ភ្នំពេញ: តុលាការសាលាឧទ្ធរណ៍ បានបើកសវនាការលើករណីរបស់លោក ម៉ឹក ដារ៉ា អតីតឧត្តមសេនីយ៍ឯក និងជាអតីតអគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន កាលពីព្រឹកថ្ងៃទី២០ ខែសីហា ឆ្នាំ២០១២។ លោក ម៉ឹក ដារ៉ា ត្រូវបានតុលាការខេត្តបន្ទាយមានជ័យ ផ្តន្ទាទោស ដាក់ពន្ធនាគារមួយជីវិត ជាមួយនឹងបក្ខពួក ដែលស្និទ្ធនឹងលោក ២នាក់ផ្សេងទៀត ក្នុងសំណុំរឿងពុករលួយ និងជួញដូរគ្រឿងញៀន។
ថ្ងៃទី 20 សីហា 2012
ដោយ: រតនា
CEN
លោក ម៉ឹក ដារ៉ា អតីតឧត្តមសេនីយ៍ឯក និងជាអតីតអគ្គលេខាធិការនៃអាជ្ញាធរជាតិប្រយុទ្ធប្រឆាំងគ្រឿងញៀន
(រូបថត : ស៊ីវ ចាន់ណា)
ក្នុងសវនាការនៅតុលាការសាលាឧទ្ធរណ៍ ក្នុងរាជធានីភ្នំពេញ នៅព្រឹកមិញ លោក ម៉ឹក ដារ៉ា និងលោក ជាឡេង បានបង្ហាញខ្លួន ក្នុងអង្គសវនាការ និងបានបដិសេធចំពោះរាល់ការចោទប្រកាន់។ សវនាការនៅព្រឹកមិញ ធ្វើឡើងដោយមានលោកចៅក្រម ចាយ ចាន់ដាវ៉ាន់ ជាប្រធានក្រុមប្រឹក្សាជំនុំជម្រះ និងលោក ង៉ែត សារ៉ាត់ ជាតំណាងមហាអយ្យការ។
ក្នុងសវនាការចៅក្រម បានប្រកាសថា លោក ម៉ឹកដារ៉ា លោកជាឡេង និងលោក ម៉ន ឌឿន ជាអ្នកផ្តើមផ្សំគំនិត និងប្រព្រឹត្តទទួលសំណូកដោយចេតនាយកមុខនាទី និងកន្លែងធ្វើការ នៅមន្ទីរប្រឆាំងគ្រឿងញៀន របស់ប៉ូលិសក្រសួងមហាផ្ទៃ ធ្វើជាកន្លែងរកស៊ីគ្រឿងញៀនខុសច្បាប់។
សវនាការនៅសាលាឧទ្ធរណ៍ លើករណីលោកម៉ឹកដារ៉ា នឹងធ្វើឡើងបន្តនៅព្រឹកថ្ងៃអង្គារ ទី២១ ខែសីហា ឆ្នាំ២០១២។
សូមរម្លឹកថា ក្រោយពីបើកសវនាការជាច្រើនថ្ងៃ តុលាការខេត្តបន្ទាយមានជ័យ បានសម្រេចផ្តន្ទាទោសដាក់ពន្ធនាគារលោក ម៉ឹក ដារ៉ា អតីតឧត្តមសេនីយ៍ឯក និងជាអតីតប្រធានមន្ទីរប្រឆាំងគ្រឿងញៀន ព្រមទាំងជាអតីតអគ្គលេខាធិការ នៃអាជ្ញាធរជាតិប្រយុទ្ធប្រឆាំងគ្រឿងញៀន ដាក់ពន្ធនាគារមួយជីវិត និងរឹបអូសដីធ្លី ព្រមទាំងរឹបអូសប្រាក់ជាច្រើនទៀត។ សាលក្រមនោះ ត្រូវបានប្រកាសកាលពីម៉ោង ៩ ព្រឹកថ្ងៃទី៥ ខែមករា ឆ្នាំ២០១២។ ចំណែកលោក ជា ឡេង ដែលជាមន្ត្រីប៉ូលិសក្រោមឱវាទរបស់លោក ម៉ឹក ដារ៉ា ក៏ត្រូវបានតុលាការខេត្តបន្ទាយមានជ័យ ផ្តន្ទាទោសដាក់ពន្ធនាគារអស់មួយជីវិត។ រីឯប៉ូលិសម្នាក់ទៀត ឈ្មោះ ម៉ន ឌឿន ដែលកំពុងគេចខ្លួន ត្រូវផ្តន្ទាទោសដាក់ពន្ធនាគារ ២៥ ឆ្នាំ។
