អ្នកវិភាគសេដ្ឋកិច្ច បានអះអាងថា ការទិញផ្ទះដោយបង់រំលោះ គឺជាការវិនិយោគមួយក្នុងការលើកកម្ពស់សុខុមាលភាពគ្រួសារ និងសង្គម ដែលប្រទេសជឿនលឿនលើសកលលោកកំពុងអនុវត្ត។
ដោយ អាន ស៊ីថាវ
2012-09-21
វិទ្យុអាស៊ីសេរី
១៨-មករា-២០១២៖ ផ្ទះល្វែងស្ថិតនៅក្នុងសង្កាត់ផ្សារដើមគ ខណ្ឌចំការមន រាជធានីភ្នំពេញ (RFA/Vohar Cheath)
យ៉ាងណាក៏ដោយ ស្ថាប័នផ្ដល់ឥណទានផ្ទះសម្បែងយល់ឃើញថា អ្នកយល់ដឹងអំពីការទទួលឥណទានផ្ទះបង់រំលោះ គឺមានតិចតួចនៅឡើយ បើធៀបនឹងចំនួនផ្ទះល្វែងដែលបានសាងសង់។ ប៉ុន្តែ អ្នកវិភាគអចលនទ្រព្យយល់ថា អត្រាការប្រាក់នៅមានកម្រិតខ្ពស់នៅឡើយ ដែលធ្វើឲ្យចំនួនអ្នកចង់ទទួលឥណទានទិញផ្ទះសម្បែងមានតិច ឬពួកគាត់ជ្រើសរើសការជួលផ្ទះស្នាក់នៅវិញ ជាការប្រសើរជាង។
ការអះអាងរបស់អ្នកជំនាញអចលនទ្រព្យ បានឲ្យដឹងថា ចំនួនអ្នកមានលុយទិញផ្ទះសម្បែង ឬផ្ទះល្វែងសម្រាប់ស្នាក់នៅមានតិចជាងចំនួនផ្ទះដែលបានសាងសង់រួច ហើយបើទោះជាគម្រោងសាងសង់ផ្ទះល្វែង សម្រាប់ស្នាក់នៅកើនឡើង ប៉ុន្តែការសង់ជាក់ស្ដែងមានតិចតួចប៉ុណ្ណោះ។
អ្នកវិភាគអចលនទ្រព្យ និងជាប្រធានអ្នកវាយតម្លៃអចលនទ្រព្យកម្ពុជា លោក សឹង ប៊ុណ្ណា បានអះអាងថា សកម្មភាពជាក់ស្ដែងនៃការសាងសង់មានប្រមាណតែ ៣០% ហើយអ្នកដែលមានលទ្ធភាពទិញផ្ទះបាន មានប្រមាណតែជាង ២០% ប៉ុណ្ណោះ។
យ៉ាងណាក៏ដោយ លោក ស៊ឹង ប៊ុណ្ណា យល់ឃើញថា ក្នុងចំណោមអ្នកដែលមានលទ្ធភាពទិញផ្ទះបាន ប៉ុន្តែក្នុងចំនួននេះ ក៏មានអ្នកដែលមានលុយច្រើនទិញផ្ទះទុក សម្រាប់លក់យកចំណេញផងដែរ ដែលតាមការប៉ាន់ស្មានមានចំនួនប្រមាណ ១០% នៃចំនួនផ្ទះដែលបានលក់នាពេលបច្ចុប្បន្ន។
ទោះជាយ៉ាងណាក៏ដោយ រៀងរាល់ឆ្នាំ មានចំនួនគ្រួសារជាច្រើនបានជួលផ្ទះគេស្នាក់នៅមានការកើនឡើង ប៉ុន្តែការអះអាងនានាយល់ឃើញថា ស្ថាប័នផ្ដល់ឥណទាន ឬគ្រឹះស្ថានមីក្រូហិរញ្ញវត្ថុ បានផ្ដល់ជំនួយផ្នែកហិរញ្ញវត្ថុដល់អ្នកខ្វះលទ្ធភាពទិញផ្ទះ ដែលកត្តានេះធ្វើឲ្យចំនួនអ្នកដែលទិញផ្ទះកើនឡើង។
អគ្គនាយកប្រតិបត្តិឥណទាននៃធនាគារអេស៊ីលីដា (Acleda Bank) លោក អ៊ិន ស៊ីផាន់ មានប្រសាសន៍ថា ចំនួនសរុបអ្នកដែលខ្ចីលុយទិញផ្ទះសម្បែងរបស់ធនាគារអេស៊ីលីដា រហូតដល់ពេលនេះមានជាង ៩ម៉ឺននាក់ ដែលមានទំហំសាច់ប្រាក់ ១២០លានដុល្លារអាមេរិក ហើយទំហំប្រាក់កម្ចីដែលមានអតិថិជនច្រើនជាងគេ គឺចន្លោះពី ៣ម៉ឺន ទៅ ៧ម៉ឺននាក់។
