គ្រួសារជនជាប់ចោទ ៣នាក់ ដែលអាជ្ញាធរចោទប្រកាន់ពីបទបង្កើតតំបន់អបគមន៍ក្នុងភូមិប្រម៉ា ឃុំកំពង់ដំរី ស្រុកឆ្លូង ខេត្តក្រចេះ នៅថ្ងៃទី១៩ ខែសីហា ស្នើសុំឲ្យមានការដោះលែងជនជាប់ចោទទាំងនោះវិញ ដើម្បីអាចរកស៊ីចិញ្ចឹមប្រពន្ធកូនខ្ចី និងកូនតូចៗដែលកំពុងតែមានជំងឺ។
ដោយ ទេព សុរ៉ាវី
2012-08-20
វិទ្យុអាស៊ីសេរី
ពលរដ្ឋ ២នាក់ដែលត្រូវកម្លាំងប្រដាប់អាវុធចាប់បានក្នុងយុទ្ធនាការការបង្ក្រាបពលរដ្ឋដែលមានជម្លោះដីនៅឃុំកំពង់ដំរី ស្រុកឆ្លូង ខេត្តក្រចេះ កាលពីថ្ងៃទី១៦ ខែឧសភា ឆ្នាំ២០១២។
Provided photo
កាលពីថ្ងៃទី១៦ ខែឧសភា ឆ្នាំ២០១២ កងកម្លាំងចម្រុះរាប់រយនាក់ បានចុះបង្ក្រាប និងបណ្ដេញប្រជាពលរដ្ឋប្រមាណ ១ពាន់គ្រួសារ ដែលកំពុងរស់នៅលើដីក្នុងតំបន់សម្បទាន នៅភូមិប្រម៉ា ដែលរដ្ឋាភិបាលចាត់ទុកថា ជាក្រុមបង្កើតតំបន់អបគមន៍។ អាជ្ញាធរបាញ់ប្រហារទៅលើក្រុមប្រជាពលរដ្ឋបណ្ដាលឲ្យកុមារីអាយុ ១៤ឆ្នាំម្នាក់ ឈ្មោះ ហេង ចន្ថា បានស្លាប់។ ភ្លាមៗនោះសមត្ថកិច្ចចម្រុះក៏បានឃាត់ខ្លួនមនុស្ស ៨នាក់ទៅសាកសួរ ហើយក្រោយមកដោះលែង ៥នាក់ និង ៣នាក់ទៀត រួមមានឈ្មោះ ចាន់ សុវណ្ណ ឈ្មោះ ភ័ណ្ណ ស្រឿន និងឈ្មោះ ទូច រិន ត្រូវបញ្ជូនទៅឃុំក្នុងពន្ធនាគារខេត្តក្រចេះ ពីបទធ្វើកុបកម្មប្រឆាំងមន្ត្រីសាធារណៈ និងដឹកអាវុធខុសច្បាប់។
អ្នកស្រី សុខ គា ប្រពន្ធជនជាប់ចោទឈ្មោះ ទូច រិន ឲ្យដឹងនៅថ្ងៃទី១៩ ខែសីហា ថា ប្តីអ្នកស្រីមិនមានជាប់ព័ន្ធនឹងក្រុម ប៊ុន រដ្ឋា ដែលចង់បំបែករដ្ឋដូចការចោទប្រកាន់របស់តុលាការនោះទេ។
អ្នកស្រីចង់ឲ្យតុលាការ និងរដ្ឋាភិបាល ជួយផ្ដល់យុត្តិធម៌ដល់ប្ដីអ្នកស្រី និងសង្ឃឹមថា ប្តីគាត់នឹងមានសេរីភាពវិញ អាចជួយរកស៊ីចិញ្ចឹមគាត់ និងកូន ត្បិតសព្វថ្ងៃអ្នកស្រីកំពុងជួបបញ្ហាជីវភាព ដោយសារតែគាត់កូនខ្ចីមិនអាចរកស៊ីចិញ្ចឹមខ្លួន និងកូន ២នាក់បាន៖ «ខ្ញុំសូមសំណូមពរឲ្យរាជរដ្ឋាភិបាល ឲ្យជួយដោះលែងប្ដីខ្ញុំមកវិញ បើមិនដោះលែងប្ដីខ្ញុំមកវិញទេ គឺខ្ញុំបីនាក់ម៉ែកូនរង់ចាំតែថ្ងៃស្លាប់ទេ»។
អ្នកស្រី ប៉ាត ធន ប្រពន្ធជនជាប់ចោទ ភ័ណ្ឌ ស្រឿន ឲ្យដឹងដែរថា ប្តីរបស់គាត់កំពុងឈឺក្នុងពន្ធនាគារ ហើយគាត់គ្មានលទ្ធភាពទៅសួរសុខទុក្ខប្ដីក្នុងពន្ធនាគារនោះទេ។
អ្នកស្រីបន្តថា កូន ៥នាក់ ក្នុងបន្ទុកមានជំងឺគ្រប់គ្នា គាត់គ្មានលុយយកកូនទៅមន្ទីរពេទ្យ ដោយសារតែជីវភាពពិបាក រកមួយពេលសម្រាប់តែមួយពេលប៉ុណ្ណោះ។ អ្នកស្រីស្នើសុំឲ្យរដ្ឋាភិបាលជួយដោះលែងប្ដីគាត់មកវិញ ដើម្បីអាចឲ្យគាត់ និងកូនមានទីពំនាក់ដូចមុន។
