ថ្ងៃទី 28 កក្កដា 2012
ដោយ: ឧត្តរ
CEN
ពលរដ្ឋឡើងភ្នំព្រំដែនកាប់ឈើគ្រញូង តាមច្រកអូរស្វាយ ក្នុងស្រុកត្រពាំងប្រាសាទ
ឧត្តរមានជ័យ: ប្រភពពីសមត្ថកិច្ចនៅការពារព្រំដែនកម្ពុជា-ថៃ ក្នុងខេត្តឧត្តរមានជ័យ បានឲ្យដឹងថា ពលរដ្ឋខ្មែរជាច្រើនក្រុម កំពុងមានសកម្មភាពឆ្លងព្រំដែន ចូលកាប់ឈើគ្រញូងក្នុងដីថៃ នៅមានបន្តតាមបណ្ដាស្រុកជាប់ព្រំដែន គឺស្រុកអន្លង់វែង ស្រុកត្រពាំងប្រាសាទ និងក្រុងសំរោង ក្នុងខេត្តឧត្តរមានជ័យ។
ប្រភពដោយឡែកមួយទៀតនៅព្រំដែន បានផ្ដល់ដំណឹងថា នៅច្រកព្រំដែនដែលពលរដ្ឋខ្មែរឆ្លងទៅកាត់ឈើគ្រញូង មកលក់ឲ្យឈ្មួញ កំពុងកើតមាននាពេលនេះ មាន ១. ច្រកតាទុំ និងច្រកដងទង់ ស្ថិតក្នុងភូមិដងទង់ សង្កាត់កូនក្រៀល ក្រុងសំរោង ចន្លោះបង្គោលសីមាលេខ១២-១៣, ២. ច្រកអូរគ្រញូង ស្ថិតនៅក្នុងភូមិជើងភ្នំ ឃុំត្រពាំងប្រិយ ស្រុកអន្លង់វែង និងទី៣. ច្រកទឹកជប់ ច្រកចំបក់កោង និងច្រកអូរស្វាយ ស្ថិតនៅភូមិ-ឃុំអូរស្វាយ ស្រុកត្រពាំងប្រាសាទ និងច្រកជាច្រើនទៀតនៅតាមស្រុកជាប់ព្រំដែនខាងលើនេះ ហើយទាហានថៃបាញ់ឲ្យស្លាប់ របួស និងចាប់ខ្លូន គឺនៅតែមានបន្តនៅព្រំដែននាពេលថ្មីៗនេះដែរ។
ប្រភពដដែលបានឲ្យដឹងទៀតថា សកម្មភាពកើតមានឡើងតាមបែបខាងលើនេះ គេនិយាយថា មានការឃុបឃិត និងបើកដៃពីសមត្ថកិច្ចនៅការពារព្រំដែន ប្រចាំច្រកខាងលើនីមួយនោះហើយ។
សូមបញ្ជាក់ថា ឈើគ្រញូងដែលប្រជាពលរដ្ឋកាប់យកមកលក់នៅព្រំដែននេះ ជាប្រភេទឈើស្ពាយនឹងខ្នង ទំហំមុខកាត់ ១៤សង់ទីម៉ែត្រ គុណ ១៤សង់ទីម៉ែត្រ ឡើងទៅ និងប្រវែងចាប់ពី ៨តឹក ទៅ ១ម៉ែត្រ លក់ឲ្យឈ្មួញនៅព្រំដែន (ជាកម្លាំងសមត្ថកិច្ចនៅទីនោះ) ក្នុងតម្លៃចាប់ពី ១០.០០០ ទៅ ១១.០០០ រៀល ក្នុងមួយគីឡូក្រាម៕ K
ខ្ញុំគិតថាការលួចចូលទៅកាប់ឈើគ្រញូងក្នុងទឹកដីសៀម
ពីព្រោះវាមានអ្នកមានអំណាចក្នុងស្រុកយើងត្រូវការឈើគ្រញូង
ទៅលក់ឲ្យក្រុមនាយទុនពីប្រទេសចិននិងប្រទេសផ្សេងៗទៀត
ធ្វើឲ្យពលរដ្ឋខ្មែរយើងត្រូវអាជ្ញាធរព្រៃឈើរបស់ភាគីសៀមបាញ់សម្លាប់និងបានរងរបូស៕