ថ្ងៃទី 16 មិថុនា 2012
ដោយ: លីនណា
CEN
ភ្នំពេញ: គណកម្មាធិការជាតិរៀបចំការបោះឆ្នោត ហៅកាត់ គ.ជ.ប. នៅព្រឹកថ្ងៃទី១៦ ខែមិថុនា ឆ្នាំ២០១២ បានបើកសវនការលើបណ្តឹងរបស់គណបក្សប្រជាជនកម្ពុជា ដែលបានប្តឹងជំទាស់លើសេចក្តីសម្រេចរបស់គណៈកម្មការរៀបចំការបោះឆ្នោត(គជប) រាជធានីភ្នំពេញ ដែលបានសម្រេចពិន័យលោក សម រង្ស៊ី ចំនួន១០ លានរៀល។ សវនាការ បានសម្រេចបដិសេធចោលបណ្ដឹងរបស់លោក ព្រហ្ម គន្ធ និងបណ្ដឹងរបស់លោក ថាច់ ឃុនសារិន ព្រោះផ្ទុយនឹងគតិច្បាប់ និងតម្កល់សេចក្ដីសម្រេចលេខ ០០១/១២ គធប.ស.ស.រ ចុះថ្ងៃទី១១ ខែមិថុនា ឆ្នាំ២០១២ របស់ គជប រាជធានីភ្នំពេញ ទុកជាបានការពេញទាំងមូល។
នៅក្នុងសវនាការមានលោក អ៊ឹម សួស្តី ប្រធានគណៈកម្មាធិការជាតិរៀបចំការបោះឆ្នោត ជាប្រធានអង្គជំនុំជម្រះ និងមានសមាជិកចំនួន៨ រូប សម្រាប់ប់សួរដេញដោលទៅលើអ្នកពាក់ពន្ធ នៅក្នុងសវនាការ។ ចំណែកគណបក្ស សម រង្ស៊ី តំណាងដោយលោក ថាច់ ឃុនរិន ហើយគណបក្សប្រជាជនកម្ពុជា តំណាងដោយលោក ព្រហ្ម គន្ធ និងមានមេធាវីមួយរូប។
សវនាការនោះ គឺរៀបចំឡើងតាមបណ្តឹងរបស់គណបក្សប្រជាជានកម្ពុជា ដែលបានប្តឹងជំទាស់ទៅនឹងសេចលក្តីសម្រេចរបស់ គជប រាជធានីភ្នំពេញ ដែលបានសម្រេចពិន័យលោក សម រង្ស៊ី ចំនួន១០ លានរៀល ដោយតំណាងគណបក្សប្រជាជនកម្ពុជាអះអាងថា ការពិន័យ១០ លានរៀលនោះ វាមិនសមទៅនិងទង្វើដែលលោក សម រង្ស៊ី បានប្រព្រឹត្តការជេរប្រមាថនោះទេ។
ចំណែកគណបក្សសម រង្ស៊ី បានប្តឹជំទាស់ថា សេចក្តីសម្រេចរបស់គណៈកម្មការរៀបចំការបោះឆ្នោតរាជធានីភ្នំពេញ ដែលបានសំរេចពិន័យលោក សម រង្ស៊ី ចំនួន១០ លានរៀលនោះ មិនត្រឹមត្រូវ ពីព្រោះនៅក្នុងសវនាការរបស់ គជប រាជានីភ្នំពេញ កាលពីថ្ងៃទី១១ ខែឧសភា នោះ ដើមបណ្តឹងមិនបានបង្ហាញភស្តុតាងច្បាស់លាស់។
តាមសេចក្ដីប្រកាសលទ្ធផល នៃសវនាការរបស់ គ.ជ.ប. បានបង្ហាញថា សំណុំរឿងទាំង ២ខាងលើនេះ មានអង្គហេតុដូចគ្នា ក្រុមប្រឹក្សាជំនុំជម្រះបានសម្រេចបញ្ចូលសំណុំរឿងនេះ ជារឿងតែមួយ (លេខ ០៤៥/១២)។ ក្រោយពីបានស្ដាប់ដើមបណ្ដឹង ចុងចម្លើយ និងបានពិនិត្យពិចារណាលើអង្គហេតុរួចមក ក្រុមប្រឹក្សាជំនុំជម្រះបានសម្រេចបដិសេធចោលបណ្ដឹងរបស់លោក ព្រហ្ម គន្ធ និងបណ្ដឹងរបស់លោក ថាច់ ឃុនសារិន ព្រោះផ្ទុយនឹងគតិច្បាប់។ តម្កល់សេចក្ដីសម្រេចលេខ ០០១/១២ គធប.ស.ស.រ ចុះថ្ងៃទី១១ ខែមិថុនា ឆ្នាំ២០១២ របស់ គជប រាជធានីភ្នំពេញ ទុកជាបានការពេញទាំងមូល។ នៅក្នុងសេចក្ដីប្រកាសបានបញ្ជាក់ថា “សេចក្ដីសម្រេចនេះ ជំនុំជម្រះនឹងប្រកាសជាសាធារណៈនៅចំពោះគូភាគី និងជាសេចក្ដីសម្រេចចុងក្រោយ”។
សូមរម្លឹកថា នៅថ្ងៃចុងបញ្ចប់នៃការឃោសនាបោះឆ្នោតក្រុមប្រឹក្សាឃុំ-សង្កាត់អាណត្តិ ទី៣ ឆ្នាំ២០១២(១មិថុនា២០១២) គណបក្សសម រង្ស៊ី បានធ្វើការចាក់បញ្ចាំងរូបភាព និងសំឡេងលោក សម រង្ស៊ី តាមរយៈវីដេអូខិនហ្វ្រើរិនពីក្រៅប្រទេស នៅសួនច្បារមុខវត្តបទុមវត្តី ទល់មុខតុលាការកំពូល អតីតរដ្ឋសភាចាស់ ដោយបានជេរប្រមាថសម្តេចនាយករដ្ឋមន្ត្រី ហ៊ុន សែន ថា រដ្ឋាភិបាលហ៊ុន សែន ក្បត់ជាតិ បានធ្វើសម្បទានដីទៅឲ្យក្រុមហ៊ុនឯកជនទាំងជាតិ ទាំងបរទេស ដល់ ៩៩ឆ្នាំនោះ គឺក្បត់ជាតិ រដ្ឋាភិបាលសម រង្ស៊ី ឆ្នាំក្រោយនឹងយកដីនោះមកវិញ។ នៅថ្ងៃទី៦ ខែមិថុនា តំណាងគណបក្សប្រជាជនកម្ពុជា លោក ព្រហ្ម គន្ធ បានដាក់ពាក្យបណ្ដឹងមក គជប រាជធានីភ្នំពេញ ហើយត្រូវបានគណៈកម្មការរៀបចំការបោះឆ្នោតរាជធានីភ្នំពេញបើកសវនាការ និងបានសម្រេចកាលពីថ្ងៃទី១១ ខែមិថុនា ឆ្នាំ២០១២ សម្រេចផ្តន្ទាទោសឈ្មោះ សម រង្ស៊ី ឲ្យពិន័យជាប្រាក់ចំនួន ១០.០០០.០០០(ដប់លានរៀល) ពីបទជេរប្រមាថនាយករដ្ឋមន្ត្រី៕