អ្នកស្រី សុវណ្ណ ថ្លង់ កូនស្រីជនជាប់ចោទម្នាក់ទៀត ឈ្មោះ ចាន់ សុវណ្ណ ឲ្យដឹងស្រដៀងគ្នាដែរ ដោយទទូចសុំឲ្យរដ្ឋាភិបាលស៊ើបអង្កេតពីករណីនេះឡើងវិញ ព្រោះថា ឪពុករបស់គាត់មិនដែលស្គាល់ឈ្មោះ ប៊ុន រដ្ឋា ដែលចង់បំបែករដ្ឋនោះឡើយ៖ «ជីវភាពខ្ញុំពិបាកណាស់ ខ្វះខាត ម្ដាយខ្ញុំក៏ឈឺ ពុកក៏ជាប់ពន្ធនាគារ ហើយលុយក៏គ្មាន»។
វិទ្យុអាស៊ីសេរីមិនអាចសុំការបំភ្លឺពីលោក ចុក ងួន ចៅក្រមស៊ើបសួរខេត្តក្រចេះ បានទេ នៅថ្ងៃទី១៩ ខែសីហា ដោយលោកមិនទទួលទូរស័ព្ទ។
តែបើតាមលោក ឡុង លន់ មេធាវីរបស់អង្គការអាដហុក ជួយការពារក្តីឲ្យជនជាប់ចោទទាំង ៣នាក់នោះ ប្រាប់ថា សំណុំរឿងនេះត្រូវបានតុលាការខេត្តក្រចេះ ផ្ទេរឲ្យតុលាការក្រុងភ្នំពេញ ហើយលោកមិនច្បាស់ថា ករណីនេះបញ្ចប់ការស៊ើបសួរហើយ ឬនៅនោះទេ។
ក្រៅពីឃុំខ្លួនជនជាប់ចោទ ៣នាក់នោះ តុលាការខេត្តក្រចេះ ក៏បានចេញដីកាចាប់ខ្លួនមនុស្ស ៥នាក់ទៀត ដែលគេចាត់ទុកថា ជាមេដឹកនាំចលនាបំបែករដ្ឋ។ តែរដ្ឋាភិបាលប្រកាសឲ្យពួកគេទាំងនោះចូលសារភាព ដោយសន្យាថា គ្មានការយកទោសពៃរ៍នោះទេ។
លោកនាយករដ្ឋមន្ត្រី ហ៊ុន សែន បានប្រកាសជាសាធារណៈកាលពីថ្ងៃទី១ ខែសីហា ថា មនុស្ស ៤នាក់ ដែលមានដីកាចាប់ខ្លួននោះ បានសារភាពអស់ហើយ គឺនៅសល់តែឈ្មោះ ប៊ុន រដ្ឋា ប៉ុណ្ណោះ ដែលជាមេខ្លោង៖ «៧នាក់ដែលចេញមកតាមបទបញ្ជា ចេញ ៦ ហើយរាប់ទាំងអ្នកមួយទៅដល់ថៃ ក្នុងនោះ ៥នាក់មានដីកាចាប់ខ្លួន ចេញមក ៤ហើយ អ្នកដែលមានដីកាចាប់ខ្លួននៅតែ ប៊ុន រដ្ឋា ទេ ឥឡូវអ្នកឯងយ៉ាងម៉េចពន្យល់ច្បាប់ទៅ»។
ការចោទប្រកាន់ថា មានការបង្កើតតំបន់អបគមន៍របស់រដ្ឋាភិបាល ធ្វើឲ្យមានការចាប់ខ្លួនលោក ម៉ម សូណង់ដូ នាយកវិទ្យុសំបុកឃ្មុំ និងជាប្រធានសមាគមអ្នកប្រជាធិបតេយ្យ ដោយថា លោក ម៉ម សូណង់ដូ ត្រូវទទួលខុសត្រូវចំពោះការស្លាប់របស់កុមារី ហេង ចន្ថា និងចលនាចង់បំបែករដ្ឋនៅភូមិប្រម៉ា។
ករណីដដែលនេះក៏បានបន្លាយទាញយកមន្ត្រីអង្គការសង្គមស៊ីវិល ឲ្យជាប់ពាក់ព័ន្ធផងដែរ ដោយតុលាការក្រុងភ្នំពេញ បានកោះហៅលោក ចាន់ សុវ៉េត មន្ត្រីស៊ើបអង្កេតជាន់ខ្ពស់អង្គការអាដហុក ឲ្យចូលបំភ្លឺក្រោមបទចោទថា ផ្ដល់ជំនួយដល់ចារីជាអាទិ៍។ ការចោទប្រកាន់នេះត្រូវបានលោក ចាន់ សុរ៉េត ប្រកែក ហើយអង្គការសង្គមស៊ីវិលដែលឃ្លាំមើលសិទ្ធិមនុស្សនៅកម្ពុជា ចាត់ទុកថា ជារឿងនយោបាយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
១. ហេតុអ្វីអស់លោក ជាអ្នកនយោបាយប្រឆាំង សង្គមស៊ីវិល អ្នកការពារសិទ្ធមនុស្ស អ្នកប្រជាធិបតេយ្យ សហជីពកម្មករ ខ្លាចអំណាចផ្តាច់ការរបសជនមួយក្តាប់តូច?
