ភ្នំពេញ​: ទីភ្នាក់ងារ Peace Corps នៅ​ប្រទេស​កម្ពុជា នឹង​ស្វាគមន៍​អ្នកស្ម័គ្រចិត្ត​ក្រុមទី​៦ ជនជាតិ​អាមេរិក​ថ្មី​ចំនួន ៥៨ នាក់ ដែល​នឹង​មក​សច្ចាប្រណិធានចូល​បំពេញការងារ​របស់ខ្លួន ក្នុង​ខេត្តតាកែវ នៅតាម​សហគមន៍​ជនបទ ដោយ​បង្រៀន​ភាសា​អង់គ្លេស និង​ជំរុញ​សុខភាព​សាធារណៈ ក្នុង​គម្រោង​នានា​ក្នុង​សហគមន៍ ទាក់ទង​នឹង​ការអប់រំ​បរិស្ថាន ការការពារ​ហិង្សា​ក្នុង​គ្រួសារ ការអភិវឌ្ឍមុខ​ជំនួញ​ខ្នាតតូច និង​កសាង​ជំនាញ​ស្តីពី​ភាពជា​អ្នកដឹកនាំ​សម្រាប់​កុមារី​។

ថ្ងៃទី 6 កញ្ញា 2012
ដោយ: កូឡាប
CEN

​សេចក្តីប្រកាស​ព័ត៌មាន​របស់​ស្ថានទូត​អាមេរិក នៅ​ថ្ងៃទី​៦ ខែកញ្ញា ឆ្នាំ​២០១២ បាន​ឲ្យ​ដឹងថា ទីភ្នាក់ងារ Peace Corps នៅ​ប្រទេស​កម្ពុជា នឹង​ស្វាគមន៍​អ្នកស្ម័គ្រចិត្ត​ក្រុមទី​៦ របស់ខ្លួន នៅ​ថ្ងៃ​សុក្រ ទី​៧ ខែកញ្ញា ឆ្នាំ ២០១២ នៅ​ម៉ោង ១​រសៀល នៅ​មជ្ឈមណ្ឌល​គរុកោសល្យ​ភូមិភាគ (​ផ្លូវជាតិ​លេខ ២) ក្នុង​ខេត្តតាកែវ ក្រោម​អធិបតីភាព​លោក ស្រី បេន អភិបាល​ខេត្តតាកែវ និង​លោកស្រី Penny Fields នាយក​ទីភ្នាក់ងារ Peace Corps ប្រចាំ​នៅ​ប្រទេស​កម្ពុជា នឹង​ធ្វើជា​អធិបតីក្នុង​ពិធី​សច្ចាប្រណិធាន​នោះ ដើម្បី​ស្វាគមន៍​អ្នកស្ម័គ្រចិត្ត​ជនជាតិ​អាមេរិក​ថ្មី​ចំនួន ៥៨ នាក់​។​
​ ​
​សេចក្តីប្រកាស​ព័ត៌មាន​ដដែល បានលើកឡើង​បន្តទៀតថា អ្នកស្ម័គ្រចិត្ត​របស់​ទីភ្នាក់ងារ Peace Corps នៅ​ប្រទេស​កម្ពុជា រស់នៅ និង​ធ្វើការ​នៅតាម​សហគមន៍​ជនបទ ដោយ​បង្រៀន​ភាសា​អង់គ្លេស និង​ជំរុញ​សុខភាព​សាធារណៈ​។ អ្នកស្ម័គ្រចិត្ត​ទាំងនោះ ក៏​ធ្វើការ​ផងដែរជាមួយ​សម​ភាគី​កម្ពុជា​របស់គេ ក្នុង​គម្រោង​នានា​ក្នុង​សហគមន៍ ទាក់ទង​នឹង​ការអប់រំ​បរិស្ថាន ការការពារ​ហិង្សា​ក្នុង​គ្រួសារ ការអភិវឌ្ឍមុខ​ជំនួញ​ខ្នាតតូច និង​កសាង​ជំនាញ​ស្តីពី​ភាពជា​អ្នកដឹកនាំ​សម្រាប់​កុមារី​។

​សេចក្តីប្រកាស​លើកឡើងថា ជាមួយនឹង​ក្រុម​អ្នកស្ម័គ្រចិត្ត​ថ្មី​នេះ ទីភ្នាក់ងារ Peace Corps នៅពេលនេះមាន​អ្នកស្ម័គ្រចិត្ត​សរុប​ចំនួន ២៨៥ នាក់ កំពុង​រស់នៅ​តាម​ខេត្ត​ចំនួន ១៥ ក្នុងប្រទេស​កម្ពុជា តាំងពី​ឆ្នាំ​២០០៦​។​
​ ​
​ប្រភព​ដដែល​បាន​ឲ្យ​ដឹង​ទៀតថា ទីភ្នាក់ងារ Peace Corps ត្រូវបាន​បង្កើតឡើង​ដោយ​អតីត​ប្រធានាធិបតី​អាមេរិក John F. Kennedy ក្នុង​ឆ្នាំ​១៩៦១ ដើម្បី​លើក​កម្ពស់​សន្តិភាព​ពិភពលោក​និង​មិត្តភាព​។ គោលដៅ​របស់​ទីភ្នាក់ងារ Peace Corps គឺ​ផ្តល់​ការបណ្តុះបណ្តាល និង​ការអប់រំ​ដល់​បុរស​ស្ត្រី នៅតាម​បណ្តា​ប្រទេស​ដែលមាន​ការចាប់អារម្មណ៍ និង​ដើម្បី​លើក​កម្ពស់​ការយល់​គ្នា​ទៅវិញទៅមក​រវាង​សហរដ្ឋអាមេរិក និង​ប្រទេស​ដទៃទៀត​។ កាលពី​ឆ្នាំទៅ ទីភ្នាក់ងារ Peace Corps បាន​ប្រារព្ធ​ខួប​លើក​ទី​៥០ របស់ខ្លួន​។ ចាប់តាំងពី​ឆ្នាំ​១៩៦១ មក មាន​អ្នកស្ម័គ្រចិត្ត​ចំនួន​ជាង ២០០.០០០ នាក់ បាន​បម្រើការ​ក្នុង​ទីភ្នាក់ងារ​នេះ នៅតាម​ប្រទេស​ចំនួន ១៣៩ ក្នុង​ពិភពលោក​៕​ S