ដោយ ដែន អយុធ្យា
2012-07-06
វិទ្យុអាស៊ីសេរី
លោក អ៊ឹម សួស្តី ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងក្នុងសន្និសីទកាសែត នាទីស្ដីការ គ.ជ.ប ព្រឹកថ្ងៃសុក្រ ទី៦ ខែកក្កដា ថា ចំនួនអាសនៈរដ្ឋសភានីតិកាលទី៥ បានកំណត់ត្រឹមចំនួន ១២៣អាសនៈ។
លោក អ៊ឹម សួស្តី (ឆ្វេង) ប្រធានគណៈកម្មាធិការជាតិរៀបចំការបោះឆ្នោត (គ.ជ.ប) ថ្លែងក្នុងសន្និសីទកាសែត នាទីស្ដីការ គ.ជ.ប កាលពីព្រឹកថ្ងៃសុក្រ ទី៦ ខែកក្កដា ឆ្នាំ២០១២។
RFA/Den Ayuthea
ការកំណត់ចំនួនអាសនៈនេះ យោងតាមព្រះរាជក្រមចុះថ្ងៃទី១៤ ខែមករា ឆ្នាំ២០១២ ដែលប្រកាសឲ្យប្រើច្បាប់ស្តីពីការកំណត់អាសនៈរដ្ឋសភាសម្រាប់នីតិកាលទី៥។
ច្បាប់នេះត្រូវបានរដ្ឋសភានីតិកាលទី៤ អនុម័ត នៅថ្ងៃទី២១ ខែធ្នូ ឆ្នាំ២០១១ និងត្រូវបានព្រឹទ្ធសភាយល់ស្របនៅថ្ងៃទី៣០ ខែធ្នូ ឆ្នាំ២០១១។
លោក អ៊ឹម សួស្តី ឲ្យដឹងថា ចំនួនអាសនៈទាំង ១២៣ ត្រូវបែងចែកតាមមណ្ឌលបោះឆ្នោតក្នុង ២៤ រាជធានី-ខេត្ត ទូទាំងប្រទេស ក្នុងនោះ៖
– មណ្ឌលខេត្តបន្ទាយមានជ័យ មានចំនួន ៦អាសនៈ
– មណ្ឌលបាត់ដំបង មានចំនួន ៨អាសនៈ
– មណ្ឌលកំពង់ចាម មានចំនួន ១៨អាសនៈ
– មណ្ឌលកំពង់ឆ្នាំង មានចំនួន ៤អាសនៈ
– មណ្ឌលកំពង់ស្ពឺ មានចំនួន ៦អាសនៈ
– មណ្ឌលកំពង់ធំ មានចំនួន ៦អាសនៈ
– មណ្ឌលកំពត មានចំនួន ៦អាសនៈ
– មណ្ឌលកណ្ដាល មានចំនួន ១១អាសនៈ
– មណ្ឌលកោះកុង មានចំនួន ១អាសនៈ
– មណ្ឌលក្រចេះ មានចំនួន ៣អាសនៈ
– មណ្ឌលមណ្ឌលគិរី មានចំនួន ១អាសនៈ
– មណ្ឌលភ្នំពេញ មានចំនួន ១២អាសនៈ
– មណ្ឌលព្រះវិហារ មានចំនួន ១អាសនៈ
– មណ្ឌលព្រៃវែង មានចំនួន ១១អាសនៈ
– មណ្ឌលពោធិ៍សាត់ មានចំនួន ៤អាសនៈ
– មណ្ឌលរតនគិរី មានចំនួន ១អាសនៈ
– មណ្ឌលសៀមរាប មានចំនួន ៦អាសនៈ
– មណ្ឌលព្រះសីហនុ មានចំនួន ១អាសនៈ
– មណ្ឌលស្ទឹងត្រែង មានចំនួន ១អាសនៈ
– មណ្ឌលស្វាយរៀង មានចំនួន ៥អាសនៈ
– មណ្ឌលតាកែវ មានចំនួន ៨អាសនៈ
– មណ្ឌលកែប មានចំនួន ១អាសនៈ
– មណ្ឌលប៉ៃលិន មានចំនួន ១អាសនៈ និង
– មណ្ឌលឧត្តរមានជ័យ មានចំនួន ១អាសនៈ។