២. លោកមហាត្មេះគន្ធី បានមានប្រសាសន័ថា ការតស៊ូដើម្បីសិទ្ធសេរីភាព ប្រជាធិបតេយ្យ មិនមែនជាកំហុសអស់លោកទេ! អស់លោកត្រូវតែមានសេចក្តីក្លាហានប្រយុទ្ធ ប្រឆាំងគ្រួសាផ្តាច់ការមួយក្រុមតូចនេះ ដើម្បីទាមទារផលប្រយោជន័ដើម្បីប្រជារាស្រ្តខ្មែរឡើងវិញ។
យើងមិនត្រូវអោយពួកគេ ដណ្តើមដី ធ្លី ផ្ទះសម្បែងរបស់យើងទៀតទេ!
យើងមិនត្រូវអោយគេបំបាត់សិទ្ធសេរីភាពរបស់យើងទៀតទេ!
យើងមិនត្រូវអោយគេជិះជាន់កម្មកររបស់យើងទៀតទេ!
យើងមិនត្រូវអោយគេបំផ្លាញធនធានធម្មជាតិរបស់ជនជាតិខ្មែរទេ!
យើងមិនត្រូវអោយគេកេងប្រវ័ញ្ចញើសឈាមមន្រ្តីរាជការ បូលីស ទាហាន ដែលមានឋានៈតូចទាបទៀតទេ!
យើងត្រូវសង្គ្រោះសេដ្ឋកិច្ចរបស់យើងពីសេដ្ឋកិច្ចគ្រួសារទៅជាយើងកិច្ចរបស់យីងទាំងអស់គ្នា!
យើងត្រូវតែសង្គ្រោះប្រទេសរបស់យើងចេញពីគ្រួសារមួយក្តាប់តូចដែលយើងយកដៃមួយចំហៀងបាំងមេឃ និងគិតតែផលប្រយើងបក្ខពួករបស់ពួកវា។
៣. ដើម្បីបុព្វហេតុខាងលើទាំងនេះ យើងត្រូវតែតស៊ូតាមលោកមហាត្មេះគន្ធី គឺយើងនាំគ្នារាប់ពាន់នាក់ ដើរចូលគុកទាំងអស់គ្នា !!!! ពេលនោះយើងអាចផ្តួលរលំគ្រួសារផ្តាច់ការនេះបានហើយ!!
យករាស្ត្រជាធ្នាក់ ទាក់មេដឹកនាំធំ
ប្រើនុយតូចយកត្រីធំ អ្នកមានទុក្ខធំគឺរាស្ត្រ។
ល្បិចកល់កុំឆ្ងល់រៀបចំដោយ អ្នកកាន់អំណាច
ធ្វើអោយគេខ្លាច កុំអោយខ្លួនវិនាស។
តែភ្លេចអនិច្ចា ប្រដៅដោយព្រះ
គ្មានអ្វីអាចឈ្នះការភាពអនិច្ចា។
ព្រៃភ្នំជ្រោះធំ ជ្រលងដងអូរ
ទឺកនឹងទឹកហូរខ្ល្សាច់គ្រួសថ្មដារ
គង់តែប្រែប្រួលមិនទៀងឡើយណា
រួមទាំងសង្ខាមនុស្សគ្រប់ប្រាណ។
អំណាចមិនអាចមានរហូត
ពេលខ្លួនរបួត ខ្លាចជាទន្សាយ
ជាប់ជុចជាប់ជុង ផុងរាងកាយ
អ្នកមានចិត្តស្តាយ ខ្លួនមិនខាន។