នៅថ្ងៃច័ន្ទ ទី១៣ សីហានេះ សាលាក្ដីខ្មែរក្រហមបានសម្រេចផ្អាកសវនាការស្ដាប់សាក្សី សួង ស៊ីគឿន អតីតកម្មាភិបាលមន្ទីរ ប១ និងសាក្សីសាក្សី អុង ថុងហឿង ដោយសារតែជនជាប់ចោទ អៀង សារី មានបញ្ហាសុខភាព។
ដោយ ឡេង ម៉ាលី
2012-08-13
វិទ្យុអាស៊ីសេរី
លោក អៀង សារី អតីតមេខ្មែរក្រហម បង្ហាញខ្លួនក្នុងសវនាការសាធារណៈលើកដំបូងនៅសាលាក្ដីខ្មែរក្រហម នាថ្ងៃទី៣០ មិថុនា ២០០៨។
AFP Photo/Pool
គ្រូពេទ្យផ្នែកជំងឺទូទៅ ប្រចាំសាលាក្ដីខ្មែរក្រហម វេជ្ជបណ្ឌិត កឹម សំសាន ជម្រាបអង្គជំនុំជម្រះថា ជនជាប់ចោទ អៀង សារី មានអាការៈនោមញឹក ហត់ហេវអស់កម្លាំង និងវិលមុខខ្លាំង ភ្លេចភ្លាំង ហើយមានអារម្មណ៍ច្របូកច្របល់ មិនអាចស្ដាប់សវនាការបានទេ។
លោកវេជ្ជបណ្ឌិត កឹម សំសាន ថ្លែងថា អាការៈអស់កម្លាំង និងវិលមុខខ្លាំងរបស់ជនជាប់ចោទ អៀង សារី គឺបណ្ដាលមកពីបញ្ហានោមញឹក ដែលធ្វើឱ្យគាត់ត្រូវប្រើកម្លាំងងើបច្រើនខុសប្លែកពីធម្មតា និងគួបផ្សំនឹងជំងឺបេះដូងស្រាប់ផង។
លោកផ្ដល់ឱវាទថា ជនជាប់ចោទ គប្បីអនុញ្ញាតឱ្យបានសម្រាក៖ «ចំពោះបញ្ហាសុខភាពផ្លូវកាយរបស់គាត់ ការសម្រាកនៅបន្ទប់ខាងក្រោម ដើម្បីស្ដាប់សវនាការហ្នឹងសមស្របហើយ។ ប៉ុន្តែចំពោះការដែលគាត់ស្ដាប់ ហើយគាត់និយាយថាស្ដាប់មិនបាន ស្ដាប់មិនយល់នោះ ខ្ញុំគិតថា ការធ្វើសវនាការហ្នឹង ក៏វាប្រហែលមិនមានប្រយោជន៍អីដែរ ព្រោះគាត់ថា សវនាការនៅពេលនេះសំខាន់ណាស់ គាត់ចង់ស្ដាប់ឱ្យបានយល់ ១០០%»។
អង្គជំនុំជម្រះសាលាក្ដីខ្មែរក្រហមនៅពេលនេះ កំពុងស្ដាប់សាក្សីសំខាន់ ២រូប ដែលទាក់ទងនឹងសំណុំរឿងក្ដីលេខ ០០២ របស់ជនជាប់ចោទ អៀង សារី។ សាក្សីទី ១ គឺសាក្សី សួង ស៊ីគឿន ដែលជាអតីតកម្មាភិបាលមួយរូប នៅក្រសួងការបរទេស ឬហៅថាមន្ទីរ ប១ និងសាក្សីមួយរូបទៀត គឺសាក្សី អុង ថុងហឿង ដែលជាបញ្ញាជនវិលត្រឡប់ពីបរទេស មកចូលរួមក្នុងរបបកម្ពុជាប្រជាធិបតេយ្យ។ ជនជាប់ចោទ ទទូចសុំរក្សាសិទ្ធិស្ដាប់សាក្សីទាំងពីររូបនេះ។
បន្ទាប់ពីបានស្ដាប់អនុសាសន៍របស់គ្រូពេទ្យ ប្រធានអង្គជំនុំជម្រះសាលាដំបូង លោកចៅក្រម និល ណុន សម្រេចផ្អាកសវនាការម្ដងហើយ នៅពេលព្រឹក និងគ្រោងធ្វើបន្តនៅពេលរសៀល ប្រសិនបើស្ថានភាពសុខភាពរបស់ជនជាប់ចោទ អៀង សារី ប្រសើរឡើងវិញ។ ក៏ប៉ុន្តែ លោកចៅក្រម និល ណុន បានប្រកាសផ្អាកសវនាការម្ដងទៀត នៅពេលរសៀល បន្ទាប់ពីទទួលដំណឹងថា ស្ថានភាពសុខភាពរបស់ជនជាប់ចោទ អៀង សារី មិនបានប្រសើរឡើងវិញទេ។
លោកចៅក្រមលើកសម្អាងហេតុចំពោះការលើកពេលនេះថា អនុវត្តន៍ទៅតាមវិធានផ្ទៃក្នុងរបស់សាលាក្ដីខ្មែរក្រហម៖ «ដោយយោងទៅនឹងបទបញ្ញត្តិនៃវិធាន ដែលអនុវត្តន៍នៅ អ.វ.ត.ក នេះ អង្គជម្រះត្រូវដំណើរការជំនុំជម្រះក្ដី ដោយចំពោះមុខជនជាប់ចោទ ទោះបីករណីណាក៏ដោយ។ ចំពោះមុខនៅក្នុងសវនាការដោយផ្ទាល់ ឬយ៉ាងហោចណាស់ គឺអាចស្ដាប់តាមដានកិច្ចដំណើរការសវនាការដេញដោលពីបន្ទប់ខាងក្រោម តាមរយៈសោតទស្សន៍។ ប៉ុន្តែដោយសារសុខភាពរបស់គាត់ គាត់មានអារម្មណ៍ច្របូកច្របល់ ហើយភ្លេចភ្លាំងច្រើន មិនអាចដំណើរការបាន។ ហេតុដូច្នេះ អង្គជម្រះមិនអាចធ្វើសវនាការបានទេ នៅរសៀលនេះ»។
លោកចៅក្រម និល ណុន ប្រកាសដល់ភាគី និងសាធារណជនថា ប្រសិនជាអាចដំណើរការទៅបាន សវនាការនឹងត្រូវធ្វើនៅថ្ងៃអង្គារ ទី១៤ សីហា វេលាម៉ោង ៩ ព្រឹកជាបន្តទៀត។ អង្គជំនុំជម្រះ គ្រោងស្ដាប់បញ្ចប់សាក្សី អុង ថុងហឿង មុនសាក្សី សួន ស៊ីគឿន ដោយហេតុថា លោកត្រូវប្រញាប់វិលទៅទ្វីបអឺរ៉ុបវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។