ន្ធនឹង លោក លី សាម៉េត កើនឡើងសរុបយ៉ាងតិច៦នាក់។
ចាប់ខ្លួនមន្ត្រី និងឧកញ៉ាយ៉ាងតិច៦នាក់ក្នុងសំណុំរឿងឆបោកពាក់ព័ន្ធនឹង លី សាម៉េត
តាមសេចក្តីរាយការណ៍របស់សារព័ត៌មាន Fresh News លោក ឡាយ វិសិដ្ឋ អភិបាលរងខេត្តពោធិ៍សាត់បានសូកប៉ាន់លុយចំនួន៥៧ម៉ឺនដុល្លារដើម្បីចង់បានតំណែងធំជាងនេះ តាមរយៈ លោក លី សាម៉េត និង លោក ឡាច សំរោង។ លោក ឡាច សំរោង ត្រូវបានគេស្គាល់ជាសាកលវិទ្យាធិការនៃសាកលវិទ្យាល័យឥន្ទ្រវិជ្ជា (UI) ដែលមានទំនាក់ទំនងជាមួយលោក លី សាម៉េត ហៅគ្រូមា។
សូមបញ្ជាក់ថា ក្នុងសំណុំរឿងពាក់ព័ន្ធនឹងការសូកប៉ាន់រត់ការចង់បានតំណែងនេះ អង្គភាពប្រឆាំងអំពើពុករលួយក៏បានសម្រេចឃាត់ខ្លួន លោក មួង ឃីម អតីតឧត្តមសេនីយ៍ផ្កាយ៣ និងឧកញ៉ា អ៊ុត ធី ដែលត្រូវបានគេស្គាល់ជាថៅកែឡានដឹកខ្សាច់។ លោក មួង ឃីម និង ឧកញ៉ា អ៊ុត ធី ត្រូវបានតំណាងអយ្យការសម្រេចចោទប្រកាន់ នៅថ្ងៃទី១១ ខែវិច្ឆិកា ឆ្នាំ២០២៤ ពីបទ«ជំនួញឥទ្ធិពលសកម្ម»តាមមាត្រា ៦០៦ នៃក្រមព្រហ្មទណ្ឌ និងមាត្រា ៣២ នៃច្បាប់ស្តីពីការប្រឆាំងអំពើពុករលួយ។
ក្នុងថ្ងៃទី១១ ខែវិច្ឆិកាដដែល លោក លី សាម៉េត ក៏ត្រូវបានចោទប្រកាន់ពីបទ «សមគំនិតក្នុងបទជំនួញឥទ្ធិពលអកម្ម» តាមមាត្រា ២៩ មាត្រា ៥៩៥ មាត្រា ៥៩៦ នៃក្រមព្រហ្មទណ្ឌ និងមាត្រា ៣២ នៃច្បាប់ស្តីពីការប្រឆាំងអំពើពុករលួយ។ គឺជាការចោទប្រកាន់បន្ថែមប្រឆាំងនឹងលោក លី សាម៉េត កាលពីថ្ងៃទី៥ ខែវិច្ឆិកា ពីបទឆបោក ដែលប្រព្រឹត្តិនៅភ្នំពេញ កាលពីខែកញ្ញា និងខែតុលា ឆ្នាំ ២០២២ តាមមាត្រា ៣៧៧ និង៣៧៨ នៃក្រមព្រហ្មទណ្ឌ។
ទន្ទឹមគ្នានេះ លោក ដួង តារា ដែលទើបត្រូវបានបញ្ចប់តំណែងពីរដ្ឋលេខាធិការទីស្តីការគណៈរដ្ឋមន្ត្រី ក៏ត្រូវបានចោទប្រកាន់បន្ថែមទៀតពីបទ «ជំនួញឥទ្ធិពលអកម្ម» តាមមាត្រា ៥៩៥ មាត្រា ៥៩៦ នៃក្រមព្រហ្មទណ្ឌ និងមាត្រា ៣២ នៃច្បាប់ស្តីពីការប្រឆាំងអំពើពុករលួយ ដែលពីមុនត្រូវបានឃុំខ្លួនពីបទ«ឆបោក»ពាក់ព័ន្ធនឹងសំណុំរឿង លោក លី សាម៉េត។
ការចាប់ខ្លួនមន្ត្រី និងឧកញ៉ាយ៉ាងតិច៦នាក់ គិតត្រឹមថ្ងៃទី១២ ខែវិច្ឆិកា ឆ្នាំ២០២៤ បានធ្វើឡើង បន្ទាប់ពី លោក ហ៊ុន សែន បានសរសេរសារនៅលើទំព័រហ្វេសប៊ុករបស់លោក កាលពីថ្ងៃទី០៧ ខែតុលា ឆ្នាំ២០២៤ ថា លោក លី សាម៉េត (គ្រូមា) បានប្រើឈ្មោះរបស់លោកទៅបោកប្រាស់លុយគេរាប់សែន រាប់លានដុល្លារ។ ក្រោយមក លោក ហ៊ុន សែន ក៏បានបញ្ជាឲ្យសមត្ថកិច្ចនាំខ្លួន លោក លី សាម៉េត ទៅតុលាការភ្លាមៗ ក្រោយពីលោកបានទាត់ចោលការសុំទោសរបស់ លោក លី សាម៉េត៕