កម្ពុជា
19/02/2025 – 11:03
ដោយ៖ សឹម ចាន់សំណាង
RFI
អង្គការលីកាដូ បង្ហាញថា ពន្ធនាគារក្នុងប្រទេសកម្ពុជាមានភាពចង្អៀតណែន ដោយសារតែការកើនឡើងយ៉ាងខ្លាំងនៃចំនួនអ្នកជាប់ឃុំ។ តាមអង្គការលីកាដូ បច្ចុប្បន្ននេះ ពន្ធនាគារ ខេត្តកណ្តាល គឺជាពន្ធនាគារដែលមានភាពចង្អៀតណែនជាងគេ ដោយដាក់ជនជាប់ឃុំជាង ៣៩០០ នាក់ ដែលធ្វើឱ្យពន្ធនាគារនេះមានអាត្រាជនជាប់ឃុំដល់ទៅជាង៦៥០ភាគរយ។
លីកាដូ ថាការកើនឡើងនៃចំនួនអ្នកជាប់ឃុំបង្កការចង្អៀតក្នុងពន្ធនាគារកម្ពុជា
នៅក្នុងរបាយការណ៍ ចេញផ្សាយថ្ងៃទី១៨ កុម្ភៈ ឆ្នាំ២០២៥ អង្គការសិទ្ធិមនុស្សលីកាដូ បង្ហាញថា រយៈពេលជាង១៥ឆ្នាំមកនេះ ស្ថានភាពពន្ធនាគារនៅកម្ពុជានៅតែបន្តមានភាពចង្អៀត និងកង្វះធនធាន។ បើតាមលីកាដូ ពន្ធនាគារជាច្រើនកន្លែងមានដាក់ជនជាប់ឃុំចំនួន ១៧៥ភាគរយ ដែលជាចំនួនលើសសមត្ថភាពដែលពន្ធនាគារអាចដាក់អ្នកជាប់ឃុំបាន។ ចំពោះអង្គការលីកាដូ ប្រសិនបើចំនួនអ្នកជាប់ឃុំក្នុងពន្ធនាគារនៅតែរក្សាអត្រាកំណើនបែបនេះ កម្ពុជានឹងក្លាយជាប្រទេសមួយដែលមានប្រព័ន្ធពន្ធនាគារមានភាពចង្អៀតណែនបំផុតនៅក្នុងពិភពលោក។
គួរជ្រាបថា បើតាមរបាយការណ៍អង្គការលីកាដូគិតត្រឹមចុងឆ្នាំ២០២៤ ពន្ធនាគារចំនួន ១៨ ក្នុងចំណោមពន្ធនាគារទាំង ១៩ កន្លែង បានដាក់ជនជាប់ឃុំលើសពីសមត្ថភាពរបស់ខ្លួន ដោយក្នុងនោះមានពន្ធនាគារចំនួន ១១ កន្លែង ដាក់ជនជាប់ឃុំយ៉ាងតិចចំនួន ២០០% នៃសមត្ថភាពដែលអាចដាក់បាន។ ដោយឡែក ទិន្នន័យសង្ខេបនៃរបាយកាណ៍ពន្ធនាគារក្នុងពិភពលោក (World Prison Brief) របស់វិទ្យាស្ថានសម្រាប់ការស្រាវជ្រាវគោលនយោបាយយុត្តិធម៌ និងបទល្មើស បានចាត់ថ្នាក់ប្រទេសកម្ពុជា ជាប្រទេសដែលមានពន្ធនាគារមានស្ថានភាពចង្អៀតណែនជាងគេបំផុតទីពីរក្នុងពិភពលោក តាំងពីខែកក្កដា ឆ្នាំ២០២៣មកម្ល៉េះ។