ការកំណត់អាសនៈរដ្ឋសភានីតិកាលទី៥ ត្រឹម ១២៣អាសនៈ លោក យឹម សុវណ្ណ មន្ត្រីនាំពាក្យ និងជាសមាជិកសភាគណបក្ស សម រង្ស៊ី បានថ្លែងថា ចំនួនអាសនៈនេះគួរត្រូវបង្កើនឲ្យបានច្រើនជាងនេះ។ ព្រោះថា តាមមណ្ឌលរាជធានី-ខេត្ត មួយចំនួន អត្រាអ្នកមានសិទ្ធិបោះឆ្នោតបានកើនច្រើន។
លោក យឹម សុវណ្ណ បានចាត់ទុកការមិនបង្កើនចំនួនអាសនៈរដ្ឋសភានីតិកាលទី៥ ឲ្យលើសពី ១២៣អាសនៈ ទំនងជាមន្ត្រីបក្សកាន់អំណាចខ្លាចចាញ់បក្សប្រឆាំង។
លោក យឹម សុវណ្ណ៖ «គណបក្ស សម រង្ស៊ី បានគាំទ្រជំរុញឲ្យមានការដំឡើងកៅអីរដ្ឋសភានៅតាមបណ្ដាខេត្តមួយក្នុងករណីចាំបាច់។ ក៏ប៉ុន្តែ គណបក្សប្រជាជន គេបានបដិសេធរឿងហ្នឹង ហើយខ្ញុំយល់ថា នេះជាហេតុផលនយោបាយ។ ពីព្រោះថា កៅអីទាំងប៉ុន្មានដែលត្រូវដំឡើងនោះ វានឹងធ្លាក់ទៅក្នុងគណបក្សអ្នកប្រជាធិបតេយ្យ។ អញ្ចឹងហើយ បានជាគណបក្សកាន់អំណាចនេះ គេទប់ស្កាត់ គេមិនចង់ឲ្យមានការដំឡើងកៅអីរដ្ឋសភាទេ»។
ដូចគ្នាដែរ លោកបណ្ឌិត ហង្ស ពុទ្ធា នាយកប្រតិបត្តិអង្គការ និចហ្វិក មានប្រសាសន៍ថា ចំនួនអាសនៈរដ្ឋសភានីតិកាលទី៥ គួរត្រូវបង្កើនឲ្យបានច្រើនជាង ១២៣អាសនៈ។ លោកបណ្ឌិត ហង្ស ពុទ្ធា ឲ្យដឹងដូច្នេះ៖ «ខ្ញុំយល់ថា ១២៣អាសនៈនេះ គួរតែត្រូវបង្កើន ដោយសារប្រជាពលរដ្ឋមានចំនួនកើនឡើង។ ក៏ប៉ុន្តែ គួរឲ្យស្ដាយនៅពេលក្រុមការងារមួយ ដើម្បីពិនិត្យទៅលើការបង្កើតអាសនៈនេះបានឯកភាពគ្នាថា នឹងមិនមានការបង្កើនចំនួនអាសនៈ។ អញ្ចឹងខ្ញុំគិតថា រឿងនេះអាចពាក់ព័ន្ធនឹងការងារនយោបាយខ្លះដែរ»។
គ.ជ.ប បានប្រកាសថា កាលបរិច្ឆេទនៃការបោះឆ្នោតជ្រើសតាំង តំណាងរាស្ត្រនីតិកាលទី៥ ប្រព្រឹត្តិទៅនៅថ្ងៃអាទិត្យ ទី២៨ ខែកក្កដា ឆ្នាំ២០១៣ ខាងមុខ។
ប្រតិទិននៃការពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២ បានបង្ហាញថា ការពិនិត្យបញ្ជីឈ្មោះ និងការចុះឈ្មោះបោះឆ្នោត នៅតាមឃុំ-សង្កាត់ សម្រាប់បម្រើឲ្យការបោះឆ្នោតរដ្ឋសភានីតិកាលទី៥ មានរយៈពេល ៤២ថ្ងៃ ចាប់ពីថ្ងៃទី១ ខែកញ្ញា ដល់ថ្ងៃទី១២ ខែតុលា ឆ្នាំ២០១២។ រីឯកាលបរិច្ឆេទនៃការចុះឈ្មោះតំណាងគណបក្សនយោបាយ ចាប់ផ្ដើមពីថ្ងៃទី២៣ ខែសីហា ដល់ថ្ងៃទី២២ ខែធ្នូ ឆ្នាំ២០១២៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។