អ្នកវិភាគសេដ្ឋកិច្ច លោក ហេង ឌីណា មានប្រសាសន៍ថា ការទិញផ្ទះដោយប្រើមធ្យោបាយបង់រំលោះ គឺជាការវិនិយោគមួយដ៏សំខាន់សម្រាប់កំណើនសេដ្ឋកិច្ច ឬសុខុមាលភាពក្នុងសង្គមដែលប្រទេសជាច្រើនលើសកលលោក កំពុងអនុវត្តន៍ ដោយលោកបញ្ជាក់ថា កត្តានេះធ្វើឲ្យមានលំហូរ ឬចរាចរធនធានហិរញ្ញវត្ថុ ដែលជាប្រភពមួយធ្វើឲ្យមានការអភិវឌ្ឍសេដ្ឋកិច្ច។
លោក ហេង ឌីណា មានប្រសាសន៍បន្តថា អតិថិជនដែលទិញផ្ទះរំលោះអាចនឹងចំណេញច្រើននៅពេលដែលតម្លៃផ្ទះឡើងថ្លៃ ហើយសម្រាប់អ្នកដែលសន្សំលុយគ្រប់ក្នុងការទិញផ្ទះ អាចប្រើរយៈពេលច្រើនទៀត នៅពេលដែលតម្លៃផ្ទះមានកំណើនខ្ពស់ជាងប្រាក់ចំណូលរបស់បុគ្គលនោះ។
លោក ហេង ឌីណា បញ្ជាក់ថា ហានិភ័យក្នុងការខ្ទីលុយធនាគារទិញផ្ទះ គឺទាក់ទងនឹងស្ថិរភាពការងារ ហើយកត្តានេះមានទំនាក់ទំនងដោយផ្ទាល់ ក្នុងការធានាឲ្យមានកំណើនសេដ្ឋកិច្ចរៀងរាល់ឆ្នាំ។
ទោះជាយ៉ាងណាក៏ដោយ ក្នុងចំណោមអ្នកដែលមានលទ្ធភាពទិញផ្ទះ ឬមានចំណូលប្រមាណ ១ពាន់ដុល្លារ មានជាង ១៥% ដែលរស់នៅទីក្រុងភ្នំពេញ ប៉ុន្តែលោក ស៊ឹង ប៊ុណ្ណា បញ្ជាក់ថា ក្នុងចំណោមអ្នកដែលមានលទ្ធភាពទាំងនោះ នៅតែមិនចេះប្រើប្រព័ន្ធធនាគារនៅឡើយ។
លោក ស៊ឹង ប៊ុណ្ណា មានប្រសាសន៍ថា ការទិញផ្ទះ គឺជាការវិនិយោគមួយសម្រាប់អ្នកដែលមានចំណូលទៀតទាត់ ដើម្បីទទួលបានទ្រព្យជាផ្ទះសម្បែងនៅពេលអនាគត ប៉ុន្តែការទិញផ្ទះបង់រំលោះ មានកត្តាអវិជ្ជមានប្រមាណ ៣០% ដែលពួកគាត់គិតថា អាចនឹងខ្វះលទ្ធភាពសងទៅធនាគារវិញ ដែលភាគច្រើនគាត់បារម្ភទាក់ទងហានិភ័យការងារជាដើម នៅពេលដែលគាត់ទិញផ្ទះសងរំលោះ។
ទោះជាយ៉ាងណាក៏ដោយ អគ្គនាយកប្រតិបត្តិឥណទាននៃធនាគារអេស៊ីលីដា លោក អ៊ិន ស៊ីផាន់ បានបញ្ជាក់ថា ក្នុងចំណោមអ្នកខ្ចីលុយទិញផ្ទះតាមរយៈធនាគារអេស៊ីលីដា គឺមានលទ្ធភាពសងទៅតាមការព្រមព្រៀងនៃការបង់រំលោះ ប៉ុន្តែលោកបញ្ជាក់ថា អតិថិជនមួយចំនួនមានការបង់យឺតដែរ។
យ៉ាងណាក៏ដោយ ការសាងសង់ផ្ទះល្វែងសម្រាប់លក់ បានកើនឡើងនៅពេលបច្ចុប្បន្ន។
របាយការណ៍វិទ្យាស្ថានបណ្ដុះបណ្ដាលស្រាវជ្រាវដើម្បីអភិវឌ្ឍកម្ពុជា បង្ហាញការស្នើសុំគម្រោងសាងសង់នៅរាជធានីភ្នំពេញ នៅខែមិថុនា ឆ្នាំ២០១២ បានកើនឡើង ដែលតម្លៃគម្រោងសាងសង់ផ្ទះល្វែងកើនដល់ ២៦លានដុល្លារ និងគម្រោងសាងសង់ផ្សេងទៀត កើនឡើងមានតម្លៃជាង ១២២លានដុល្លារសហរដ្ឋអាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។