ពុធ 13 មិថុនា 2012
ទស្សនាវដ្តីសារព័ត៌មានសេរី
តាមសហជីពសេរីកម្មករ នៃព្រះរាជាណាចក្រកម្ពុជាបានឲ្យដឹងថា លោក ផុន បូរ៉ាណែត អតីតប្រធានរដ្ឋបាលនៃរោងចក្រតេយ៉ុងមានទីតាំងស្ថិតនៅភូមិបុរីកម្មករ ឃុំបែកចាន ស្រុកអង្គស្នួល ខេត្តកណ្តាល ដែលទើបត្រូវបញ្ឈប់ កំពុងតែភ័យខ្លាចពីសុវត្ថិភាពព្រោះតែមានជនមិនស្គាល់មុខបានគំរាមសម្លាប់តាមទូរស័ព្ទកាលពីរំលងអាធ្រាត្រចូលថ្ងៃទី១៣ ខែមិថុនា។
ក្នុងពាក្យបណ្តឹងដាក់ទៅកាន់នាយប៉ុស្តិ៍នគរបាលរដ្ឋបាលបែកចាន លោក ផុន បូរ៉ាណែត បានរៀបរាប់ថា កាលពីវេលាម៉ោង ០០ និង២៨នាទីថ្ងៃទី១៣ ខែមិថុនា ឆ្នាំ២០១២ មានជនមិនស្គាល់មុខបានទូរស័ព្ទមកលោក ដោយប្រើលេខ 0883827719 ហើយបាននិយាយថា «អ្ហែងប្រយ័ត្នងាប់ … អ្ហែងចាំតែងាប់ទៅ អញនៅក្បែរនេះទេ»។ មួយសន្ទុះក្រោយមក ក៏មានមនុស្សប្រុសចំនួន២នាក់បានជិះម៉ូតូមកឈប់នៅពីមុខផ្ទះរបស់លោកដោយក្នុងដៃមានកាន់កាំភ្លើង ហើយបានគំរាមថា «ប្រយ័ត្នងាប់»។
គួររំលឹកថា លោក ផុន បូរ៉ាណែត ត្រូវបានរោងចក្រតេយ៉ុងបញ្ឈប់ពីការងារកាលពីថ្ងៃអាទិត្យដោយពុំមានមូលហេតុ ដែលវាបានធ្វើឲ្យក្រុមកម្មករប្រមាណ៦០០នាក់ធ្វើកូដកម្មកាលពីថ្ងៃម្សិលមិញដើម្បីទាមទារឲ្យអតីតប្រធានរដ្ឋបាលរូបនេះត្រឡប់ចូលធ្វើការវិញ៕