លោកចៅក្រមរបស់តុលាការខេត្តបន្ទាយមានជ័យ កាលណោះ ក៏បានសម្រេចផាកពិន័យលោកម៉ឹកដារ៉ា និងកូនចៅ២នាក់នោះ ជាប្រាក់គុណនឹង៤។ ពោលគឺតុលាការសម្រេច ដកហូតដីមួយកន្លែង នៅក្រុងសួង ខេត្តកំពង់ចាម របស់លោក ម៉ឹក ដារ៉ា ព្រមទាំងដកហូតប្រាក់ក្នុងធនាគារកាណាឌីយ៉ារបស់លោកម៉ឹកដារ៉ា ជាង ៨ ម៉ឺនដុល្លារ និងដកហូតលុយជួសជុលផ្ទះជាង ១០ ម៉ឺនដុល្លាររបស់លោក ម៉ឹកដារ៉ា នៅបឹងកក់ ក្នុងទីក្រុងភ្នំពេញ។ ចំណេកលោក ជាឡេង ក៏ត្រូវតុលាការសម្រេចដកហូតដីមួយកន្លែង នៅចោមចៅ និងផ្ទះមួយល្វែង នៅភ្នំពេញ ព្រមទាំងលុយជាង ១០ ម៉ឺនដុល្លារផ្សេងទៀត។ រីឯឈ្មោះ ម៉ន ឌឿន តុលាការបានសម្រេចដកហូតលុយជាង ១០ ម៉ឺនដុល្លារ។
ការផ្តន្ទាទោសលោក ម៉ឹក ដារ៉ា និងកូនចៅរបស់លោក២នាក់នោះ ត្រូវបានតុលាការសំអាងលើមាត្រា ៣៤ នៃច្បាប់ស្តីពីវិសោធនកម្ម ច្បាប់ត្រួតពិនិត្យគ្រឿងញៀន ព្រមទាំងមាត្រា ៣៨ នៃក្រមព្រហ្មទណ្ឌ និងនីតិវិធីក្រមព្រហ្មទណ្ឌសម័យអ៊ុនតាក់។
សូមរម្លឹកថា កាលពីថ្ងៃទី១៧ ខែវិច្ឆិកា ឆ្នាំ២០១១ តុលាការខេត្តបន្ទាយមានជ័យ បានបើកសវនាការកាត់ទោសលោក ម៉ឹក ដារ៉ា និងលោក ជាឡេង ព្រមទាំងលោក ម៉ន ឌឿន ( ដែលសព្វថ្ងៃបានរត់គេច ) ក្នុងសំណុំរឿងពុករលួយ តាមរយៈការបង្ក្រាបគ្រឿងញៀន។ សវនាការលើរឿងក្តីនោះ មានរយៈពេល ១២ ថ្ងៃ ដោយតុលាការ បានបិទបញ្ចប់ការសួរដេញដោល កាលពីថ្ងៃទី២ ខែធ្នូ ឆ្នាំ២០១១។
អតីតប្រធានមន្ទីរប្រឆាំងគ្រឿង លោកឧត្តមសេនីយ៍ឯក ម៉ឹក ដារ៉ា អតីតអគ្គលេខាធិការអាជ្ញាធរជាតិប្រឆាំងគ្រឿងញៀន ព្រមទាំងកូនចៅ លោកជាឡេង ត្រូវបានចាប់ខ្លួន កាលពីថ្ងៃទី១២ ខែមករា ឆ្នាំ២០១១ ជាប់ពាក់ព័ន្ធករណីអំពើពុករលួយស៊ីសំណូក និងបទជួញដូរគ្រឿងញៀន ដែលមានការចាត់តាំង៕
អត់ប្រយោជន៏មែន ដក់ហូតប្រាក់ប៉ុណ្ណឹង ស្មានថាវាអស់ទ្រព្យដែលពួកវាប្រព្រឹត្តមែនទេ ហើយអាការដក់ហូតវិញនោះ គឺប្រហែលជាយកទ្រព្យចែកគ្នា ឬយកទៅភ្គាប់ចៅហ្វាយ ផងក៏មិនដឹង ព្រោះលឺតែដកហូត តែអត់បានបញ្ជាក់ ថាយកទៅណាផងពេញគប់ហើយតែប៉ុណ្ណេះ គ្រប់ទឹកតុលាការ ហើយចៅហ្វាយដែលបញ្ជាបើកភ្លើងខៀវអោយចាប់ នោះហើយ។ ហាហាហាហា កុំបា្រប់ថាអត់បានផលវើយ
តើមានទង្វើណាមួយដែលរាជរដ្ឋាភិបាលជៀសផុតពីការរិះគន់របស់ក្រុមប្រឆាំងដែរទេ?
ពិតជាឡូយមែន!!!!!!! អ្នកទោសស្លៀកពាក់ឯកសណ្ឋានស៊ីវិល។ លោកតុលាកាពិតជាអច្ឆរិយមែន
(មានសិទ្ធអំណាច កាត់ក្តីអោយអ្នកក្រចាញ់ៗៗៗៗៗៗៗៗៗៗ ហើយដេកគុកស្អុយកក្រុក ឯអ្នកមានលុយកាត់អោយចាញ់ទាំងញញឹម ហើយដេកគុកផ្កាយប្រាំ……………..។
ពួកអាងាប់…