សម្រាប់កម្ពុជា លីកាដូ បានយកករណីពន្ធនាគារខេត្តកណ្តាល គឺជាពន្ធនាគារដែលមានភាពចង្អៀតណែនជាងគេ ដោយបានដាក់ជនជាប់ឃុំជាង ៣៩០០នាក់ ខណៈទំហំពន្ធនាគារអាចដាក់បានត្រឹមតែ ៦០០ នាក់ប៉ុណ្ណោះ។ បើតាមលីកាដូ ភាពណែនចង្អៀតក្នុងពន្ធនាគារ គឺបណ្តាលមកពីការឃុំខ្លួនបណ្តោះអាសន្នរង់ចាំសវនាការរបស់ជនជាប់ចោទ ឬ ជនជាប់ចោទដែលកំពុងរង់ចាំសាលក្រមចុងក្រោយ។ លោក ឃៀង សុណាឌីន អ្នកនាំពាក្យអគ្គនាយកដ្ឋានពន្ធនាគារប្រាប់វិទ្យុបារាំងអន្តរជាតិ RFI នៅថ្ងៃទី១៩ កុម្ភៈនេះថា កន្លងទៅអគ្គនាយកដ្ឋានពន្ធនាគារគឺបានអនុញ្ញាតឲ្យអង្គការលីកាដូ ចុះទៅតាមពន្ធនាគារគោលដៅមួយចំនួនដែលផ្តោតលើបញ្ហាស្មារតីផ្នែកច្បាប់ និងសុខភាពប៉ុណ្ណោះ ដោយពុំមានការអនុញ្ញាតឲ្យត្រួតពិនិត្យសមត្ថភាពផ្ទុករបស់ពន្ធនាគារនោះទេ។ ដោយឡែកចំពោះការលើកឡើងថា ពន្ធនាគារខេត្តកណ្តាល គឺជាពន្ធនាគារដែលមានភាពចង្អៀតណែនជាងគេត្រូវបានលោក ឃៀង សុណាឌីន ចាត់ទុកថា គឺទិន្នន័យមិនពិត ពោលជាចំនួនអ្នកជាប់ឃុំតាំងពីប្រមាណ៥ឆ្នាំ មុនការពង្រីកហេដ្ឋារចនាសម័្ពន្ធនៅទីនោះ។
ដើម្បីដោះស្រាយបញ្ហាភាពចង្អៀនណែនក្នុងពន្ធនាគារ លីកាដូ លើកឡើងថា គួរកម្រិតការឃុំខ្លួនបណ្តោះអាសន្នរង់ចាំសវនាការ លើកលែងតែក្នុងករណីចាំបាច់ ដូចមានចែងក្នុងច្បាប់។ ការធ្វើឱ្យប្រសើរឡើងនូវលក្ខខណ្ឌរស់នៅក្នុងពន្ធនាគារ ដោយធានាថាគ្រប់ជនជាប់ឃុំទាំងអស់ទទួលបាននូវអាហារដែលមានជីវជាតិគ្រប់គ្រាន់ សេវាថែទាំសុខភាព ការសួរសុខទុក្ខពីគ្រួសារ និងឱកាសអភិវឌ្ឍន៍ខ្លួនទៅតាមអាយុរបស់ជនជាប់ឃុំ ធានាថាពន្ធនាគារទូទាំងប្រទេសគោរពតាមបទដ្ឋានអប្បបរមារបស់អង្គការសហប្រជាជាតិសម្រាប់ដាក់អ្នកទោស និងវិធានរបស់អង្គការសហប្រជាជាតិចំពោះវិធានការឃុំខ្លួន និងវិធានការមិនឃុំខ្លួនសម្រាប់អ្នកទោសជាស្ត្រី ដើម្បីលើកកម្ពស់សេចក្តីថ្លៃថ្នូរ សុវត្ថិភាព និងសុខុមាលភាពរបស់ជនដែលត្រូវបានតុលាការដកហូតសិទិ្ធសេរីភាពដោយសារប្រព្រឹត្តបទល្មើស៕