ដោយ ខែ សុណង
2012-07-06
វិទ្យុអាស៊ីសេរី
ពលរដ្ឋ និងសមាជិកសហគមន៍ការពារព្រៃឈើភូមិតាក្រី ឃុំតាក្រី ស្រុកកំរៀង ខេត្តបាត់ដំបង បានចោទប្រកាន់ថា ប្រធានសហគមន៍ការពារព្រៃឈើ បានឃុបឃិតគ្នាជាមួយមន្ត្រីរដ្ឋបាលព្រៃឈើ និងប៉ូលិសប៉ុស្តិ៍ ចាប់យកឈើដែលជនល្មើសកាប់ ទៅលក់ចែកលុយគ្នា។
សមាជិកសហគមន៍ការពារព្រៃឈើម្នាក់ដែលសុំមិនបញ្ចេញឈ្មោះ បានឲ្យដឹងនៅថ្ងៃទី៥ កក្កដា ថា ប្រធានសហគមន៍ និងជាមេភូមិតាក្រី ឈ្មោះ សោម សាលួត អនុប្រធានសហគមន៍ ឈ្មោះ ម៉ី យ៉ុត និងសមាជិកសហគមន៍ឈ្មោះ អួន ទុំ បានយកឈើចម្រុះប្រមាណជាង ១ម៉ែត្រគីប ដែលចាប់ពីជនល្មើសកាប់ឈើក្នុងសហគមន៍ កាលពីថ្ងៃទី២៣ ខែមិថុនា ទៅលក់ចែកលុយគ្នាជាមួយមន្ត្រីរដ្ឋបាលព្រៃឈើ ឈ្មោះ លត សុធី និងមេប៉ូលិសប៉ុស្តិ៍ម្នាក់ទៀតឈ្មោះ ឆាង។
សមាជិកសហគមន៍ការពារព្រៃឈើ៖ «ជនល្មើសទៅកាប់ឈើក្នុងព្រៃសហគមន៍ ដល់ហើយប៉ូលិសឃុំហ្នឹង ហើយនឹងរដ្ឋបាលព្រៃឈើក្នុងភូមិតាក្រី ហ្នឹង គាត់ចាប់បានជនល្មើសហ្នឹង។ គាត់យកទៅបាត់ អត់មានឲ្យខាងសហគមន៍ហ្នឹងដឹងថាឈ្មោះអីៗទេ យកទៅបាត់។ ហើយក៏ដោះស្រាយគ្នាតាមរយៈលុយកាក់មិនដឹង ក៏លែងជនល្មើសទៅអស់ទៅ។ ដែលឈើកាប់បាននោះ គាត់ប្រគល់មកឲ្យសហគមន៍។ ប្រធានសហគមន៍ហ្នឹង មានគ្នាតែ៣នាក់ទេ គាត់អត់បានប្រកាសប្រជុំប្រាប់សមាជិកអីទេ។ គាត់នាំគ្នាដឹកទៅអស់ ហើយគាត់យកទៅលក់បាន គាត់ចែកគ្នាជាមួយប៉ូលិស និងរដ្ឋបាលព្រៃឈើអស់ទៅ អត់មានប្រាប់សមាជិកសហគមន៍ថា យើងយកឈើមកធ្វើអីៗទេ»។
ប៉ុន្តែប្រធានភូមិតាក្រី និងជាប្រធានសហគមន៍ការពារព្រៃឈើ លោក សោម សាលួត បានបដិសេធចំពោះការចោទប្រកាន់នេះ។ លោកអះអាងថា ថវិកាដែលបានមកពីការលក់ឈើនោះ គឺពួកគាត់បានយកទៅឲ្យថ្លៃប្រេងដឹកជញ្ជូនឈើចេញពីព្រៃអស់ហើយ៖ «អ្នកដែលកាប់ឈើហ្នឹង មានខ្នងមានអីចឹងណា។ សមាជិកអត់ហ៊ានទៅដឹកទេ។ ដល់ពេលហើយ ជួលគោយន្តគេទៅដឹកវិញ។ ដល់អាទៅ លក់ឲ្យថ្លៃម៉ាស៊ូតអ្នកដឹកអីហ្នឹងឯង»។
ពាក់ព័ន្ធបញ្ហានេះ មន្ត្រីរដ្ឋបាលព្រៃឈើសង្កាត់កំរៀង លោក លត សុធី មានប្រសាសន៍ថា ពុំមានដូចការលើកឡើងពីសមាជិកសហគមន៍នោះទេ។ ហើយសំណុំរឿងនេះ លោកបានបញ្ជូនទៅផ្នែករដ្ឋបាលព្រៃឈើអស់ហើយ៖ «អត់ទេ អត់មានរឿងចែកលុយគ្នាទេអាហ្នឹង។ ឲ្យគាត់អាទៅ ហើយក៏ដូចជាឲ្យថ្លៃសាំងហ្នឹងទៅ មិនដឹងប៉ុន្មានថ្ងៃ ជិត១អាទិត្យ។ ទេខ្ញុំ អារឿងលុយអីៗ ខាងគាត់ទេ»។
ប្រជាពលរដ្ឋភូមិតាក្រី ម្នាក់ថ្លែងថា ករណីស្រដៀងគ្នានេះមិនមែនជាលើកទី១ទេ។ ករណីល្មើសលើកនេះ ប្រធានសហគមន៍នេះមិនគោរពតាមស្មារតីនៃកិច្ចប្រជុំដែលបានឯកភាពគ្នាថា យកឈើនោះមកសាងសង់ស្នាក់ការជួបប្រជុំគ្នានោះឡើយ តែបែរជាយកឈើដែលជនល្មើសកាប់បំផ្លាញ ទៅលក់ចែកលុយគ្នាទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។